Ading Kosinera

(Maudi iti 2 a Paset)

Dagiti Kasapulan: Natangkenan a niog Blender wenno igad Cheesecloth Sumagmamano a malukong Sumagmamano a garrapon

Panangisagana:

1. Mangpili iti natangkenan a niog (natangkenan tapno ad-adu ti maala a lanana).

2. Beltaken, karusen wenno laplapen ti lasagna. Ikkaten ti kalupkop wenno ti brown a kimpet iti daytoy. Matedda ti puraw a lasagna.

3. Iw-iwaen iti babassit wenno pakubiko. Maiw-iwa tapno napimpintas ti pannakai-blender-na. No awan ti blender, mabalin met nga igaden daytoy ngem siguraduen a saan a mainayon ti brown a kalupkopna.

4. Ipan ti naiw-iwa a niog iti blender. Siguraduen a saan a mapno ti blender tapno saan nga aglipias.

5. Nayonan iti danum ti lasag ti niog iti kaadu a 5:1 (maysa a tasa a danum ti lima a tasa a lasag ti niog). Agaramat iti distilled wenno nadalus a danum. Saan nga agaramat ti danum nga aggapu iti bubon.

6. I-blender iti high speed. Pespesen ti getta ti niog kalpasan ti pannakai-blender-na. No igad ti inaramat, kas iti nai-blender, nayonan latta met iti danum iti kaadu a 5:1.

7. No napespesen, ikabil iti refrigerator iti 2 agingga’t 3 nga oras. Apay nga ikabil iti refrigerator? Tapno tumangken ti getta ti niog ket al-alisto a maisina ti gettana iti danum. Maporma ti 2 a genned. Agsina ti danum ken ti tumangken a getta ti niog. Maawagan daytoy iti cream milk mixture.

8. Kutsaraen/lekkaben ti cream milk mixture. Yakar iti sabali a garrapon. Kaluban ti garrapon. Kalpasanna, parabawan iti lupot wenno tualia para iti pannakaferment-na (maburo). Idulin wenno bay-an nga maburo iti 1-2 nga aldaw.

9. Kalpasan ti pannakaburona (fermentation), agbalinen a curd wenno ladek. No isina ti curd wenno ladek, nalukneng daytoy isu a kasapulan nga idulin manen iti refrigerator tapno agbalin a solido.

10. Maporma manen dagiti genned bayat ti kaaddana iti refrigerator. No mairuar iti refrigerator, makita a nagsina ti danum ken curd. Akimbaba ti danum ken akinngato ti curd. Adda pay la danum a maikkat ta saan amin a danum ket naikkat iti immuna a prosesona.

11. Kutsaraen/lekkaben manen ti curd. Yakar manen iti sabali a garrapon. No naala aminen, uliten ti fermentation. Kas iti fermentation process iti immuna, kaluban met laeng iti lupot wenno tualia. Ikabil iti kabinet iti 1 agingga’t 2 nga aldaw. Saan a sagiden.

12. Kalpasan ti 2 nga aldaw a fermentation, maisinan ‘diay lana iti curd. Maporma ti uppat a genned.

•Akimbaba wenno umuna a genned, ared-ed wenno solid particles

•Maikadua wenno sumaruno a genned, danum

•Maikatlo, curd, wenno ladek

•Maikapat wenno akinrabaw ti lana. Naglanan ‘diay ladek. Isu ti alaen. Isina ti lana manipud iti curd, sagaten ta adda latta sumurot nga ared-edna. Ipaubos a nasayaat agingga nga awanen ti agtedted.

13. Kalpasan ti pannakasagatna ken awanen ti agtedted manipud iti cheesecloth wenno lupot a pagsagatan, ikabil ti garrapon iti refrigerator.

14. Tumangken ‘diay lana wenno ti makuna a VCO. Maporma manen ti 2 a genned, adda pay laeng nabatbati a danumna. Umuna a genned ti danum ken ti maikadua, isunton ti VCO.

15. Kutsaraen manen ti timmangken a lana ken yakar iti nadalus a garrapon. Kaluban, ken mabalinen nga idulin. No maidulin iti kabinet, agbalinen a likido. Isun ti maawagan iti VCO.

No amirisen, nalaka laeng a suroten ti proseso ti panagaramid iti VCO.

Mabalin nga aramaten ti VCO iti buok, kudil, wenno maitipon iti kanentayo ta napintas iti puso, mangpangato iti good cholesterol, mangpasayaat iti metabolismo ken gapu iti nangato nga antioxidant property-na, mabalin nga aramaten a pangsalaknib iti bagitayo iti COVID-19.

Kasano ti kaadu ti maaramid a VCO iti kada niog nga aramaten? Maibasar iti padas ni Prof. Rosalie P. Agcaoili, iti kada lima a bukel ti niog, makaala iti 100 ml a VCO. Siguraduen a natangkenan ti niog tapno ad-adu ti maala a VCO. Ni Propesora Agcaoili, mannursuro manipud iti College of Engineeering (COE), Chemical Engineering Department ti MMSU, ti nangisuro kadatayo, babaen ti School-on-the Air, iti panagaramid iti VCO.—O