Manila Bulletin

Idi Un-unana a Panawen

Ni SOLOMON V. GERNACIO

IDI un-unana a panawen, iti pagilian a Tsina, adda nasinged nga aggayyem a babbaro a da Pao ken Ki. Iti maysa nga aldaw, napanunotda ti mapan iti kabakiran. “Nabannogak unay nga aglaklako iti payong ken sagaysay!” kinuna ni Pao. “Kasapulak ti sadiwa nga angin!”

“Uray siak,” kinuna ni Ki. “Adu unay dagiti libro a binasbasak. Kasla bumtak ti ulok. Siguro, masapul a makangngegak iti kanta dagiti tumatayab tapno mainanaanak.”

Napanda ngarud iti kabakiran. Ditoy, nakasarakda iti sangabara a balitok.

“Alaemon, Ki,” kinuna ni Pao iti gayyemna. “Igatangmo iti nayon dagiti librom.”

“Saan, a,” kinuna ni Ki. “Ammok nga ad-adda a kasapulam ti balitok. Iti kasta, manayonan dagiti tagilakom.”

Kasta a kasta ti saritaanda. Awan kadakuada ti mayat a mangtagikua iti balitok. Agpimpinnapilitda a yawid ti maysa kadakuada.

“Ala, bay-anta ngaruden dayta a balitok ditoy, Pao,” kinuna ni Ki idi agangay. “Saan met a balitok ti ginagarata ditoy!”

“Husto ti kinunam, Ki!” inkatawa ni Pao. “Immayta ditoy tapno makainanata. Amang a napatpateg dayta ngem ti sangabara a balitok.”

Intuloyda ti nagna agingga iti nakadanonda iti maysa nga ubbog. Iti asideg ti ubbog, adda dalumpinas a bato. Nadanonda dita a nakaidda ti maysa a lakay a mangnganup.

“Ama,” kinuna ni Ki, “adda nasarakanmi a sangabara a balitok. No kayatyo, inkay alaenen.”

Inlawlawag met ni Pao no yan ti sangabara a balitok.

Kasla nakangngeg a tuleng ti lakay a mangnganup. Iti panunotna, nakunana a kuog dagitoy a babbaro. Agasem ta ipadawatda kenkuana ti kunada a sangabara a balitok! No pudno daytoy, saanton nga umay aganup iti daytoy a kabakiran. Mapanton iti siudad tapno mapadasanna met ti agbiag a nabaknang.

Apaman a nakapanaw ti lakay, simmublat met a nagidda dagiti aggayyem iti dalumpinas a bato ket inim-imasda a dinengngeg ti karasakas ti danum ti ubbog.

Idi mailibayda koman, nakigtotda iti makapungtot a timek ti lakay. “Inallilawdak! Kayatyo la a mabukodan daytoy a dalumpinas a bato isu nga imbagayo nga adda sangabara a balitok!” “Agpayso ti kinunami, ama!” kinuna ni Pao.

“Maysa a karasaen ti adda iti disso a kinunayo. Tinagbatko. Mapanyo kitaen tapno mamatikayo!” kinuna ti lakay a makapungtot unay.

Masmasdaaw, pimmanaw dagiti aggayyem ket napanda iti nakasarakanda iti sangabara a balitok. Awan met natay a karasaen a nadanonda. Ketdi, dua a bara a balitok ti adda ditoy!

“No kasta, pinaraburannata dagiti engkantada gapu iti kinasayaatmo a gayyem!” kinuna ni Pao ken ni Ki.

“Gapu iti daytoy, addan igatangko iti meriendata!” kinuna met ni Ki nga agkatkatawa.—O

Itoy A Bilang

tl

2021-10-16T07:00:00.0000000Z

2021-10-16T07:00:00.0000000Z

https://manilabulletin.pressreader.com/article/282050510251712

Manila Bulletin Publishing Corp