Tips

KASANO A PUKAWEM TI BUTENGMO?

Adda kinapudnona ‘tay kunada a ti kasamayan a pangpukaw iti buteng ket isu ti panangsangom iti dayta a pagbutngam. Iti maysa nga eksperimento a nakipartisiparan ti dua a grupo dagiti babbai (maysa a grupo ti mabuteng iti lawwalawwa; maysa a grupo ti saan), naipakita kadakuada dagiti ladawan dagiti tarantula iti arigna apagkirem laeng. Nakita iti brain scans dagiti babbai a mabuteng iti tarantula nga iti paset ti utekda a mangproseso iti buteng, nagbalin nga aktibo iti laksid nga arigna dida malagip ti langa dagiti nakitada a tarantula. Napaneknekan pay nga ad-adda pay ketdi a nagbalin nga aktibo daytoy a paset ti utekda no idilig iti mismo a pannakakitada iti sibibiag a tarantula. Kinuna dagiti nagsukisok a daytoy apagbiit a panangsango iti banag a kabuteng unay, mabalin nga ad-adda pay nga epektibo ngem iti tradisional a therapy. (Ladawan: https://www. nwf.org)

NASAYAAT KADI TI TUBBOG TI PRUTAS?

Maibatay iti maysa a panagsukisok nga impablaak ti Journal of the American College of Cardiology, nupay makatulong ti yiinum iti tubbog ti prutas dagiti tattao a makurkurangan kadagiti bitamina ken mineral gapu ta agpakarigatda a mangan kadagiti prutas ken nateng, kuna dagiti eksperto nga awan kas iti mangan iti sibubukel wenno di naproseso a prutas (agraman nateng). Apay? Gapu ta ti tubbog ti prutas, agkurang iti napateg a ramen—ti dietary fiber a makatulong iti bagi iti nasayaat a pannakatunaw ti makan ken mangiliklik iti bagi kadagiti sakit a kas iti diabetes, sakit ti puso, ken nalabes a kinalukmeg. (Ladawan: https://www.dentistrywithaheart.com)

NALAKA A MAWAW. Maysa kadagiti pagilasinan ti type 2 diabetes ket isu ti nalaka a pannakawaw. Ket gagangay pay a ti paggugusto ti tao nga addaan iti kastoy a rikriknaen, isu ti yiinumna kadagiti fruit juice wenno soft drinks—a mangipaay met iti bagina iti sobra a glucose. Ket no adu unay ti glucose iti dara, bilinen met ti utek ti bagi a yisbona daytoy (daytoy ti gapuna nga agkaraisbo ti addaan type 2 diabetes). Di agbayad, mawaw manen. Kasta a kasta. Ibalbalakad dagiti doktor a nasaysayaat no ‘tay tao nga agsagsagaba iti type 2 diabetes (wenno ti uray asino man), nasaysayaat nga amang a sanayenna ti bagina nga uminum laengen iti danum, ket daytoy ti inumenna a saan ketdi a dagiti namnamsek iti asukar. (Ladawan: http://www.goodchoicesgoodlife.org)