Saludsodem ken ni Apo Hues

SALUDSOD:

Maysaak a retirado nga empleado ti gobierno; lumakayen ken maysa a balo. Uppat ti annakko; dua a lallaki ken dua a babbai. Adda napundarko a balay ken lote ken sumagmamano a parsela a daga. Adda pay panakkelen a depositok iti banko.

Ita a sibibiagak pay, Apo Hues, kayatko koma a maibunong dagitoy kadagiti annakko ta di met ammo no kaano nga alaennak ti Apo. Nangngegko nga adda kano dokumento a mabalin a maaramid a para iti pannakaibunong dagiti sanikua. Bagbagaannak koma, Apo Hues.—Lorenzo ti San Juan, Ilocos Sur

SUNGBAT:

Nasayaat ti napanunotmo. Adda ngamin dagitay agririri a napanawan maipanggep iti pannakabingay dagiti tawid. Ket no adda kastoy a dokumento nga ibati ti agpatawid, maliklikan ti panagdidinnarum no bilang agririri dagiti napanawan.

Maibatay iti Artikulo 783 ti Kodigo Sibil (Civil Code of the Philippines), adda karbengan ti maysa a tao nga agaramid iti dokumento ti Maudi a Bilin ken Testamento (Last Will and Testament) tapno maibunongna dagiti sanikua a mapanawanna.

Dua a kita ti dokumento ti mabalin a pagpilian: ‘tay manotarioan, ken ‘tay holographic.

Iti manotarioan, ti abogado ti mangaramid. Adda tallo a testigo iti pannakaaramidna. Maysa laeng ti kopia ti dokumento a maideposito iti abogado. No pumusay ti nagpatawid, bistaen ti Korte (probate of a Will). Ditoy, basaento ti abogado ti linaon ti dokumento.

Iti holographic, isurat a mismo ti agpatawid ti Maudi a Bilinna babaen ti ima (handwritten). Maysa laeng a kopia. Inton maisuratna, ikabilna iti sobre; serraanna a nalaing; pirmaanna ti nakaserraan ti sobre. Ilemmengna tapno awan ti makaala. Kinapudnona, sekreto daytoy. Maluktanto inton pumusay.

Palagip: ania man kadagitoy a Maudi a Bilin ti aramiden, masapul a ti agaramid (testator), addaan iti nasayaat a panunot ken salun-at.

No ‘tay manotarioan ti maaramid, mapan laeng ti agpatawid wenno testator iti abogado ta ti abogado ti tumulong kenkuana a mangaramid.

No ‘tay met holographic, mabalin met ‘tay agpatawid ti mapan iti abogado ta ikkan ni Apo Abogad iti porma.

No manotarioan ti Maudi a Bilin, agbayadka iti abogado.

No ‘tay holographic, awan magastom.

Ala, agpilikan iti kayatmo nga aramiden.—O