Ay, Samrid!

Saan laeng a mula ti perhuisioenna; pati tao…

SAAN laeng a nabudo; nadawel pay ti igges a samrid. Kas iti igges nga arabas, pangen met nga umatake daytoy a peste ket saanda laeng a dadaelen ti bulong dagiti mula ngem iramanda pay dagiti nalukneng a sanga dagiti kayo isu nga in-inut a matay ken magango dagitoy.

Kumapsut ti resistensia ti mula nga atakaren ti samrid isu nga agbalin daytoy nga arsagid iti sakit nga isangbay dagiti buot ken bakteria.

Gagangay nga atakaren ti pangen dagiti samrid dagiti kayo kadagiti arubayan ken parke a magustuan a paglinongan dagiti tattao. Dagiti agtinnag ken aglupos a dutdotda ti gapuna a mabuduan dagiti tattao ken ayup a pagdissuanda.

Naidumduma ti saguday dagiti nataengan a samrid ta nupay adda payakda, saanda met unay a makatayab (kitaen ti ladawan). Daddadakkel dagiti nataengan a babbai a samrid ngem dagiti lallaki. Alisto laeng a malasin ti nataengan a samrid iti grupo dagiti dadduma a peste ta adda nagsisilpo a sinan-letra V a makita iti payak daytoy. Medio nalidem met ti kolor dagiti igges nga umabot iti agarup 1 agingga iti 1.5 a pulgada ti kaatiddogna.

Umab-abot iti makatawen ti siklo ti panagbiag ti peste a mangrugi iti panawen ti panagitlog agingga iti panagtaeng ti igges. Agarup nasurok a 1,000 ti mayitlog ti babai a samrid kadagiti suli dagiti sanga dagiti kayo