Manila Bulletin

Kastoy, Kapid, Ditoy Hawaii

Ni RIC AGNES

N(Maudi iti 2 a Paset) AIPAKADAWYANEN ditoy Hawaii a mailayon ti asino man nga opisial ti siudad wenno county (ili) no bilang agkandidato manen no la ketdi awan ti nadagsen a nagkamtudan wenno nagbasolanna bayat ti panagtakemna. Awan ngamin makuna a kurapsion wenno panagkunniber agsipud ta maarisit ti paggastosan dagiti opisial. Ken awan nasken nga abruten a gastos ti opisial bayat ti panagkandidatona ta bin-ig amin a donasion ti gastosenna bayat ti panagkampaniana.

Malaksid iti donasion, adda pay ited ti gobierno a gastosen ti maysa a kandidato.

Tunggal kandidato, adda pusganna a tesorero a mangtengngel iti pondo. Bayat ti kampania, nasken nga ipakaammo ti tesorero ti maummong a pondo ken dagiti magasto iti komision ti eleksion. Kalpasan ti eleksion, maaramid man met laengen ti pannakaarisit iti nagasto, ken no mano ti nabati a kuarta iti pondo.

Kalpasan ti uppat a tawen ket saanen nga agpaidasig ti maysa a nagkandidato iti uray ania a mabotosan a takem, naisubli iti komision ti kuarta/ pondo nga adda iti ikut ti tesorero. Nadagsen ti dusa ti tesorero nga aglabsing iti daytoy a pagannurotan.

Masansan met a saanen a makasubli iti takem ti asino man naabak iti napalabas a panagpipili.

Idi eleksion ti para mayor ti Honolulu idi 1984, nagngayangay ni sigud a mayor Frank Fasi nga agkandidato a mayor.

Iti daydi a tawen, adu ti naggandat a kabalubalna. Pagarupen ngamin dagiti natenneben iti politika nga awanen ti masakbayan ni Fasi iti benneg ti politika. Iti napalabas nga eleksion ti kinagobernador ti Hawaii a nakaabakanna iti sangagerger ken ni Gobernador George Ariyoshi, maipapan a saannan a maallangon ti naganna nangruna kadagiti botante a Filipino. “Nairaremen,” kinunkunada. “Saanen a makalung-aw.”

Uray iti biang dagiti Filipino, saanda a maiwaksi dagiti inwarwaragawag ni Abe Mariano maipanggep iti di nasayaat a panangtaming ni Fasi ken ni Mayor Eulalio Siazon idi napan ti naud-udi iti opisina ti mayor ti Honolulu. Ni Mariano ti dati a sekretario ni Mayor Siazon sakbay a nagpa-Hawaii ni Mariano.

Gapu iti dayta a panangipapan, kunada a bassit ti maur-or ni Fasi a pondo manipud kadagiti umili ken negosiante.

Ngem saan a naupay. Daytoy ti talugading ni Fasi: addaan iti nadarisay a panggep nga agserbi kadagiti umili no bilang ta maikkan manen iti gundaway nga agtakem a mayor ti siudad.

Napan nakisarita ni Fasi kadagiti pangulo ti komunidad dagiti Filipino. Kiniddawna dagitoy nga agkandidatoda a diputado iti bukodda a distrito. Adu kadagitoy ti nagpangadua: umuna, awan padasda iti politika; maikadua: nakatugaw dagiti kabalubalda. Kas naipakadawyan, narigat a tippuogen ti agdama nga adda iti takem; ken dadduma pay a rason.

Ngem pinapigsa ni Fasi ti nakem dagitoy. “Daytoyen ti gundawayyo a mangibayog iti

Filipinas ken mangiwardas kadagiti Filipino.” Malaksid iti dayta, inkari ni Fasi a no isu ti mangabak, ikkannanto amin ida iti saad.

Immanamong dagitoy a nagkandidato: para konsehal wenno para diputado—sangapulo ket maysada amin—nawarasan dagiti distrito a pagnaedan dagiti adu a Filipino.

Iti tunggal adda maaramid a fund raising dagiti Filipino a kandidato a pakaummongan dagiti kakailian, kanayon nga adda ni Frank Fasi. Iti kasta, adda gundawayna a makilangen kadagiti botante a Filipino.

Iti dayta a wagas, naisinged manen ni Fasi ti bagina kadagiti Filipino.

“Naisangsangayan daydi nga eleksion,” kinuna ni Art Perez, tagaCuyapo, Nueva Ecija ken pangulo dagiti kontraktor iti Honolulu, “idi umadanin ti panagbobotos, kasla ipon a nagpasurong ti urnos dagiti Filipino a nangipus iti kandidatura ni Fasi.”

Ngamin, idi mabilang dagiti botos,

bimmandera ni Fasi kadagiti distrito a pagindegan dagiti Filipino.

Apaman a nagmawmaw ti ramrambak ti bunggoy ni Fasi, dinutokanna ni Geminiano “Toy” Arre, nagturpos iti Unibersidad ti Filipinas ken tubo ti Cauayan, Ilocos Sur, a nangurnos kadagiti maipuesto a Filipino iti administrasion ni Fasi. Nabigbig ni Toy Arre a kakaisuna a saan a Hapon a nagtakem a pangulo iti Honolulu Japanese Junior Chamber of Commerce (Jaycees).

Idi agtugaw ni Fasi a mayor idi Enero 1985, nangrugi met a nagtakem da William Remullar iti Building Department, Vicky Bunye iti Human Resources, Guillermo Manuel iti Health, Geminiano Arre iti Finance, Mauro Goze iti Environment, Will Espero iti Neigborhood Board, Gerry Rojo ken Fernie Nicolas iti Transportation, ken nadumaduma pay a takem.

(Kalpasan ti panagtakem ni

Will Espero iti babaen ni Fasi, nagkandidato ken nangabak a diputado iti Ewa Beach, ken senador kalpasanna.)

Gapu iti kaadu a Filipino iti gabinete ni Fasi, nalukatan ti ridaw ti siudad kadagiti adu a propesional a Filipino ken dadduma pay a takem.

Iti panagkuna ni Art Perez, sakbay ti 1985, mabilbilang dagiti Filipino kadagiti opisina ti siudad. Kadagidi a panawen, narigat a makangato dagitoy iti puesto. Ngamin, uray no Filipino ti kangatuan iti kalipikasion kadagupan dagiti aplikante, bassitusit ti gundawayna a mapili agsipud ta awan Filipino a kameng ti selection committee.

Ngem kalpasan ti panagtakem ni Fasi, saanen a maarus dagiti Filipino— adu kadakuadan ti nakangato iti saad.

“No ania man ti nangato a pagsasaadan iti City Hall dagiti Filipino kadagitoy a panawen, makuna a ni Frank Fasi ti nanglukat iti ruangan kadakuada,” kinuna ni Perez.

Ngem iti kapanunotan ni uliteg, no saan a nagkaykaysa dagiti Filipino a nangrippuog iti kandidatura ni Fasi iti kinagobernador idi 1982, saanna koma a naamiris nga adda bileg dagiti Filipino.

Kadagiti met agpalpaliiw iti politika ditoy Hawaii, ibilangda a henio ni Fasi iti benneg ti politika gapu iti kasla milagro a pannakabotosna manen a mayor kalpasan ti nakasang a pannakaabakna idi 1982 iti panagsangoda ken Ariyoshi iti kinagobernador.—O

Itoy A Bilang

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281771337377472

Manila Bulletin Publishing Corp