2 a Soneto

1. adda kailiak no agkalida man ‘ti pakaidulinan minatay anian adda al-alikutegda, agibulsitoda’t ramramay, ay!

kuskosanda daydiay rurog tapno nalinis a pakaisuysuyatan ‘tay basi’t abayda, atanudko, panaginum sidduker ‘tay awan.

‘diay ramay a pidutenda iti diding malabsanda a balbalay isaluket: kano ‘ton rabii agpatnag patit, ay! ay-ayda pay.

sabasabali la nga agpayso ‘tay ugali, ‘toy puli naka’y-ay-ay.

2. atanudko, pudno man ken saan, magunggongka ‘ti kintayeg no ‘tay makitam ti kaanakan daytay pimmusayen awanen lubongmo. rurogna kalpasan watiwat ti adu a panawen ta nagbalin gitarran notanan agal-allin – kaanakan naiduma a puli.

adda man ‘tay kullayaw ‘ta uneg saanmon nga ipangag pay denggem lattan ‘tay piesan’ prince midnight—daytay laingna adda iti panagpindeg. daytoy ‘tay musika ipan laem adda ‘tay talugading minatay.

--HONOR BLANCO CABIE