Dagiti Sugat ti Daga (1)

A(Umuna a Paset)

PAY a naglamiisen, nakuna ni Bileg Aurelio Puritac Colorado, 38, iti pannakapuotna a nakailad iti narakab a desarming a lamisaanna iti maikalimapulo ket uppat a kadsaaran ti RazonColorado Towers iti Avenida Finanzias iti dayta a parbangon. Kasla yelo ti panagriknana iti sarming iti rabaw ti lamisaan a naidennes iti bukot, patong ken abagana. Agpampanirpir ti inverter nga aircon iti ngato a paset ti diding iti makanawanna. Aganandar pay laeng ti smart TV iti adayo a diding iti makanigidna, ti laengen station ID daytoy ti iparparangna. Saannan nga iniddep ti TV ken binaybay-an met ni Thor daytoy. Iti alas onse a damdamag idi rabii, inulit ti newscaster ti kadakkelan a bimtak a damag iti pagilian: napaserraan ti Ylocos Minerals, iti mismo a mine site a pagtaudan ti kobre, nikel ken cobalt— dagiti kangrunaan a mangbibiag iti Razon-Colorado Investment Group.

Nakaduyayyat ti nalukneng a naalpombraan a sopa iti diding iti uluananna ngem saan a dita ti nangibaltogan ni Bileg Aurelio iti bagina idi rabii: kabutengna ti maturog, kabutengna a liputan manen dagiti pasamak, ngem papananna a di nakaturog iti ininumna? Ni Thor, ti driverbodyguard-na ti naturog iti sopa. Awanen ti baro. Nalabit, bimmaba ken saanen a riniing daytoy. Wenno addan iti war room a pagpapainganna. War room ti awagda iti maysa a kuarto ti kompania a pagpainganda no adda dagiti isayangkatda a nasiken nga operasion ti kompania.

Idi kalman, apaman a naammuanna ti dakes a damag, rinautna ti kabinet a pangilemlemmenganna kadagiti agkakangina nga arak ken wine nga aggapu iti Europa a masansan nga ipapainumna kadagiti sangailina. Pinilina a linuktan ti Chateau Margaux.

“Apay, agbartekka, sir?” dinamag ni Keith, ti naubing a sekretariana, idi kayumkomen daytoy dagiti papel a naudi a pinirmaanna. “Luktandanto siguro met laeng, sir… ‘palubos ti Apo.”

“Agbartekak sa nga agpatpatnag ita. Para makitanto no bigat!” kinemkemna dagiti prominente a pangalna. Inamuyna ti sumagid iti abaga a kulot ken nappattopattokan iti nasapa nga uban a buokna, inidusna ti agkilapkilap a wine sa intangadna. Naipdokan. Immasideg ni Keith ket immasahena dagiti babassit a dakulapna iti abaga ni BA.

Naikkatnan a bisio ti agbartek manipud pay idi natakuatanda nga adda ganna ti dalemna.

“Adu met pay ti pamuspusantayo, sir,” limnek dagiti kallid ti sekretaria. “Awagakto manen dagiti kameng ti Board inton rabii.”

“Saanmon a paturogen ida! Ibagam a nasapsapa pay ngem alas siete, addadan iti board room!”

“Basta saanka nga agbartek, a, Gel, sir,” inkidmat idi ni Keith. Gel ti awag ni Keith kenkuana no aglailo sipud daydi rabii a panangisuko daytoy iti kinababaina. Ngem awagan laeng daytoy iti kasta no awan ti sabali a makangngeg. “Ken agawidka met, a. Apay saanen? Agururay ni Manang Riz. Kakaisuna nga adda isuna ita.” “Inawagakon. Imbagak a saanak a makasangpet!” “Saan a rumbeng a papasam, sir,” impallilit ni Keith. “Masapulmo ti panangliwliwana kenka kadagitoy a panawen. Kasilpo ti…”

“Agurayka ta agmaymaysaak man pay la nga agliday, Keith…” insungbatna.

“Agawidka koma pay, a,” nalailo ti timek ni Keith. “Kayatmo ti masahe, ammok…”

“Saanko a ma-enjoy ti kasta no kastoy a didigra,” insungbatna. “Bay-am man pay la dagita. Masapulnak ti pagbiagantayo ita. Isu nga agpanunotak man a nalaing.”

Inasitgan ni Keith. Inawid daytoy ti rupana. Inappupo dagiti babassit a dakulap daytoy ti apagapaman a limnek a pingping ken natadul a pispisna. Nasay-upna ti banglo ti balasang. Inagkan daytoy dagiti naingpis a bibigna.

“Innakon. Laglagipem nga adda kunkuna ti dalemmo, Gel, sir…” Tinurongen ni Keith ti bukod daytoy a lamisaan ket insakbatna ti bagna a Louis Vitton. Nalag-an ti kanaktuol ti high heel-na a nagturong iti ridaw.

Siniputanna ti natubtubay a pammagi ti balasang a binegket ti asul nga executive suit ngem nakurang ti ragutok iti barukongna. Nataytayag ni Keith ngem isuna iti sumagmamano a pulgada. Pudno a kasla munmunieka.

Saanna nga ammo ti aramidenna idi agsipnget. Winaknitanna ti desarming a diding ket tinannawaganna ti kaatiddogan ti Avenida Finanzas, ti kangrunaan a kalsada dagiti negosio iti Poro Ylocos. Agsasallupangen dagiti silaw dagiti kotse. Inwaknitna met iti abagatan, iti Via del Puerto, ti kangrunaan a kalsada nga agturong iti pantalan ti Cadaclan City a sentro ti Poro Ylocos. Dadakkel dagiti lugan nga aggapu iti Puerto. Senial a nangrugin ti pannakabunag dagiti produkto nga aggapu iti pantalan a maipan kadagiti nadumaduma a suli ti pagilian.

Dadakkel ken malaglagawan dagiti askawna iti pananglikusna iti opisinana. Mariknana ti apagapaman a panagsakit ti kanawan a paset ti buksitna. Stress, dayta idi ti kinuna ni Dr. Rogelio Graganta a gayyemna. Saan a mainaig iti fatty liver a sakitna.

Kinemkemna manen dagiti sangina a nakalagip iti timmaud a pakabuongan ti ulona. Apay met ngatan a kellaat a nagbaliw ti polisia ti rehimen ni Presidente Rosauro F. Genuino? Apayen a kellaat nga et-etan daytoy bakla a presidente ti Republika ti Poro Ylocos dagiti pagminasan? No namin-ano nga inulit ni Presidente Genuino a saannanto a paserraan dagiti pagminasan. A makaammonton ti mangabak iti masungad a basingkawel ti politika a mangdesidir iti dayta. Ngem ita? Apay metten a kellaat nga adda pammilin a maserraan dagiti pagminasan?

Iti unos ti sumagmamanon a bulan sipud inulit-ulit ni Presidente Genuino dayta a polisiana, saan a pulos a nakerrasan ti balor ti Ylocos Minerals iti stock market. Ngem inton bigat, mapugtuannan ti mapasamak. Mabanitog la ketdi ti balor ti stocks ti kompania.

Limmidok ni Bileg Aurelio iti wine iti kopita.

Isagananan ti bagina iti panagsuek ti stocks ti kompaniana. Iti agarup 3 a billion a doliar a balorna, ammona pay no kasanonto ti pagsuekanna? Para iti CEO ti maysa a higante a korporasion, makapasidduker daytoy a panunoten.

Iti telebision idi rabii, naipalabas dagiti kamera iti panangyawat ni Usec. Warlita Arutang Naval iti closure order iti general manager ti Ylocos Minerals, Gran Cordillera operations. Pakairamanan dayta dagiti pagminasan dagiti munisipalidad ti Caduyongan ken Caantengan. Sinaruno dayta ti panangkandado dagiti simmurot a polis iti opisina ti pagminasan. Inaynayon ti anaunser a saan a pinatgan ni Bileg Aurelio ti pannakiumanda kenkuana.

Nagkatawa iti nakapsut ket nakarikna iti nagduek a sakit iti bakrangna. Awan ti panggepna a matirtiris kadagiti kameng ti media. Amangan no agbiddut pay ket madegdegan ti situasion. Numona ta nalaing a mangparubrob dagiti kameng ti media.

“Diak kayat ti makakita iti reporter ditoy opisinak!” imbugkawna iti intercom idi umawag ni Law-ing Alipugpog, ti Ygorod a hepe ti seguridad ti kompaniana.

“Pakaammuanyo sikami no agawid sikayo, sel, tapno saan sikayo a sabaten sagiti taga-media,” kinuna ni Alipugpog iti natangken nga Ilokano-Ygorodna. “Nagcamping-dan sitoy luangan.”

“Saanak a rummuar! Diak agawid!” kinunana iti napait a timek. Dagitoy ketdi nga arrabas iti damdamag, inngayemngemna.

“Okey, sel, copy!” kinuna ni Alipugpog. Kalpasan ti panagsaritada ken Alipugpog, minulenglenganna manen ti TV. Ibagbaga ni Usec. Warlita Naval a saan laeng a ti Ylocos Minerals ti mapaserraan. Amin a dadakkel a pagminasan iti pagilian. Kaipapanan dayta dagiti pagminasan ti Amianan Mines and Georesources iti akin-amianan a paset ti puro ken ti Hercules Mines and Oils iti abagatan. Adda iti katengngaan dagiti naibalakday a kabambantayan ti Gran Cordillera operations ti Ylocos Minerals. Kobre, nikel, ken kangrunaanna, cobalt ti minasenda. Sumagmamano pay a babbabassit a pagminasan ti masalapon dita. Saan nga ammo ni Bileg Aurelio no malasatan daytoy a didigra.

“Go ahead, challenge us!” insungbatna ken ni Usec. Warlita Naval nga agsasao pay laeng iti telebision. Intangguapna ti kopita. Inwang-itna ti buokna a nanggabur iti rupana. Pinagrittuokna dagiti ramayna.

Isu met idi nga iserrek ni Thor, ti nataer a badigardna, ti pangrabiida. Naipan daytoy iti pumirak a trolley. Indisso ni Thor dagiti iggemna iti bassit a lamisaan a nagbukel iti makanigid a paset ti opisina. Indatar daytoy dagiti makan. Inabraw a sabunganay nga adda saluyotna, insarabasab a presko a karne ti alingo. Estrikto ti sukat ti innapuy. Saanna a kayat ti nasursurok ngem sangakopita.

Maymaysa itan ti kabutengna iti biag—ti pannakayawyaw amin a nagbannoganna…