Agsupadi a Lubong

NALUKAGAK iti panagsardeng ti Bachelor bus ken iti yuulog ken yuuli ti sumagmamano a pasahero. Nasalemsem. Inyunegko dagiti imak iti bolsa ti diaketko sa nagdalikepkepak. Aglawagen. Malaybalay City gayamen. Manipud iti tawa, naipasirko dagiti kaykayo a nabungon iti angep.

Bareng makamakamko met laeng ti pangngaldaw idiay balay da Ikit Iren a sarungkarak kalpasan ti naunday a panawen. Ubingak pay idi pimmanawak. Disisais la ti tawenko. Adun ti namalbaliwak iti sangapulo a tawen a kaawanko. Saannak pay ket ngata a malasin ni ikit itan.

Ay, wen, ni ikitko. Kasta unay a sangitna idi pimmanawak. Uray kasano la ti rigat no ditay agsisina, kinunkunana ngem nakaikeddengak idin. Masapul nga umadayoak iti dennana ta tun-oyek ti arapaapko. Dayta ti impambarko kenkuana, ngem ti kinapudnona tapno masursurok ti manglipat.

Anaknak ti kakaen ni Ikit Iren a pimmusay kano idi impasngaynak gapu kano iti postpartum hemorrhage. Isu a pinadakkelnak ni ikit a kas bukodna nga anak ta awan met anakda iti daydi lakayna a ni Uliteg Teddy. Ken awan met ti amak ta pinanawanna kano ni inang idi sikognak pay laeng.

Idi agandar ti bus, nailibayak manen. Naimas ngata ti turogko ta sa laeng nakariingak idi ipakaammo ti konduktor ti panamigat dagiti pasahero. Damulog met gayamen. Addakamin iti nagbedngan ti Bukidnon ken North Cotabato. Nupay diak pay mabisin, immulogak ta watwatek dagiti gurongko agraman ti siketko ta nariknak a nautoyanak iti biahe. Naipasabat kaniak ti makapabang-ar a pul-oy-bigat nga aggapu kadagiti asideg a bambantay iti aglawlaw. Dagitoy a bambantay ti