Matuloy Met Laengen ti Panagsubli ni Lloydie iti Showbiz

ITI pannakasurat daytoy, damag nga agpirma met laengen ni John Lloyd Cruz iti GMA-7.

Kayatna a sawen, nailut met laengen ti agsumbangir a partido ti isyu maipapan iti talent fee.

Damag ketdi a pelikula ti umuna a proyekto ni Lloydie iti panagsublin iti showbiz.

Kuna dagiti asideg iti aktor, nasayaat ti panagsubli ni Lloydie ta adda met a talaga inalatna a kas aktor.

* * *

Iti panagsubli ni Piolo Pascual akas Kapamilya ken iti panagbalin met laengen ni Lovi Poe a kas Kapamilya kalpasan ti nasurok a sangadekada iti Kapuso Network, nagarbo ti inted ti Kapamilya Network kadakuada a proyekto—isu ti panagparehada iti bersion ti Filipinas iti Koreano a teleserye a “Flower of Evil.”

Agarup tallo a tawen met ti napalabas sa nagaramid manen iti teleserye ni Piolo. Naudi ti “Since I Found You” a nagkakaduaanda kada JC de Vera, Alessandra de Rossi ken Arci Muñoz.

Ita, nakasaganan para iti lock in taping para iti “Flower of Evil” a kaduana ni Lovi.—O