Manila Bulletin

Ti Puga (41)

Norberto D. Bumanglag, Jr.

Ti Napalabas: Pinabettak da John ti cottage a sinerrek ti strike team ti CIA. Naalada pay ni Mr. Hutchison ngem naipasuli ida da Sekretario Sandoval. Pinalubosanda ida ngem inikkanda laeng ida iti 24 nga oras a wayawaya. Naamiris ni John a kasapulanna ti tulong ti Al-Sujud Brotherhood ket inawaganna ni Sgt. Ramirez. Inkeddengda a mulaan iti “bug” ti pagtaengen ti Sekretario ngem napaayda. Natiliw pay ni Rudy ket innala ti CIA. Inusar ti Sekretario ni Rudy nga appan tapno mapasukona ni John ngem saan a nagballigi. Inkeddeng ni John nga isudan ti mangraut kadagiti nangala ken ni Rudy, ngem idi rummuarda iti hotel, kellaat nga adda nangpaltog kadakuada ken Sgt. Ramirez.

N(Maika-40 a Paset) ATULID da John ken Sgt. Ramirez iti datar ngem saan a naibbatan ti sarhento ti paltogna. Napungananna ni John ket nawaya a nakitana a nailukat ti ridaw a binawbawan ti buckshot. Maysa a naka-tactical gear a lalaki ti simrek. Ikaskasa daytoy ti buckshot-na. Inunaannan daytoy. Napaatras ti lalaki. Pinaltoganna manen. Ngem kaskasdi a dina mapadso ti lalaki. Ammona lattan a naka-bulletproof vest daytoy. Ket umasideg manen!

Sinirig ti sarhento ti tengnged ti lalaki, iti paset a saan a nasalakniban ti bulletproof vest. Dua a bala ti imbulos ti paltogna. Inapput ti lalaki ti tengngedna ta uray la nagsayutsot ti dara. Madamdama laeng, natumban ti lalaki.

Kinugtaran ni Sgt. Ramirez ti bulong ti ridaw ket nairikep met laeng.

“Thanks,” kinuna ni John. Nagkunail a rimmuk-at iti pannakaidda ti sarhento kenkuana. “Welcome.”

Sakbay a nakatakderda, nagranipak dagiti paltog. Kasla agtudon ti bala iti yanda. Nagallinda a naglinged iti kongkreto a paset ti diding. Timmakderda. Nakasaganan dagiti napatangad a paltogda.

“Kasano a nadlawmo nga adda tao?” sinaludsod ni John.

“Kasla adda alintatao a nasirayak a limmabas iti ruar ti tawa. Ngem

diak sigurado... It was just an instinct...” insungbat ti sarhento.

Immanges iti nauneg ni John. “How the hell did they track us down again?”

“Kinasaritam ti sekretario... They put a trace on your cell phone.”

“It wasn’t long enough to trace us down...” inkalintegan ni John.

“You are forgetting how sophisticated the tracing device that the military is using...”

Napangiwingwing ni John. “We are not dealing with the CIA now... we are fighting those special forces in the military. But we are better than them, right?” Kimmali dagiti mata ni John kadagiti mata ti sarhento.

Nagtung-ed ti sarhento. “We are still the Al-Sujud Brotherhood... we can’t be conquered... we fight our way out.”

Apagapaman a napakidem ni John ket nagalawaaw iti lagipna kadagiti simminan a kameng ti Al-Sujud Brotherhood. Duada laengen a nabati, malaksid ken ni Sgt. Cortez a comatose pay laeng. Saan a mabalin nga adda pay mapukaw kadakuada.

Pinadas ni John a sinirip ti ridaw. Kumanakraad latta daytoy gapu iti pannakapalpaltogna. Nakaad-adun ti lussokna.

Inasut ni John ti maikadua a paltogna. Saggaysan iti iggem ti kanawan ken kanigidna. “This is what we gonna do... You open the door... I’ll dive on the floor outside the door and start shooting those bastards,” kinunana iti sarhento.

Nagtung-ed ti sarhento. “Are you ready?” Nagtung-ed met ni John. Nakaparpardas ni Sgt. Ramirez a nangilukat iti ridaw. Naibaskag ti nakatakder a lalaki a nakaiggem iti paltog. Naklaat daytoy. Saan a nakapaggunay. Pinaltogan ni Sgt. Ramirez. Nadaleb.

Limmagto ni John a nangisuyo iti bagina iti ruar. Saan pay a nagdisso iti datar, pinaltogannan dagiti nakitana a tallo a naka-tactatical gear. Napuntaanna dagitoy ngem napasanudda laeng. Naka-bulletproof vest-da. Idi agdisso iti datar, pinuntiriana ti tumeng ti maysa. Naparintumeng daytoy ket pinuntiriana ti kanawan nga abaga daytoy. Naggiddan dagiti dua a paltogna a kinalbitna. Innem a bala siguro ti naipunta iti abaga ti lalaki. Kasla natukkol a sanga ti takiag daytoy. Ti laengen napigis nga ima ti long sleeves daytoy ti mangtengtengngel. Sinirigna ti tengnged daytoy. Nakalawlawag a nakitana ti panagsuyot ti dara iti tengnged daytoy. Insublatna a pinuntiria ti maysa pay.

Nakaruar metten ni Sgt. Ramirez ket palpaltogannan ti maikatlo. Madamdama pay, agpapadan a naudatal dagiti tallo.

Timmakder ni John. Isu pay laeng ti pannakadlawna iti kaadun dagiti tao nga agtataray a rummuar iti hotel. Inasitganna ti maysa a kadakdakkel ken kabagbagina a naudatal iti datar. Inikkatna ti bulletproof vest daytoy sa insuotna. Innalana pay ti M-4 a naiwara iti datar. Kasta met laeng ti inaramid ni Sgt. Ramirez. Pati helmet, innalada.

Nagsubli ni John iti uneg ti kuarto. Binagkatna ti duffel bag ket rimmuardan. Limmuganda iti nangisit nga SUV nga ammoda lattan a nagluganan dagiti nangraut kadakuada. Ni John ti simmango iti manibela. Nakaparpardasda a pimmanaw iti parking lot.

Dida ammo, adun ti nakaawag iti 911. Naitedda pay ti description ti luganda ken ti numero ti plaka daytoy.

ADDADA iti uneg ti panipngeten a dakkel a warehouse. Sumrek-rummuar dagiti adu a trak nga agideliber kadagiti nagduduma a nateng ken prutas. Nakaad-adu dagiti migrant worker nga agbunag kadagiti naikarton a nateng. Maiparabaw dagitoy iti conveyor belt nga agturong iti nakarikep a kuarto a bambantayan dagiti natatayag a lallaki. Nadusol dagiti siketda a mangipasimudaag iti kaadda ti paltog a kalkaluban dagiti diaketda.

Agpalpaliiw ni Melanie. Ad-adalenna dagiti mapaspasamak iti warehouse. Masmasdaaw no apay a nakaguardia dagiti kuarto a pakaitundaan dagiti naikarton a nateng.

Droga ngata?

Linawlaw ida ti dakkel a sarming. Awan man laeng a pulos ti mangngeg kadagiti nakaad-adu a migrant worker nga agtrabtrabaho. Awan ti agsasarita. No adda madlaw dagiti guardia nga agsasarita wenno gandatenda ti agsasarita, adda mangpukkaw kadakuada ket ituloyda a dagus ti agtrabaho. Mabutengda.

Tallopuloda amin iti uneg dayta a nasarmingan a kuarto. Agpapadada a nakatakder. Ur-urayenda da Archie Castillano ken Mr. Aleksandr a mangted iti maudi nga instruction iti misionda.

“Are you ready?” nasinga iti timek ni Pablo. Liningayna ni Pablo. Nagtung-ed.

“Good. Dakkel ti panagtalek ni Mr. Castillano a maipastrekmo dagiti Ukrainian ken ti kargamentoda...”

Nasingada iti pannakailukat ti ridaw. Immuna a simrek ni Ronnie ken uppat a security detail. Simmaruno da Archie Castillano ken Mr. Aleksandr, sa innem pay a guardia. Nagpasangoda ket nakaul-ulimeken ti sibubukel a kuarto. Nagderetso ni Archie Castillano iti rostrum. Naiddep dagiti silaw sa naglawag ti dakkel a monitor iti sango, iti likudan ni Archie Castillano. Nagparang ti ladawan ti nakaat-atiddog a pila dagiti lugan a lumasat kadagiti nagaabay a nakaad-adu a checkpoint. Nalawag a makita dagiti adu a nakauniporme a soldado, nakatactical gear, nakabaklay kadagiti high powered nga armas, ken nakabarikes iti hand gun. Dagiti dadduma a nakauniporme, adda sursurotenda nga aso a mangsasaep kadagiti lugan a nakain-inayad a lumasat iti checkpoint. Iti sango ti checkpoint, adda dagiti soldado a mangsarsarming iti baba dagiti lugan.

“Makitkitayo ti live a ladawan iti nabedngan ti Tijuana, Mexico ken San Diego, California,” inrugi ni Archie Castillano. “Iti agdama, nakaad-adu dagiti lugan a lumasat. Nairanta a kasta. Iti uneg ti maysa nga oras, umadu pay dagiti lugan a lumasat... Nangbayadak iti nasurok a sangaribu a lugan a bumallasiw kadagita a checkpoint. Kayatko a masikoran dagidi border patrol iti kaadu ti lumasat. Kayatko a mabannogda, maupayda ken maawan ti ganasda nga agrekisa... Dayta ti gundawaytayo

Nakaturong dagiti mata ni John iti lugan ti polis a kasinnabatda. Makaammo ditan, kinunana, ket inwekweknan ti siliniador.

a sumrek.”

Nagkinnita da Melanie ken Pablo.

“Tapno ad-adda a maulaw dagiti border patrol iti daytoy nga operasion, pagkaduaek daytoy a bunggoy... Ti umuna, idauluan ni Pablo Sarmiento. Ti maikadua, idauluan ni Melanie Davis...”

Napamulagat ni Melanie. Agkadua ti bunggoy? Dina ammo dayta. Ti ammona, isuna laeng ti mangidaulo. “What the hell is this? Do you know about this?” inyarasaasna ken ni Pablo.

Nagwingiwing ni Pablo.

“Dummy a kargamento ti kargaen ti bunggoy ni Pablo... idinto a ti pudpudno a kargamento ti bantayan ni Miss Davis...” intuloy ni Archie Castillano. Nakaanges iti nalukay ni Melanie.

“Miss Davis, agtalekak iti kabaelam... isu a sika ti pangipabaklayak iti dayta a kargamento. Mapangnamnamaanka kadi met laeng?” kinuna ni Archie Castillano.

“Yes, sir,” insungbat ni Melanie a kasla adda nairaip a panaglastog ti bosesna. Gapu ta talkenda. “Umapalak,” nakuna ni Pablo.

“I can do it,” kinuna ni Malenie.

“Dayta laeng ti maibagak. Mabalinyon ti rummuar, ngem kayatko nga agbati da Pablo ken Miss Davis.”

Rimmuar ti kaaduan. Nabati da Pablo ken Melanie. Immasideg da Archie Castillano ken Mr. Aleksandr kadakuada.

“Agyamanak iti panagtalekmo kaniak, Mr. Castillano...” nayesngaw ni Melanie idi makaasideg ti boss.

“Impakitam kaniak ti laingmo iti panangipaknim ken ni Roberto Guerrero... Makaumanayen dayta...” kinuna ni Archie Castillano.

“Saankanto a mapaay, Mr. Castillano...”

“Ket ammok nga ammom no ania ti dusam no mapaayka iti daytoy...”

Dandani naltotan ni Melanie. Nagtung-ed ketdi. “Good,” kinuna ni Archie Castillano. “Go and join your men...”

Nagkinnita da Archie Castillano ken Mr. Aleksandr sa insurotda ti panagkitada ken ni Melanie a rimmuar.

“Adda kadi pamalpalatpatanna kadagiti mapaspasamak?” sinaludsod ni Mr. Aleksandr.

Nagwingiwing ni Archie Castillano. Immisem. “Awan a pulos, Mr. Aleksandr... awan a pulos...”

DUA a nangisit nga SUV ti nabannayat a mangpampanurnor iti naulimek a kalsada. Agpada a nakangisngisit dagiti sarming dagitoy ket nakarigrigat a malasin dagiti adda iti nauneg. Iti maikadua nga SUV, nakaul-ulimek ni Mr. Sandoval a nakaiggem iti baso a naglaon iti arak. Sagpaminsan a simsimanna ti arak. Kadarato ibakalna ti panagkitana iti ruar. Nakaununeg ti pampanunotenna. Saan a makaidna. Ta dakes ti agparparikna kenkuana sipud nagbalin a kabusorna ni John Villa.

Kinemkemna dagiti sangina sa nangibulos iti nakaununeg sennaay.

Apay nga ita laeng a makarikna iti amak? Awan a pulos ti kinabutbutengna. Kas sigud met laeng a soldado, natenneb ti bagi ken panunotna iti pannakigubat. Ammona amin a taktika tapno magundawayanna ti kinalupoy dagiti kabusorna. Adu a pammadayaw dagiti nagun-odna. Tinarawidwidanna ti Department of Defense. Naggigiddan a gubat ti immatonanna. Afghanistan, Iraq, Syria... Awan ti panagamakna a mangipatayab kadagiti B-52, wenno B-1, ken dagiti kadadakkelan a bomba ti armada ti Amerika kadagiti pagilian a mangtultulong kadagiti terorista. Sabali pay dagiti insaysayangkatda a covert operations nga awan ti pamalpalatpatan ti gobierno. Awan ti parikutna kadagitoy!

Ngem apay a daytoy a John Villa, agmaymaysa laeng, marigatan pay a mangipakni?

Napaanges manen iti nauneg. Tinaliawna ni SMSgt Brady, ti nakaul-ulimek a security aide-na. “Nakaululimekka, sergeant...” kinunana.

Saan man laeng a timmaliaw ti sarhento. Nagtalinaed dagiti matana iti dalanda nga agturong iti pagtaengan ti anak ti Sekretario. Tabunuanda ti panagkasangay ti apoko daytoy.

“Madanaganka pay laeng?” kinuna manen ti Sekretario. Immanges iti nauneg ni SMSgt Brady. “Naibagakon ti riknak maipanggep kadagiti mapaspasamak, sir...” “Mabutengka...”

Nagwingiwing ti sarhento. “No, sir! I’ll die protecting you. My only problem, sir, is you are becoming reckless...” “Because I don’t follow proper protocol?”

“Yes, sir. Gapu ta saanko a maipaay kenka ti naananay a proteksion no salungasingem dagiti procedures iti pannakasalaknibmo... We always travel in four vehicles, sir... Ita, dua laeng a lugan... No adda manggandat iti biagyo, saan a makaanay a proteksionyo...”

“Ipakitak iti dayta a John Villa a saanak a mabuteng kenkuana...”

“Biddut dayta, sir...”

“Kabaelam ni John, saan kadi, sarhento? Ibagam no saan... ta mangsapulak iti sabali...”

“Sir, trust me if I say, I can handle him...”

“Then, the argument stops here. Is that clear enough?” Nagtung-ed ti sarhento. “Yes, sir... loud and clear, sir...” Nayonanna koma pay ti ibagana ngem nagkiriring ti selponna. Sipapardas a nangsungbat. “Status?” sinaludsodna. Saanen a naguni agingga nga imbolsana ti selpon.

“Ania ti damag?” sinaludsod a dagus ti Sekretario. “Nakalibasda, sir. Ken uppat ti natay kadagiti taotayo.” Saan a nakatimek ti Sekretario. Nangurat ketdi dagiti pispisna. Imbarsakna nga iggemna.

NAKAPASPASPAS ti panagpataray ni John. Sangkataldiapna ti rearview mirror a pangkitkitaanna no kasano ti kaadayo ti maysa a police car a mangkamkamat kadakuada. Dina masinunuo no kasano a nasurotan daytoy a polis ida. Ngem atapenna nga adda nakaawag iti 911 iti hotel.

Pinapeggesna pay ti luganda. Awan ti rantada nga agpatiliw kadagiti pannakabagi ti linteg. Tinalmeganna ti bosina. Inyangklana tapno agpaigid dagiti lugan a masalaponda. Ngem addada dagiti dina kayat ti aglisi. Pinadungparna ti sikig a kutit dagitoy. Nagiwes-iwes dagitoy ket nagsasaruno ti anit-it ti ligay dagiti lugan a naipreno.

Kinitana manen ti rearview mirror. Sumarsaruno pay laeng ti lugan ti polis. Dina maadaywan. Ken adda payen masabatda a sabali a lugan ti polis. Aggilapgilap dagiti silaw daytoy iti ngato.

Kellaat a nagpakanawan ni John. Umanit-it ti preno ti lugan ti polis a nagrikus met sa simmurot kadakuada. Iti panangisubli ni John iti panagkitana iti turongenda, naglagaw. Dead end ti kalsada! Malaksid iti ruangan a landok a nakakandado, awanen ti sabali a papananda.

“We are trapped,” kinuna ti sarhento.

Saan a nagun-uni ni John. Ad-adda ketdi a pinatarayna ti lugan. Pinadungparna ti gate ket naipallangatok daytoy. Nagderderetsoda. Agginga iti nakagtengda iti sabali manen a dead end. Dan-aw ti matuparda!

Kellaat a nagpreno ni John. Naguyas ti luganda. Dandani naregregda iti danum.

Liningayna ti lugan ti polis. Asidegen daytoy. Pinaatrasna ti SUV. Nagatibuor pay ti goma iti lugan. Inkabiona iti D. Impaddakna ti siliniador. Nakapegpegges ti werret ti goma a nangikusuay iti nabasa pay laeng a daga ket naipunta iti windshield ti lugan ti polis. Napasardeng iti apagapaman ti lugan ti polis. Nagandar ti wiper a nangiwalin kadagiti pitak.

Sipapardas nga immadayo da John. Ngem adda manen sabali a masabatna a lugan ti polis. Pangiliten ti dalan ket saanda a makapagsinnabat. Kinita ni John iti rearview mirror. Umas-asidegen ti lugan ti polis iti likudanna. “That’s it,” kinuna ni Sgt. Ramirez.

Inwekwek ketdi ni John ti siliniador. Nakapegpeggesen ti lugan.

“Agurayka... ania ti rantam?” inlapped ti sarhento ngem kimpet iti no ania ditan a naiggaman iti lugan.

Saan a naguni ni John. Nakaturong dagiti matana iti

lugan ti polis a kasinnabatda. Umas-asidegen daytoy. Saanen a nagkirem. Makaammo ditan no saan nga aglisi ti polis, ta kenkuana, awan ti rantana nga aglisi. Sakbay a nakapagdinnungparda, inawid ti polis ti luganna. Nagderetso ni John. Ket idi kitaenna ti rearview mirror, apagisu nga agdinnungpar dagiti dua a lugan ti polis.

“Do you have a death wish now?” inriaw ti sarhento. “Do we have a choice?” imbales ni John.

“But next time you do that, tell me to get out of the car! Unlike you, I still wanna live...”

“Cool down, sergeant... we are alive...” inkatawa ni John.

Immanges iti nauneg ti sarhento. “Turn left on the next intersection...”

“10-4, sergeant... How far are we?”

“Close... so close...” kinuna ni Sgt. Ramirez. Imbawingna ti panagkitana iti likud sa pinidutna ti M-4. Tininnagna ti magasin daytoy. Kinitana no adda met laeng balana sa insublina met laeng. “I’m ready,” kinunana a kinagidddan ti panaglanitek ti magasin a naisubli iti tsamber ti M-4.

TIJUANA, MEXICO. Matmatmatan ni Melanie ti kargamento a nakaan-annad nga ikarkarga ti innem a katao iti maysa a van. Sipsiputanna ti napusgan a Mehikano a mangbilbilin kadagiti padana met laeng a Mehikano a mangbagbagkat iti kargamento. Agsasao dagitoy iti Espaniol ngem maawatanna amin nga isasaoda. Pasaray ibugkaw ti pannakalider ti panagannadda.

Apaman a nailuganda ti kargamento, imbilin ti pannakalider dagiti Mehikano ti panangayabdan kadagiti kakuyogda a Ukrainian. Rimmuar ti innem a Ukrainian. Ngem sabsabali ti langlangada. Kasla awan man laeng aniamanna kadagitoy daytoy nga aramidenda. Awan ti maitugotanna a panagamakda.

Nagkuretret ti muging ni Melanie. Dina magustuan ti mapaspasamak. Timmangad. Kinitana dagiti CCTV a nakaangkla iti dandani amin a suli ti warehouse. Ammona nga adda mangsisiim kenkuana. Kayatna nga awagan ni Agent Schummer ngem dina kayat a maawisna ti imatang dagiti tao ni Archie Castillano.

Saan a nagbayag, immasideg kenkuana ti pannaka-boss dagiti Mehikano.

“Nakasaganan ti amin, Miss Davis... dagiti tao ken ti kargamento. You guys can go.”

Nagkusipet dagiti mata ni Melanie. “What are you talking about? You are coming with us, right?” kinunana.

Nagwingiwing ti Mehikano. “No, señora... I’ll stay here. But don’t worry, you have six men assisting you plus those Ukrainians...”

Makasuronen ni Melanie. Sangapulo ket dua ti nairanta a mangtulong kenkuana iti daytoy nga operasion tapno makalasatda iti border, ngem nagbalin laengen nga innem. Nanayonan ti pannakaburiborna.

“Go, Miss Davis. You are behind time... 5 minutes behind. Remember, every move we do is timed accordingly. So, start moving...” Inyawat ti Mehikano ti tulbek ti van.

Agtabtabbaaw ti uneg ni Melanie a nangawat iti tulbek. Nagturong iti van. Inyawatna ti tulbek iti lalaki a nakatugaw iti sango ti manibela. “Let’s go,” kinunana.

Pinagandar ti lalaki ti van. Nagturong ni Melanie iti

SUV a mangsaruno iti van. Immabay iti drayber. Imbilinna ti panangsarunoda iti van. Limmingay iti likudna. Tallo dagiti nagtagiarmas a kaduana. Tallo met dagiti adda iti van. Masikoran latta. No napateg ti kargada ken dagiti Ukrainian, apay a daytoy laeng ti puersa nga impaay ni Archie Castillano?

Naparasaw manen ni Melanie iti unegna. Kayatna a kontaken ni Agent Schummer ngem saan a nawaya. Makadlaw la ketdi dagiti kakaduana.

Nagsardengda idi makagtengda iti gate. Adda lima a nagtagiarmas a guardia dita. Awan timtimek dagitoy, linukatanda ti van. Kinitada dagiti tao ken ti naikahon a kargada. Kalpasanna, inrikepda ti ridaw ti van sa inseniasda ti iruruardan.

Kasla nagpanawan a kalsada ti tinurongda. Manmano ti lugan. Nakawaywayada iti kalsada. Ngem nakain-inayad ti panagmaneho ti drayber. Kasla saanda nga agdardaras.

Saanen a nakaibtur ni Melanie. Inruarna ti selponna. Ammona a saan a makaawag ngem nagteks. Imbagana ti lokasionna ken ni Agent Schummer ken ti panagduaduana kadagiti mapaspasamak. Impakaammona pay ti panangi-on-na iti GPS-na ta no adda mapasamak a dakes, ammoda no sadino ti pangsapulanda kenkuana.

Indulinna met laeng selponna. Ngem saan a nagbayag, nagkuyegyeg ti selpon. Inruarna sa binasana ti mensahe: “Be careful...”

Sililimed a kinitana dagiti kakaduana. Aggiinarasaas dagitoy. Ad-adda la ket ngarud a narubroban ti panagatatapna.

Pagam-ammuan, naginayad dagiti luganda. Immuna ti sarsarunuenda a van sa ti SUV a naglugananda. Sakbay a makapagsaludsod, nangngegnan ti wangwang ti lugan dagiti pannakabagi ti linteg. Madamdama pay, napalawlawandan. (Maituloyto)

Itoy A Bilang

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281835761886912

Manila Bulletin Publishing Corp