Manila Bulletin

Nangibellengam iti Face Mask-mo?

Ni NOMER E. FERNANDEZ

GAPU iti panagraira ti sakit a COVID-19, ipagpaganetget ti turay kadagiti agwarawara nga umili nga agaramatda iti face mask ken face shield.

Kasapulan ti face mask ken face shield tapno maliklikan ti pannakaiwaras ti bayrus a pakaigapuan ti COVID-19.

No ngamin agbaeng, aguyek ken agsao ti tao a naimpektaran iti bayrus a di nagaramat iti face mask ken face shield, agwaras ti mikrobio a sumrek iti bagi ti sabali a tao babaen ti ngiwat, agong wenno mata.

Tipden ti face mask ti isererrek ti bayrus iti ngiwat ken agong. Tipden met ti face shield ti iseserrek ti bayrus iti ngiwat, agong, ken mata.

Gapu iti pannakaipapilit ti panagaramat dagiti umili iti face mask ken face shield, agparparikut ita ti turay ti immadu a basura.

Sigud a parikut ti pagilian iti kaadu dagiti plastik a basura, ad-adu man itan ti basura nga impaay dagiti nausaren a face mask ken face shield. Kaaduanna kadagitoy ti face mask ti maminsan laeng ti pannakaaramatna. Mayan-anunsio ti nasayaat koma a pannakatratar dagiti naparnuay a basura ngem kasla awan ti pagnaanna. Kasla saan nga ikaskaso dagiti umili.

Kinapudnona, saan laeng a kadagiti bakante a lote ti pakakitkitaan dagiti agkaiwara a naaramat a face mask. Sinakupda payen dagiti bagi ti danum.

Iti saan a maitutop a pannakaibelleng dagitoy a bambanag kadagiti danum a pagkalkalapan, agpeggad dagiti ikan ken dadduma pay a kinabaknang ti taaw.

Mangrugi koma ngarud kadagiti pagtaengan ti maitutop a pannakaibelleng dagiti naaramat a face mask ken face shield.

Saan koma a maitiptipon kadagiti dadduma a basura a naparnuay iti pagtaengan.

Sakbay ngamin iti panagraira ti pandemia a COVID-19, kadagiti laeng klinika ken ospital ti kaaduan a pakaar-aramatan dagiti face mask. Siempre, nasayaat ti panakatratar dagiti naaramat a face mask kadagitoy nga ahensia ti salun-at.

Saan a nanamnama a dumteng daytoy a basura kadagiti pagtaengan. Ipatpatigmaan ti Department of Environment and Natural Resources (DENR) nga adda koma sabali a pangikabilan kadagiti saanen a maaramat a face mask ken face shield iti pagtaengan.

Maikkan pay koma iti marka ti pakaikabilanna no ania dagitoy a bambanag.

Adda pay peggad nga ipaay dagiti naaramaten a face mask kadagiti agal-ala iti basura kadagiti pagtaengan. Daytoy ti rason a saan koma nga iwarawara dagitoy a bambanag no kontaminadoda. No makaala dagiti agibelbelleng iti basura iti bayrus, yawidda met laeng ti mikrobio a mayakar kadagiti kabbalay ken dagiti tattao a a mayasideg kadakuada.

No nasayaat pay ti pannakabalkot ken namarkaan dagiti naaramat a pangsalaknib iti salun-at, matarabay dagiti agibelbeleng iti basura iti pangigabsuonanda kadagiti sanitary landfills.—O

(Tubo ti Solano, Nueva Vizcaya, mangisursuro iti agdama ni NEF iti Linao Elementary School, Schools Division ti Tuguegarao City.)

Nangibellengam Iti Face Mask-mo?

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281947431036608

Manila Bulletin Publishing Corp