Manila Bulletin

Daydi Amang

Amado I. Yoro

Lagip ken ni amang ti gamengko Kattukong, annanga, pinadis, suako Palpal, pala, piko, suyod, arado, sangol, piko Ken ti bakir ti talon iti Caillayan ken Caticran Iti lungog-baba, idiay Pikkan.

Idi maungpotko ti Grado Sais, kinunana: Agtalontan, barok, daytoy ti witiwit,

Daytoy ti palpal, barreta, walawal

Ti salog pukanentanto inton Disiembre Subuamto ti dadapilan, rubrobamto ti aron ti anawang Daras maluto ti bennal, addanto basi Tagapulot, palatipot ken tinipay.

Insurona agpair-ir bulong, bunga ti samak Ukis kariskis naimas rekado ti naingel a basi Kiwaren a nalaing iti bigat ken malem Patayyeken ti kiwar iti kanigid-kanawan Gamona lumnedton, basi daytan.

Annadan, sirok ti balay

Sidiran ti bunton, dimo pagsasawan ida Anay a nalabaga adda dakkel, adda bassit ulona Tagtagari: tawayam ketdi ti basi

Dayta ti sudo, dayta ti bayengyeng

Ni Amang ti ina-ama

Agluto, aginnaw lunglongan Agbugbog pagpakan iti takong, burias Nga agkikinnarab-as

Ta nasapa a simmina ni ina

Ay, kayawko daydi amang, makitkitak Iti talon, dadapilan, pinagayan

Iti kaunasan, iti katabakuan.

--AMADO I. YORO

Itoy A Bilang

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281973200840384

Manila Bulletin Publishing Corp