Nagnakemen ni Cristine

AD-ADDA a naam-ammo ni Cristine Reyes nga arsagid ken managtutop, nangruna no kasta a makiuman iti prensa. Abbaba ti sungbatna ken no kabaelanna, dina sungbatan dagiti saludsod. Kasta met nga addada sumagmamano a nakasusikna a tagashowbiz.

Ngem idi dayta.

Ta iti tawenna a 32, ken addaanen iti maysa nga anak, makunana a kabaelannan a kontrolen ti riknana. Naamirisna a saan met a nasken a kankanayon nga ibilangna ti sabali a tattao a kasusik.

Karaip met ti panagtaeng ni Cristine, umisu itan kenkuana dagiti akem a nataengan. Kas iti adaptasion iti Filipinas ti Koreanobela nga “Encounter” a maipapan iti agayan-ayat a natataeng ti babai. Ni Diego Loyzaga ti kaparehana iti daytoy.

Innayon ni Cristine a kalpasan ti panangabakna iti internasional a pammadayawbabaen ti pelikula nga “Untrue,” pilienna metten dagiti akemna iti telebision ken pelikula. Kunana a nayo n a karit ti pammadayaw tapno ad-adda pay a pasayaatenna ti trabaho wenno aktingna.

Kabayatanna, adda naipadamag nga addan baro a nobio ni Cristine. Adda nakakita kenkuana a nakipag-date idiay Makati iti maysa nga aglanglanga nga AmericanIndian. Segun iti nakakita, adda dagiti pagilasinan nga adda relasion da Cristine ken ti lalaki.

Sabagay, awan met dakesna ta duan a tawen manipud pinasingkedan ni Cristine a nagsinadan ken Ali Khatibi nga asawana ken ama ti anakna.

Kalpasan ti panagsinada ken Ali, awan ti impaspaskil ni Cristine maipapan iti daytoy kadagiti social media account-na. Ad-adda nga impaspaskilna ti maipapan kadakuada nga agina.—O