Ammuem Pay Dagitoy

LAOAG CITY – Agsagsagana ti probinsia ti Ilocos Norte a mangbiag iti lokal nga industria ti kawayan babaen ti pannakadutok dagiti para bantay kadagiti kawayan nga agsueldo iti inaldaw.

Iti maysa nga innuman iti daytoy Biernes, Septiembre 17, kinuna ni Provincial Agriculturist Norma Lagmay a naikeddengdan ti Siudad ti Batac ken dagiti ili ti Paoay, Currimao, ken Sarrat, a natural a pagtubuan dagiti kawayan, kas pamadasan a lugar a para iti proyekto.

Naponduan babaen ti agtultuloy a “cash for work” a programa ti turay ti probinsia, paset ti proyekto dagiti indibidual a natudingan a mangaywan iti di nakurkurang ngem 10 a rimmuong a kawayan iti asideg dagiti pagtaenganda a pakasuelduanda iti PHP250 iti inaldaw.

Malaksid iti daytoy, masanay pay dagiti benepisiario nga agaramid iti bamboo nursery a pagalaanto kadagiti imula iti ad-adu pay a kawayan.

Kinuna ni Lagmay a nayon a pagganaran daytoy dagiti benepisiario ta gatangen ti turay ti probinsia ti ania man a patubo a maparnuay dagitoy ken maimula iti nadumaduma a paset ti probinsia, nangruna kadagiti nalaka a margaay a lugar wenno iti asideg ti abaga ti karayan tapno maliklikan ti panaggidday ti daga.

Masansan a saan nga ikankano dagiti mannalon dagiti kawayan iti laksid ti kinaadu ti pakausaran dagitoy.

Pagimbaganna, iti daytoy a tawen, napinget ti Ilocos Norte a mangbiag iti industria ti kawayan babaen ti panangpabileg kadagiti lokal a komunidad a mangaywan iti kinawayanan dagitoy.

Nakiasmang ti gobierno probinsial iti Mariano Marcos State University, nga eksperto iti panagmula ken panagproseso iti kawayan, tapno masanay ti ad-adu pay a mannalon a mangaywan kadagiti kinawayanan bayat ti panagpatanorda kadagiti baro a kita ti kawayan tapno ad-adda pay a mapaadu ken mapasayaat ti apit.

Itay Septiembre 9, nayalnag ti baro a programa a naawagan iti “Kakawayanak Aywanak” iti Barangay Camandingan, Batac City tapno mapabiag ti industria ti kawayan ta manamnama a makatulong iti pagbiagan dagiti benepisiario ken maikabassit ti epekto ti climate change.

Kinuna ni Prof. Charlie Batin, eksperto iti panagmula iti kawayan iti Mariano Marcos State University, a mabalin nga isubli ti nasalun-at a kasasaad dagiti duduogan a rimmuong dagiti kawayan babaen ti panangdalus ken panangited iti umisu a ganagan kadagitoy.

Kinuna ni Batin a dagiti awan serbina a rimmuong dagiti kawayan, mabalin manen a mapagnumaran no la ketdi taripatuen dagitoy dagiti mannalon.

Kinuna pay ni Batin a makapasayaat iti nakaparsuaan ti kawayan. Napartak a dumakkel ken umadu uray kadagiti teppang ti karayan ken mangparnuay dagitoy iti nawalat a rimmuong.

Kas maysa a klase ti mula a para iti reforestation, naserbi daytoy kontra iti panaggidday ti daga, ken dakkel ti maipaayna a maganar kadagiti agmulmula ken kadagiti negosiante. (LEILANIE ADRIANO)

(Immuna a naipaskil iti bannawag.ph, ti opisial a website ti Bannawag.)