Kastoy Gayam Ditoy Alberta

Nangayed a lugar ti Alberta. Ngem mailiw met iti napanawanna a pagilian.

MAYSA kadagiti immuna a nadlawko bayat ti kaaddak iti pagnaedan dagiti dua nga annakko iti amianan a laud ti Siudad ti Edmonton, kabesera ti probinsia ti Alberta, Canada, ti kaadu dagiti balay nga awan aladna. No adda man, nasurot daytoy a pagalagadan dagiti agindeg: No agtaengka iti daytoy a disso, kapilitan nga agaladka met iti kas iti disenio ti kaarrubam. Agpada ti kangato ti aladyo. Awan nakitami nga alad a nabangon iti hollow blocks wenno iti nadisenioan a landok wenno interlinks.

Agpapada met dagiti materiales a nausar kadagiti balay a kaaduanna ti maymaysa met a klase ti ti kayo manipud iti basement agingga ti pagbatayan ti kangatuan a paset ti atep.

Maymaysa met a klase dagiti kayo a naimula iti sango dagiti balay. No adda man maitipon, masapul a saan a dakdakkel wenno nataytayag ngem ti immuna. Kasla nairanta ti mula a pagilasinan, saan a para iti balay no di ketdi para iti maysa a partikular a kalsada.

Agpapada pay ti kalawa ti lote, paraangan ken garahe dagiti agkakaingas a balay.

Adda dagiti garahe a naisina iti likud ti balay. Agsinnango ti agkarruba a “detached garage” nga addaan iti baet a kalsada nga ak-akikid ngem iti sango ti balay. Adda met dagiti naipasirok a garahe iti sango ti balay. Addaan amin dagitoy iti computerized a rikep. No adda ekstra a lugan, maiparking iti igid ti kalsada iti sango ti balay. Dagiti agindeg iti condominium ken townhouse, iti sango ti pasdek ti parkinganda.

Adda latta basement dagiti balay. Ditoy a masarakan dagiti main switches ti koriente, danum, telepono, gas, sewage, heating ken cooling system ti balay. Ditoy payen ti nairanta a paglabaan. Bodega pay, ngem no agkurang ti kuarto a paginanaan, agaramidda a mismo iti ekstra a kuarto iti basement.

Kadagiti amin a klase ti pagindegan, adda latta nairanta nga asideg a pagadalan, malaksid dagiti unibersidad ken kolehio, a mabalin a pagnaen dagiti ubbing. Nalawa ti bangketa wnno pangal dagiti kalsada a nairanta a pagnaan, pag-jogging-an ken pagbisikletaan. Adda pay asideg a mini mart wenno supermarket, kapilia

wenno simbaan, banko, parke, paggasolinaan, ken dadduma pay a komersial a pasdek a mangted iti serbisio wenno kasapulan iti inaldaw dagiti agindeg.

Nalawa ti Edmonton—kunada a mamindose ti kalawa daytoy no idilig iti Siudad ti Baguio. Ket ti met yanna a probinsia ti Alberta, paminduaenna met ti kalawa ti Filipinas. Ala, ket maibatay iti 2019 census, mapan laeng a 4.371 a milion ti populasion ti Alberta a maidilig iti 108.1 a milion a populasion ti Filipinas iti dayta met laeng a panawen.

Kadagupan met dagiti probinsia ken teritorio ti Canada nga amin dagitoy, adda latta masarakam a Filipino, ti Alberta ti maikadua a pagdudupudopan dagiti kadaraan, kas maibatay iti sensus idi 2016. Addaan daytoy iti 166,200 a Filipino; umuna ti Ontario, 311,670; maikatlo ti British Columbia, 145,030.

Masarakan iti laud a paset ti Canada, am-ammo ti Alberta kadagiti nagkaadu nga ikutna a dan-aw, nakaadadu a parke, adu a bambantay a nagkabakiran, ket iti laud, adda dita ti Canadian Rocky Mountain Parks a yan ti nalatak ken daydaywen dagiti turista a Columbia Icefields a nangipasiaran kaniak dagiti annakko.

Manipud iti Edmonton, labsam ti Red Deer iti ipapan iti Columbia Icefield Glacier. Makautoy ti nasurok nga uppat nga oras a biahe ti nasurok nga 400 a kilometro a kaadayo ti Columbia Icefield. Adda kunkunada a Glacier Skywalk ditoy a tumannawag iti 1,200 a kadapan a mangliwengliweng a sirokna. Awan ti nangpadas iti grupomi a limmas-ud iti desarming a viewdeck a kasla naibitin iti law-ang a pangbuyaam iti kinangayed ti tuktok dagiti agdidinnaer ti tayagna a bantay a nakalupkopan iti sumilsilap a yelo.

Simmaleksek ti lamiis iti napuskol nga imengmi idi bumaddekkami iti natangken nga snow, nupay katengngaan ti Septiembre idi, iti sakaanan ti Columbia Icefield Glacier. Adda nairanta nga espesial a shuttle bus a sumang-at iti dissuor a nagbalinen a yelo ken iti bantay a nakalupkopan iti yelo wenno glacier. Simken ti kinasalimetmetmi iti dimin malagip a plete ti espesial a bus malaksid a kasla makautoy ti kinaatiddog ti pila iti paggatangan ti tiket isu a dikamin limmugan iti bus. Insursurotmi lattan ti panagkitami iti immunan a bus nga agin-iniin a sumang-at iti saan pulos marunaw a nasurok a 300 a metro ti kapuskolna a niebe a nangbungon ti bantay iti nagbaetan ti Alberta ken British Columbia nga uray ti kapudotan a tiempo iti kalgaw mapan laeng a lima a metro ti kapuskolna a niebe ti marunaw ngem mapunnuan met iti pito a metro ti kapuskolna a maurnong iti agtinnag a niebe iti tinawen.

Iti maysa a nasapa met a parbangon a tinurongmi ti Maligne Lake, maysa kadagiti ag-600 a dan-aw ti Alberta. Agatiddog iti 22.5 a kilometro nga addaan iti isla nga aw-awaganda iti Spirit Island a madanon laeng babaen ti panaglugan iti para turista a yate, ken adda iti ikub ti Jasper National Park. Dandani maysa nga oras ti biahe ken nabalkot iti angep ti haywey ngem saan nga insardeng ti anakmi ti nagpataray nupay gimminad, nalabit nagsadag iti talek nga ipatpatalged ti GPS ken awan masabatmi a sabali a lugan iti liniami.

Kalpasan ti tallo nga oras a kaaddami iti Maligne Lake, nagtaruskami iti Maligne Canyon. Anian a panangdayawmi iti kinangayed ti sumagmamano a tuktok ti derraas a paggapuan ti kasla saan a

maugotan a panagtapuak dagiti malukotlukot a danum ti dissuor. Makapakuy-os iti lalaem ti tumannawag kadagiti nakaun-uneg a derraas a pagdissuan ti dumaranudor a danum ti dissuor.

Iti sentro ti ili ti Jasper ti nakakitaanmi iti cargo train a no labsen ti agsao ket agtallo a kilometro ti kaatiddogna. Dagiti kakastoy a cargo train ti mangidandanon kadagiti kasapulan dagiti agindeg dagiti agiinnaddayo a nagpupurokan dagiti tattao iti daytoy nakalawlawa a probinsia ti Canada.

Maysa pay a napintas a dan-aw a kunada a rumbeng a pasiarem no addaka iti Alberta ti Banff National Park ti Lake Louise nga aglanglanga nga asul ken berde ti kolor ti danumna a mangrugi nga agyelo iti ngalay ti Nobiembre. Kinapudnona, maysa daytoy kadagiti kalatakan a parke iti sibubukel a Canada.

Tallo a bulan laeng ti kaaddami iti Alberta; napanmi laeng intulnog dagiti dua nga appokomi iti yan ti inada— maysa kadagiti nasurok a 837,000 a Filipino ti puonda a namagbalinen iti Canada a taengda. Ngem kadatao a nairuamen iti biag ti Filipinas, sapsapulenmi met ti kinaimeng ti pinanawanmi a pagilian nga addaan met iti bukodna ken dinto maisukat a kinangayed.—O

(Ti autor: Tubo ti Brgy. 32, Sungadan, Paoay, Ilocos Norte kada Evaristo Abiva Castro ti San Nicolas, I.N. [pimmusayen] ken Feliciana Orcino Blanco ti Paoay, I.N. Naikamang iti Siudad ti Vigan. Addaan iti uppat a naestaduanen nga annak-- tallo ti agindegen iti Canada, maysa iti Southampton, England. Addaan metten iti uppat nga appoko. Nagretiro a DOH representative, Public Health Nurse II, idi 2014.)