Nalaing a Tumulong ni Angel

WEN, nalaing a tumulong—ken nasingpet ni Angel Locsin.

Dayta ti pasingkedan ni Lester Llansang.

Kuna ni Lester, bayat ti panagpapaayna a singer iti maysa a bar a kukua ni Angel, iti daydi tiempo nga aganak ni misisna ket awan ti nairana a badietna, ni Angel ti nangyabaga iti amin.

Kaano a nakapagbayadka? sinaludsod ni Ogie Diaz ken ni Lester.

Kuna ni Lester a saanen a siningir pay ni Angel. Basta dinawatna lattan ken ni Lester nga agtokar latta iti bar and restaurant daytoy a Fuel and Up iti Quezon City.

* * *

Napalalo ti ragsak ni Lovi Poe iti yaakarna iti Kapamilya Network.

Wen, ta ti aktor nga inar-arapaapna a makadua iti trabaho, isu ti makaparehana iti umuna a proyektona iti nasao a network.

Wen, ni Piolo Pascual ti kapareha ni Lovi iti teleserye a “Flower of Evil.”

* * *

Iti angaw ni Robi Domingo a nagteks ni Coco Martin a mangsalsaludsod no kaano a mabalinen nga agparang ni Lovi iti “FPJ’s Ang Probinsyano,” kuna ni Lovi a pakaidayawanna ti mairaman iti proyekto a mainaig iti daydi amana.

Ngem no bilang man ta adda gundaway a pagpilienda ni Lovi no ania a proyekto a mainaig iti amana ti kayatna aramiden, dinakamatna ti “Ang Panday” a ni-revive met laeng ni Coco idi 2017.

Iti biang ketdi ni Lovi, kayatna ti agakem a Panday, maysa a babai a Panday.

Innayon ni Lovi nga inkakaubinganna nga arapaap ti nasao nga akem.

Gapu ta adda metten iti Kapamilya Network, adda iti Star Cinema no pagmataenda daytoy nga arapaap ni Lovi.—O