6 a Daniw

1. Ulep

Naulimek nga isla ti biag Agas ti nabannog a takiag Mangsilo iti gita ti lawag Mangpedped iti alimbasag Tapno tagtagainep iti agpatnag Bareng isut’ makasungbat.

2. Gurruod

Nagtigerger dagiti muyong Naawan kappia dagiti bulong Nagsalasalada a kasla mauyong Nanasnas pudot dagiti sabong Nariing ti agin-inana a barukong Iti daytoy a kabiog ti lubong.

3. Kimat

Idi nagsuek dagiti gil-ayab Nagapon dagiti tumatayab Mangnamnama iti ling-et a naapgad Iti uray danum a nalibeg

A kellaat a mangbiag

Ubbog ti pigsa ken balikas.

4. Tudo

Nasungbatanen dagiti burburtia Napaksiaten dagiti gita Daytoy ti kabaelanna Ti nadursok nalamiis nga agua A kasingin ti parmata

Ken iti naingpis nga ostia.

5. Layus

Nauyong daytoy nga agayat Nakarkaro no agarasaas Bettakenna uray ti batibat Nga agduldulin iti derraas Wenno ti kabutbuteng a bakras Ti linnaay ken apres.

6. Daga

Biagen ti sipsipat

No mausar dagiti alog

Ken kari a saan mapugsat No magango dagiti bittaog Panangidaton daytoy iti surat Iti dulang ti bituen a nakabatog.