Panangimaton iti Pagtaengan

KADAWYAN nga addaan ti repriheradora iti drip pan wenno bassit a plastik a kahon a mangtaya iti likido nga agtedted wenno matunaw a yelo iti uneg ti ref.

Adu ti di mangikaskaso iti daytoy ket baybayanda lattan nga agmagmaga. Wenno saan, dida ammo ti aramidenda isu a baybay-anda lattan agingga iti saanen a mabalin nga usaren ti repriheradora.

Adda man nabatbati a likido wenno nagmagmaga iti daytoy a pagtaya, nasken a madalusan iti tunggal dua agingga iti tallo a bulan.

Maurnong ti mikrobio no di madaldalusan ti pagtaya a pakaparnuayan pay ti di nasayaat nga angot iti lugar a nakaipuestuan ti repriheradora.

Innawan ti pagtaya iti danum ken sabon. No adda bettak wenno lussok ti pagtaya, sukatan a dagus tapno di agayus ti tedted iti suelo.

Amirisen pay ti abut a pagruaran ti danum (drainage hole) no adda rugit wenno dutdot ti taraken a naiselsel. Iraman nga ikkaten dagitoy.

Kasta met a nasken a madalusan ti gasket wenno ti goma iti rikep (door seal) ti repriheradora iti tunggal dua agingga iti tallo a bulan. No madaldalusan ti gasket, maliklikan ti panagsawaw ti lamiis manipud iti uneg ti ref.

Saan pay a mamantener ti maitutop a kalamiis iti uneg ti repriheradora no agsawaw malaksid iti nayon a gastos iti koriente.

Agaramat iti aspiradora (vacuum cleaner) a pangikkat kadagiti naiselselsel a rugit iti gasket. Agaramat iti sepilio ti ngipen ken danum a nakanawan iti sabon ken suka a pangdalus kadagiti suli ti gasket iti aglawlaw ti rikep ti repriheradora. Punasan pay ti gasket iti petroleum jelly (adda kastoy a magatang kadagiti botika) tapno bumayag daytoy. Kitaen pay no adda bettak wenno nalkab a paset ti gasket.

Dagitoy pay ti pakaigapuan ti panagsawaw ti ref. Pasukatan a dagus no mapaliiw daytoy a parikut.

Tapno maammuan no nairut ti kapet ti goma ti gasket, mangilipit iti rikep iti papel de banko wenno kasta met laeng ti kaingpisna a papel. Inayaden a guyoden ti papel a linipit ti rikep. No nalukay ti papel a guyoden, panawenen tapno pasukatan ti gasket.

Suroten met laeng dagiti addang iti panangdalus iti gasket ti repriheradora iti panangdalus iti gasket ti freezer.—O