Raemen ti KWF ti Dignidad ti Tunggal Lengguahe, Kuna ni Komisioner Mendillo

Naikkan iti bileg ti Komisyon sa Wikang Filipino (KWF) a mangpatan-ay, mangpadur-as ken mangsaluad iti Filipino ken dadduma pay a lengguahe iti Filipinas a pakairamanan ti Ilokano. Nupay kasta, agsipud ta bigbigen ti KWF a ti tunggal lengguahe ket agsantak iti bukodna a lubong, ti karit para iti KWF ket isu ti panangpadur-asna iti lengguahe bayat met ti panangraemna iti dignidad ti tunggal lengguahe a kas identidad ti kultura nga ibagianna.

Daytoy ti kinuna ni Dr. Benjamin M. Mendillo, Jr., Full-time a Komisioner ti Komisyon sa Wikang Filipino ken mangibagi iti Lengguahe nga Ilokano, iti panagsaritana a kas Naisangayan a Sangaili ken Agsarita iti Panglukat a Programa ti birtual a Dap-ayan 2021, ti Maika-53 a Kombension Nasional ken Literary Seminar ti GUMIL Filipinas, itay Agosto 22.

Innayon ni Komisioner Mendillo, patneng nga Ilokano a tubo ti Gen. M. Natividad, Nueva Ecija, a ti panagrangpaya ti lengguahe, saan ket a ti panagar-ari ti lengguahe, ti rumbeng koma a maitandudo.

Binigbig met ni Komisioner Mendillo ti pateg ti seminar/convention nga isaysayangkat ‘toy gunglo dagiti mannurat nga Ilokano iti Filipinas ken iti ballasiw-taaw manipud iti Agosto 22 agingga iti 28 a kas nalawag a pangipaneknek iti panangtuntun-oy ti gunglo kadagiti panggepna a manamnama met a makatulong iti pannakaipatungpal dagiti naituyang a panggep ti KWF.

Gapu met itoy, kinuna ti Komisioner a magagaran iti pannakairugi ti panagtinnulong ti KWF ken ti GUMIL iti pannakagun-od ti komun a panggepda.

Innayonna a kayatna met a makita no kasano a makatulong ti KWF iti pannakaangay dagiti kombension ti GUMIL ken iti naan-anayen a pannakabigbig ti gramatika ken ortograpia ti lengguahe nga Ilokano, ken dadduma pay a mabalin a maisaranay ti KWF iti GUMIL.

Pinagsapata ni Presidente Rodrigo R. Duterte ni Dr. Mendillo a kas Full-time Commissioner ti KWF idi laeng Agosto 6. Daytoy met a panagsarita ni Komisioner Mendillo iti pasken ti GUMIL ti umuna a panagsaritana iti maysa nga ummong sipud panagsapatana.

Iti panangigibusna iti panagsaritana, pinagsiddaaw ken pinagraem ni Komisioner Mendillo dagiti dimmar-ay iti birtual a pasken iti laingna a kumanta babaen ti panangiruknoyna kadagitoy kapulianna nga Ilokano iti klasiko a kanta a “No Du’duaem Pay.”