Adda Koma iti Arubayan Dagitoy Mula a Makaagas

KADAGITI agpangpanggep nga agaramid iti Herbal Garden, isingasing ni Prof. Maura Luisa S. Gabriel, retirado a mannursuro iti Mariano Marcos State University (MMSU)-College of Agriculture, Food, and Sustainable Development (CAFSD) kangrunaanna iti Department of Agricultural Sciences (DAS), dagitoy 10 a kangrunaan nga imulatayo, a kas kunana, inaprobaran ti Department of Health (DOH):

1. Andadasi, napintas nga agas dagiti sakit ti kudil.

2. Paria, napintas kadagiti agsagsagaba iti diabetes.

3. Dangla, nalatak ken nasamay a para uyek, gurigor, ken dadduma pay a sagubanit ti bagi.

4. Bawang, nasamay nga antibiotiko—mabalin a yuper iti diro ti uyokan (honey). Expectorant daytoy.

5. Bayawas, adu kadagiti arubayantayo daytoy.

Antiseptiko, ipaburek a kas pagdayas kadagiti sugat. Kadagiti managling-et nga ubbing nga adda sabali nga angot ti ling-etda, mabalin nga ipaburek ken pagdigosda; pangkontrol iti bakteria.

6. Subusob wenno sambong, nasamay a para kadagiti adda iti UTI-na. Paisbuennaka.

7. Niogniogan, napintas a pagpurga.

8. Tsaang gubat, ipaburek. Dagitay adda problemana iti ngipen, mabalin a pagmulumog.

9. Erbabuena, napait ngem nasayaat kadagiti adda problemana iti panag-mens-na.

10. Pansitpansitan (nailadawan), nasamay kadagiti agsagsagaba iti artritis. Mabalin nga isagana a salad wenno ipaburek iti danum. Inumen ti pakaipaburekanna.—O