Tao, Lugar, Pasamak

GINUNDAWAYAN ni Joshua Miguel Agdigos ti Brgy. Callaguip, Siudad ti Batac ti masansan a dina pannakaruruar iti pagtaenganda gapu iti peggad a mabalin nga ibunga ti pandemia a COVID-19. Imbes nga agpulkok, inaramatna ti orasna iti panangpatan-ayna iti talentona iti arte— ket natakuatanna ti maysa a saan a gagangay a panagparnuay kadagiti obra iti arte—ti panagaramat iti epoxy resin.

“Nabuyak laeng iti video iti internet ti panagaramat iti epoxy resin,” kinunana.

Inkakaubinganna ti panagayatna ti arte ken addaan iti background iti arkitektura, maysa a sanga met laeng ti arte, pinadasna agingga a namasterna ti panagaramat iti daytoy a medium a, kangrunaanna, pinagparnuayna kadagiti buya iti taaw (seascapes) a kas kadagiti dalluyon. Daytoy met laeng pannakasumokna iti panagparnuay iti makunkuna a resin art ti nakaigapuan ti panangbangonna iti bukodna nga art studio, ti Likhang Hilaga Studio. Maysa kadagiti obra ni Joshua ti insalipna iti Obra Maestra, ti kaunaan a reality art show iti Filipinas. Kadagiti nasurok a 3,000 a naisalip, nairaman ti entry ni Joshua iti Top 30. Is-isuna met ti resin artist iti nasao a grupo.

Kuna ni Joshua a babaen ti panangserrekna iti daytoy saan a gagangay a tay-ak ti arte a panagaramat iti resin, bareng mainspiraranna met dagiti dadduma nga artist a mangpadas iti resin a kas medium ken bareng met maawisna ti publiko a mangipateg kadagiti saan a kombensional nga obra iti arte.

Sakbayna, idi 2018, naibaon ni Joshua iti Tokyo, Japan a kas maysa kadagiti delegado iti International Young Innovators Summit. Inyalat met ti grupo a nagkamenganna ti Umuna a Gunggona iti Carabao Painting & Pasagad Dressing, Viva Vigan Binatbatan Festival of the Arts idi 2019.—O