Patakder a Panagmula iti Karabasa

NO awan espasio a pangipakarayaman iti karabasa, mabalin nga ipakalatkat iti alad wenno iti pader wenno iti kongkreto a diding. No ipakalatkat ti karabasa, mabalin a mulaan ti espasio iti sabali a nateng imbes a pagkarayamen daytoy.

Mabalin nga aramiden a pagkalatkatan ti barut wenno screen a maipuesto iti sementado a pader.

No dumakkel ti mula a karabasa, igalut ti lanut tapno surotenna ti patakder a pagkalatkatan.

Saanen a nasken pay nga igalut ti lanut no makadakkel ti mula ta agparnuay iti babassit a kutikot a lanut a pagkapetna iti pagkalatkatan.

Kadawyan a makasapul ti karabasa iti nabaknang a daga isu a nasken a maabonuan ken kanayon a masibugan kangrunaanna no dumakdakkel pay laeng.

No ngamin mabaybay-an nga agkaradap ti karabasa, agparnuay iti ramut a pangsagepsepna iti sustansia manipud iti daga.

Saan a mapasamak daytoy no maipakalatkat.

Tapno maliklikan ti pannakaalat-at ti lanut ti karabasa gapu iti nadagsen a bungana, mangigalut iti pantyhose iti pagkalatkatan. Iserrek ti bassit pay a bunga iti maysa kadagiti saka ti panty hose. Mabennatto ti pantyhose kabayatan ti panagdakkel ti bunga.

No saan, rigis wenno iket ti aramiden a pangibitinan iti bunga a kas iti panangiplastar iti pantyhose.

Mabalin ti agpatanor iti maipakalatkat a karabasa kadagiti pagadalan tapno makita dagiti ubbing ken tuladenda kadagiti pagtaenganda.—O

(Mangisursuro ni CVP iti Cagayan National High

School, Tuguegarao City. Agnaed iti Barangay Cataggaman Pardo iti isu met laeng a siudad.)