Publication:

Bannawag - 2021-11-16

Data:

Biag ni Ilokano

CONTENTS

Ni JIM P. DOMINGO

14 Biag ni Ilokano SAKBAY ti panaglatak dagiti digital a kamera ken pannakaaramat ti selpon a pangala iti retrato, adda dagiti estudio a pagparetratuan ken agimprenta iti ladawan. Mabalin met nga awisen ti retratista iti pakaangayan ti pasken tapno itugotna ti kamera a pangalana iti ladawan. Manmano kadagidi a tiempo dagiti addaan iti kamera isu a kaaduan nga iti laeng estudio ti papanan no kayat ti maaddaan iti ladawan. Kadawyan a kadagiti laeng poblasion ken sentro ti populasion ti pakasarakan kadagitoy nga estudio. Maysa a siled ti estudio nga addaan iti telon a nakaipintaan ti maysa a buya nga agbalin a pondo (background) ti agparetrato. Mabalin a maysa a napintas a hardin, dissuor wenno trono iti uneg ti maysa a palasio ti pondo. No kayat ti agparetrato iti nagarbo a kawes wenno kawes a pagturpos, adda mabalin nga ipabulod ti retratista. Mabalin pay iti bumulod iti relo a maisarang iti retratista no alaenna ti ladawan. Mabalin met a maala ti ladawan iti ruar ti studio babaen iti kamera a naimontar iti tripode (tripod). Maabungotan ti kamera iti nangisit a tela a karaman ti retratista a mangsirip iti maretrato. Monokromo wenno nangisit ken puraw ti mapataud a ladawan a maproseso iti uneg ti laboratorio babaen dagiti nagduduma a kemikal ken prinsipio ti lawag. Innem a kopia ti kabassitan nga yorder iti retrato ken nasken pay a mangipauna ti pagbayad. Kaaduanna a personal a ladawan ti maiprinta a maretrato. Manmano dagiti solo a buya nga awan nairaman a tao iti ladawan. Napateg kadagidi a panawen ti kaadda ti retrato a kas pakalaglagipan kadagiti napateg a pasken a kas iti panagkasangay, panagkallaysa, wenno anibersario. Patugotan dagiti ladawan ti personal a pakasaritaan ti biag ti maysa a tao, pamilia, wenno komunidad ken dagiti napapateg a lugar ken lokasion a napnapanan ti maysa a tao. No adda kakabagian wenno gagayyem iti adayo, maipaw-it ti ladawan babaen ti koreo. Maisurat met ti naindaniwan a mensahe iti likud ti ladawan. No awan ti mensahe a naisurat iti likud ti ladawan, maipapan a nailibas a naala iti akinretrato. Napateg dagiti kadaanan a ladawan ta adu ti agkunkuna a daytoy ti umuna kadagiti isalbar no mauram ti balay a nakaidulinnna. Maibilbilang ngamin daytoy a maysa a napateg a tawid a maipatawid met kadagiti ubbing. Naparpardas ti panangbiag dagiti retrato iti napalabas ngem ti panangipalawag babaen ti balikas. No buyaen dagiti ladawan, maipalagip ti napalabas ken dagiti adal a naipaay dayta a panawen iti biag ti tunggal tao.—O

Images:

© PressReader. All rights reserved.