Manila Bulletin

Siled ti Kararag

Basaentayo ti 1 Ar-ari 19: 1-13

Nagidda iti sirok ti kayo ket nakaturog. Pagamammuan, sinagid ti maysa nga anghel a nagkuna kenkuana, “Agriingka ta manganka.”—1 Ar-ari 19:5

ADU unay ti pakakumikomak ket mariknak a napaksuyan ti bagi ken riknak. Mariribukanak unay iti panangpampanunotko kadagiti nakad-adu a nakaikumitak. Nagkulmegak iti sopa ket nagsangitak a nakisarita iti Dios, “Diak ammo no kasano nga aramidek amin dagitoy. Diakon kabaelan. Tulongannak kadi.” Inkidemko bayat ti panagkararagko ket nagurayak iti sungbat. Kalpasan ti maysa nga oras, bimmaringkuasak manipud iti pannakailibayko, nadismayaak iti bagik gapu ta nakaturogak bayat ti panagkarkararagko. Inutobko ti situasion ket naamirisko nga iti panagkararagko, saanak a nagdawat kadagiti detalye gapu ta saanko nga ammo no ania ti kasapulak. Ngem ti dinawatko isu ti tulong, ket immay ti tulong babaen ti panaginana. Saan a ninamnama a sungbat iti kararag a nangpabaro iti pigsak ken panangiturongko iti panunotko kadagiti nasken nga ileppas a trabaho.

Nalagipko ti istoria ni Propeta Elias. Nabannog unay ket imbagana iti Dios a saanen a makaibtur. Naladingit unay ni Elias kadagiti paspasamak iti biagna ket dinawatna iti Dios ti ipapatayna. Ngem impalubos ti Dios a makaturog ket kalpasanna, imbaonna ti anghel a mangted iti taraonna. Napapigsa ni Elias ket nagtuloy, ken nabalinanna a dinengngeg ti naalumamay a timek ti Dios. Agtultuloy nga ipapaay ti Dios ti inana tapno papigsaennatayo ken pabaruenna ti panagtalek ken panagtulnogtayo iti Dios.

Kararag: Patgenmi unay nga Apo Dios, agyamankami iti ayatmo ken iti panangipaaymo kadagiti kasapulanmi, uray pay no saanmi nga ammo no ania ti dawatenmi. Amen.

Kapanunotan: Pabaruen ti Dios ti pigsak babaen dagiti saan a ninamnama a wagas.

Ikararagan: Dagiti mariribukan.

(Naadaw iti Siled ti Kararag, Paguummongan ti Sangalubongan Tapno Agkararag,

Septiembre-Oktubre 2021 a bilang. Impablaak ti Discipleship Resources-Philippines. Sarungkaran ti http://discipleshipresourcesphilippines.com wenno ag-e-mail iti drphilippines@gmail.com.)

Itoy A Bilang

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281822876985024

Manila Bulletin Publishing Corp