Manila Bulletin

Awan Kas iti “Face to Face”

Ni ESTELA S. CABARO

GAPU iti idadateng ti pandemia a COVID-19, namalbaliw ti wagas ti panagadal dagiti ubbing. Kaaduanna a nagbalin nga online. Iti panagkunak, duma laeng ti online a wagas ti panagadal dagiti ubbing.

No online, saan a makanaig a personal ti maestra ken dagiti adalanna. Ad-adda nga epektibo ti reaksion ti maestra ken dagiti ubbing no agsasangoda a personal ngem iti birtual a wagas.

No agwaywayas pay nga agadal ti maysa nga ubing iti sango ti kompiuter, nalaka laeng a masinga ken mabalin pay a mayakar-akar iti sabali a topiko ti sangsanguenna a leksion.

No iti pagtaengan ti pangadalan ti ubing kadagiti leksionna, mabalin nga isardesardengna ti panagadalna ken agsadutsadut pay. Kasapulan ti ubing ti ad-adu a disiplina ken panangparegta iti bagi tapno maaddaan iti konsentrasion.

Saan pay ketdi a masigurado no masurotan wenno maipakat met laeng dagiti ubbing dagiti inadalda iti online.

Adda pay dagiti leksion a saan a mabalin nga isuro iti online. Maibilang kadagitoy dagiti leksion iti siensia ken teknolohia. Nasken ti laboratorio wenno mismo a pannakakita ken panangiggem kadagiti materiales kadagitoy a nga asignatura.

Maurnos pay a naimbag dagiti leksion iti face-to-face learning ta adda a sindadaan ti maestra a mangatur ken tumulong iti problema dagiti estudiante.

Ngem gapu iti pandemia, ania ngarud. Kaasi payen dagiti annaktayo nangruna no mabaybay-antayo ida.—O

(Agpapaay ti autor a kas Chief Education Supervisor ti Curriculum Implementation Division, Tuguegarao City Schools Division, Department of Education, Tuguegarao City, Cagayan.)

Awan Kas Iti “face To Face”

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/281994675676864

Manila Bulletin Publishing Corp