Publication:

Bannawag - 2021-11-16

Data:

Dagiti Sugat ti Daga (3) Joel B. Manuel

CONTENTS

Nobela ni JOEL B. MANUEL

16 Dagiti Sugat ti Daga (3) Joel B. Manuel Ti Napalabas: Nagbartek ni Bileg Aurelio gapu iti pannakapaserra ti Ylocos Minerals, ti kangrunaan a mangbibiag iti Razon-Colorado Investment Group a pagpapaayanna a kas CEO. Bayat ti panangur-urayna kadagiti kamitingna a kameng ti board ti kompania, inruarna ti maysa nga album a nakatiponan dagiti ladawan a nangipalagip kenkuana iti panangpanawna iti ulitegna ken panagpaayna a pahinante agingga iti pannakadanonna iti Tanap ket timmulong iti maysa a mannalon. Iti miting, napagnunumuanda a tapno masalbar ti kompaniada, mangpatakderda iti bukodda a Presidente iti masungad nge eleksion. Kalpasan ti miting immawag ni Riz. Nasemsem ni Bileg Aurelio ta impakammo ti asawana nga agbiahe ket agusar pay iti maarkila nga eroplano. (Maika-3 a Paset) “TUMAYAB manen ti tallo gasut a ribu a pisos,” insennaay ni Bileg Aurelio. “Airline parking fee. Ket iti kangitingitan ti krisis ti kompania?” “Saanmo a kapungpungtot ni Manang Riz, Gel,” kinuna ni Keith. “Ken saan pay a kanibusanan ti amin. Agungarto ti kompaniatayo.” “Sabagay, asinoak koma a manglapped kadagiti Razon?” Nagsennaay ni Bileg Aurelio. “Kadaananda a pirak, e. Naisagpawak iti kadaanan a pirak.” “Ngem ammok nga iti panangtimonmo iti kompaniada, nagtriplen ti kuartada.” Apagisu a makasublida idi sumrek da Atty. Quidez ken dagiti tattaona. Imbaltog ni Quidez ti nabengbeng a dokumento a pirmaan ni Bileg Aurelio. Ti apela ti Ylocos Minerals iti opisina ti Presidente. Tinulongan dagiti abogado a nangukag kadagiti panid ni Bileg Aurelio. “Saankon a basaen, attorney,” kinuna ti CEO. “Ideretsom ken ni Valite.” Ni Emerson Valite ti executive secretary ti Presidente. Alas tres media idi maawat ti opisina ni Bileg Aurelio ti awag manipud iti US—manipud iti Palo Alto, California a headquarters ti Clean Mobility Coalition, ti grupo dagiti tattao iti industria dagiti electric cars. Sinegseggaan ni Bileg Aurelio daytoy nga awag kadagiti kaaliadoda iti US. Adda aripapa ni Zolen Fordham, ti presidente ti koalision ken presidente ti Fordham EVs, iti bangir a telepono. “Are you sure we could weather this, Mr. Colorado?” natibong ti boses ti Amerikano. “I am exploring ways out, Mr. Fordham,” insungbat ni Bileg Aurelio. “How could we be of help?” “I have a thought in mind, sir… Some evil force.” “Okay, what do you want? Grease? Pressures?” “I think we have to go against our President, Mr. Fordham.” Nagsung-ab ti kasarsarita ni Bileg Aurelio. “Our president is due for reelection next year, Mr. Fordham.” “Are you sure you want to take him down?” imbaba ti Amerikano ti bosesna. Saan nga ammo ni Bileg Aurelio no ulitenna ti sinaona wenno saan. “He must be out by June, Mr. Fordham.” “I like the idea.” Nagkatawa iti nalag-an ni Mr. Fordham. “But you must be sure of our horse, Mr. Colorado.” “We would select carefully, sir.” Inrisiris ni Bileg Aurelio ti kanawan a dakulapna iti awanan iming a timidna. “You must remember that cobalt is the upcoming mineral, Mr. Colorado,” kinuna ti Amerikano. “Your country has the potential of 25% of the world’s supply. And if possible, we want to avoid the Democratic Republic of Congo. We could not afford to stall cobalt production now.” “So I see it,” insungbat ni Bileg Aurelio. “We are trying to eliminate cobalt but there seems to be remedy as yet. If you have to replace your president, then you could count us on that, Mr. Colorado.” “Thank you, Mr. Fordham. Thank you, sir!” Malaksid iti kobre ken nikel a natakuatanda iti kabambantayan ti Caantengan iti inaramidda nga exploration sumagmamano a tawen ti napalabas, nakasarakda pay kadagiti bukod nga ore ti cobalt. Iti panangtasar dagiti Amerikano a consultant-da, dakkel ti deposito ti cobalt ket kabaelanna nga itden ti 20 a porsiento agingga iti 25 a porsiento iti kasapulan ti sangalubongan. Nabaknang met iti ramen a cobalt kadagiti ore ti kobre-nikel nga adda iti concession-da. No mairaman dagitoy, mabalin nga umabot iti 30 a porsiento ti kabaelan ti Poro Ylocos nga i-supply. Nalatak ti Democratic Republic of the Congo a kas mangmangted iti 60 a porsiento ti cobalt iti sangalubongan. Ngem no mabalin, saan a kayat dagiti lumaud a pagilian ti agangkat agsipud iti saan a nainkalintegan nga aramid dagiti minero iti dayta a pagilian, pakairaman ti panangaramatda kadagiti ubbing kadagiti pagminasan ken pagprosesuan iti cobalt. AGALAS tres media idi agawid ni Bileg Aurelio. Kasla namalmalo ti bagina. Pampanunotenna ti agrelaks met uray apagbassit. Apay a saan nga idiay Buraan? Biernes ita. Binilinna ni Keith nga urnosen amin daytoy dagiti pirmaanna a dokumento iti lamisaanna. “Sorrento Hills, ading,” imbilin ni Bileg Aurelio ken ni Thor. Simmina ti 2020 Ford Everest Max iti Rueda Drive ket nagpaabagatan. Kalpasan dagiti agkakatayag a pasdek ken shopping mall iti Singson District, nalabsandan dagiti balbalay dagiti milionario. Adda kadagiti katurturodan iti abagatan ti mansionna ditoy Metro Cadaclan. Madamdama pay, sumangsang-atdan kadagiti naberde a turturod a nagsaadan dagiti mansion nga addaan kadagiti agkakalawa a lote. Adda iti surmot iti abagatan ti mansionna. Matannawagan ti pakabuklan ti siudad ken iti laud, ti nagsinanmalukong a baybay a paset ti Cadaclan Bay a digdigosen ti lakayen nga init iti pumirak a lawag. Napattopattokan kadagiti bapor ti taaw. Iti bangirna iti abagatan, adda dita ti marina a nakaidakniran ti yatena. “Mangalaka iti badom nga umanay iti tallo nga aldaw. Para outdoor ken jungle,” imbilin ni Bileg Aurelio ken ni Thor apaman a nakastrek ti lugan iti compound. “Awisek dagiti ubbing. Masapul ti bagik ti inana. Intayo idiay isla.” Rimmuar iti lugan. Sinabat ti nalamiis nga angin nga aggapu iti baybay a mangap-apiras kadagiti katurturodan. Rimmuar ni Nana Pacing apaman a nadlawna ti naamo a panagtaul ni Kibol, ti dakkel ken interamente a kayumanggi nga asona. “Addan dagiti ubbing, nana?” dinamagna. Pinasutna ti sapatosna ket indaknirna iti eskultura ti dakkel, nakabambaneg, padana a lampong ken nakabaag nga Ygorod. Kaisangsangpet ni Riz daytoy manipud iti kabambantayan idi napan a bulan. “Addadan. Kaisangsangpet da Karen ken Junald ida.” Pimmaspas ti gutok ti barukong ni Bileg Aurelio. Padasenna nga awisen dagiti annakna. Gundawayanna ti kaawan ni Riz a kanayon a mangbambantay kadagiti ubbing. No maminsan, atapenna a yad-adayo ni Riz dagiti annakna kenkuana. Patienna a maamak ti asawana nga iti kanito nga agsinada, mapasamak ti legal a gubat no siasino ti mangkustodiar kadagiti ubbing. Immuna ni Manang Pacing a simrek. Simrek iti maysa kadagiti siled iti adayo a laud a paset ti mansion. Madamdama pay, rimmuar ti morena ken kulot a balasang nga agay-aywan kadakuada, ni Karen. Simmaruno dagiti ubbing iti likudanna. Kayat ni Bileg Aurelio a tarayen nga arakupen dagiti annakna ngem kasla nalpay ti abagana iti panagsarimadeng dagitoy nga agturong kenkuana. Kasla nadanog ti pusona. Basolna no apay a saan a nadekket dagiti annakna kenkuana. Ken basol ni Riz. Manipud pay kaaddan nakem dagiti annakna, impagarup ni Bileg Aurelio a saan a panagayat ti nangnangruna nga impasagepsep ni Riz kadagitoy. Distansia. Kinaadayo. Panagraem, panagtulnog ken panagbuteng kenkuana. Kayariganna ti maysa a diosen nga impasagepsep ni Riz a rumbeng a dayawen ken pagbutngan. A rumbeng a pagtamdan iti isu amin a tiempo. Isu nga agsarsaruno dagiti ubbing— ni Sahri (Sahrita), 13, ken ni Quid (Quidzer), 11, a maal-alumiim nga umasideg kenkuana. Sakbay a makapagsanud dagiti dua, naibaluden ni Bileg Aurelio dagitoy kadagiti takiagna. Nabayag. Saan a naguni ni Bileg Aurelio ngem kayatna nga iti daytoy nga arakupna, punnuanna amin a panawen a nagkamtudanna kadagitoy. Immala ni Sahri ken ni nanangna; atiddog ken panguloten a buok, napudaw, nabiag a mata, narapis ket amken ni Bileg Aurelio no paspasuroten ni Riz daytoy iti makadadael a rehimen iti panagparapis ken panamagtalinaed iti bagi a narapis. Nabakbaked met ti bagi ni Quidzer ngem ni manangna, nupay napudaw met ken panguloten ti buokna. Mababain ni Sahri idi ibbatan ni Bileg Aurelio ida. “Diak nakaawid idi rabii ta adda dakkel a parikut ti kompania ni daddy. Napaserraan ti pagminasantayo,” sililiday a kinuna Bileg Aurelio. Limmawa dagiti mata dagiti ubbing. Ngem saan nga ammo ni Bileg Aurelio no maawatanda ti kaipapananna dayta. “Saanen a maluktan, daddy?” dinamag ni Sahri, kasla maysa nga ay-ayam laeng daytoy kenkuana. Immisem ni Bileg Aurelio. “Ammanto siguro. Bay-am latta, anakko… Parikut ni daddy dayta…” kinunana. “Bakasion inton Lunes ken Martes. Intayo sadiay Buraan Island,” inyisemna. “Wow!” nayesngaw ni Quidzer. “Yate, manang, yate!” nagpalakpak. Narabuy ti isem ni Sahri. “Yurayyo koma ni Manang Riz, manong,” kinuna ni Karen. “Nabayagen a diak nakapan sadiay puro, Karen,” kinuna ni Bileg Aurelio. “Itugotko dagiti ubbing.” “Ngem awan ti pammalubos ni Manang Riz, manong,” inkalintegan ti yaya. “Agpadakami laeng nga addaan karbengan,” kinuna ni Bileg Aurelio ngem adda amak iti kaungganna. No iti kompaniada, binisiaganna koman ni Karen. Ngem apay a saan nupay maysa laeng daytoy kadagiti anniniwan ni Riz? Ngem napanunotna nga awaganna ni Riz. Naringgor ti bangir a pungto. Nakadidillaw nga adu ti tattao iti lugar a yan ti baketna. Addada siguron iti eropuerto. “Honey, itugotko da Sahri ken Quid idiay isla,” kinuna ni Bileg Aurelio iti timek nga arig agpakpakaasi. “Pagrelaksanda metten.” “Adu ti assignment-da, honey,” inkalintegan ni Riz. Adda background daytoy a pakaammo a kasla mangibagbaga iti ilulugan dagiti pasahero ti maysa a flight. “Sigen, a… excited-da, Riz,” impasingked ni Bileg Aurelio. “Itugotmo ni Karen,” adda turay ti boses ni Riz. Naulit ti pakaammo. “Saanmi a masapul ni Karen sadiay. Addaak met. Siak ti makaaammo kadagiti ubbing.” “Annadam ida, BA, pangngaasim,” impigsa ni Riz. “Siguraduem nga awan ti pakaan-anuanda. Ken adda diet-da, a, laglagipem.” Nagtilmon ni Bileg Aurelio. Kasla gayang dayta a pammalagip a naidalubdob iti barukongna. Kasla ketdin saan nga agtalek ti baketna kenkuana. Saan kadi nga isuna ti diosen a makabael a mangsalaknib kadakuada? A saan kadi a ti mangbibiag iti kaamaan kabaelanna met nga ilisi ida iti pagpeggadan? “W-wen,” insungbat met laeng ni Bileg Aurelio. “Agyamanak... Ken kaano ti awidyo?” “Inton lawasna. Makalawas daytoy a parambak. Mabainak kada Mayora Sawadan.” Kasta ni Riz. Kabayatan ti panagbasana sadiay Bagiw, rinugiannan ti nakiam-ammo kadagiti papanguluen dagiti tribu iti kabambantayan. Dagiti Ygorod, Yteppang, Yabkir, Ysalpad, Ypantar ken dadduma pay. Ta adda kano kadagitoy a tribu ti pagbibiagan ti pamiliada agsipud ta dagitoy ti akindaga kadagiti kabambantayan iti Gran Cordillera a pakasarakan kadagiti pagminasanda. “Okay, enjoy!” nakuna ni Bileg Aurelio. “Enjoy… ken annadam ida, BA,” impakamakam ni Riz sakbay nga inanud ti timek manipud iti mikropono ti timekna. Nakasukaten dagiti ubbing. Naka-cargo shorts ni Quidzer idinto a Korean pants met ken ni Sahri. Saggagaysada iti backpack nga inawat ni Bileg Aurelio manipud ken ni Karen. “Saanda nga agswim-swimming, wen, manong,” kinuna ni Karen. “Saan… ammok,” insungbat ni Bileg Aurelio a sisesemsem. Tactical pants ti insuot ni Bileg Aurelio. Camouflage ti T-shirt-na. Adda met dua a dadakkel a backpack-na. Adda sumagmamano a lisensiado a paganup a riple iti yate. “Daddy, saankayo nga agtugaw idiay sango?” dinamag ni Sahri idi sumrek ni Bileg Aurelio iti akinlikud a tugaw. “Agkakatugawtayo man met,” inyisem ni Bileg Aurelio. “Apay, didak kayat a kadua?” Inawatna ti ima ti balasangna idinto a kimpet ni Quidzer iti tactical pantsna. Nagsanggir daytoy iti nabisked a bagina. Sinuknor ti nagpaiduma a rikna ti kaunggan ni Bileg Aurelio. “Hmm…” Tinangad ni Sahri ti amana sa nagrimat dagiti matana. “Isuronak nga ag-fishing, daddy,” kinuna daytoy. “Alla, fishing?” immulagat ni Quidzer. “Is-Istoriaen kano ngamin ni Wiljan a kaklasena ti panag-fishing-na, daddy,” imbulgarna. Agpada nga ageskuela dagiti agkabsat iti Trent International School iti Herrera Village. “Alla, saan met. Kayatko laeng a sursuruen,” inkusilap ni Sahri. Madamdama pay, simmalogen ti Ford Everest iti agiwes-iwes a kalsada nga agsubli iti puseg ti siudad. Inunorda ti Avenida Finanzia. Nainayad ti panagpataray ni Thor. Kabayatan ti panagpatarayna, inawagan ni Bileg Aurelio ni Tata Guzman, ti enkargado ken kapitan ti yatena. “Addakamin dita iti unos ti tallopulo a minuto,” kinunana. “Uppat nga aldawtayo sadiay Buraan.” “Yes, sir,” kinuna ni Tata Guzman. “Ibagam ken ni Manang Sidang nga isaganana dagiti dadduma a gear a balonenmi iti puro.” Ni Manang Sidang ti housekeeper ti yate. Adda latta dagiti gamigamda a sangaamaan iti uneg ti bapor. Uray pay dagiti ay-ayam dagiti agkabsat idi ubbingda, addada pay laeng sadiay. NAYEPYEP met laeng da Quid ken Sahri. Nakaisem ni Bileg Aurelio a mangap-apros iti buok dagiti annakna. Linallayanna ida. Daydi lallay a tinawidna ken ni Lila Caridad no paturogen daytoy dagiti kakasinsinna sadiay Cabungalogan: Lallallay, sallayusay Immuli sadiay bantay Nagbaklay iti pagay Lallallay, sallalusay. Lallalay, sallayusay Immuli sadiay katuday Nagsukdip iti balay Lallalay, sallayusay Agpada dagiti ubbing a nagsugel. Nagsanggir ni Sahri iti bakrang ni Bileg Aurelio, nagpungan met ni Quid iti saklot ti amana. Iti manmamano laeng a gundaway a kas ita, pinessat ti napalaus a rikna ti kinaama ni Bileg Aurelio ket nariknana ti ibabara dagiti suli dagiti matana. Isuna a napaidaman iti nagannak manipud pay puotna, saanna kadi met a mananam ti rikna ti agbalin nga ama? Guardiado dagiti annakna ken ni Riz. Ipawil daytoy nga umay kitaen dagiti ubbing no adda iti opisinana iti balayda. Ken no sumangpet, ibaga ni Riz a busy dagiti ubbing kadagiti assignmentda. Naka-lock ti study room dagitoy. Matmaturogdanto pay laeng inton pumanaw ni Bileg Aurelio a mapan iti opisinana. Manmano dagiti gundaway nga agtutugmok dagiti orasda nga aggaama. Ngem uray pay dayta, kayat ni Riz a limitaran babaen ti panangayabna kadagiti ubbing para iti ania la ditan a banag. “Addatayon iti marina…” Apagapaman nga inagkan ni Bileg ti pingping ni Sahri. Nagunnat ti ubing sa pinarukibanna ti amana. Insublat a binatak ni Bileg Aurelio ti ulo ni Quid iti luppona ket naaruy-oy ti katay daytoy a nagdisso iti tactical pants-na. “Alla, nakakatay pay kunam,” inyellek ti balasitang. Nagkatawa met iti nalag-an ni Bileg Aurelio idinto a mababain ken maamamak ni Quid a nangkita iti amana. “It’s alright, anakko. Saan a kumpet ti katay iti daytoy pantalonko,” impasingked ni Bileg Aurelio. Iti marina, nagaabay dagiti lantsa ken yate a nakagalut. Iti kaabagatanan a paset a dumna iti Ocean Park Adventures ti nakaigalutan dagiti dadakkel a superyacht ken megayacht. “Awan metten ti yatetayo.” Maganatan ni Quidzer a mangpadpadaan kadagiti malabsanda nga agkakadakkel a yate a kukua dagiti babaknang iti Poro Ylocos. Dandani amin a kameng ti Cincuenta Familias, addaan iti yate

Images:

© PressReader. All rights reserved.