Publication:

Bannawag - 2021-11-16

Data:

Siled ti Kararag

CONTENTS

Ni RHODA DOUGLAS ti Texas, USA

19 Siled ti Kararag Basaentayo ti Lucas 5:1-11 “Maestro,” insungbat ni Simon, “nagpatpatnagkami a nagkalap. Awan pulos ti naalami. Ngem no kasta ti kunam, iwayatko dagiti iket.”—Lucas 5:5 EKSPERTO a mangngalap ni Simon Pedro. Ngem ita, adda maysa a ganggannaet nga adda iti igid ti baybay a mangibagbaga iti aramidenda. Kasla makitkitak ti itsura ni Simon ken dagiti kakaduana a pilpilitenda ti sidadayaw nga agkuna iti saan. Nalabit imbagada aminen a pambarda: inaramidda amin a kabaelanda iti mano nga oras ngem awan ti naganabda; nabugguanen dagiti iket, nakupinen ken naidalimaneken; aginanadan. Ngarud, saanen a tiempo pay ti panagkalap. Ngem idi a nagtulnogda met laeng iti pammagbaga ni Jesus, nagistayen lumned ti bilogda gapu iti kadagsen dagiti naalada. Kaslaak ken ni Pedro. Ibilangko ti bagik nga ekspertoakon maipanggep iti kasayaatan a panawen ti panangibingay iti ebanghelio. Nagadu ti pambarko no agayab ni Apo Jesus: Saanak a nalaing nga agsao; nalabit diak ammo ti umisu a sungbat; amangan no agbalinak laeng a kasla maag wenno pagang-angawandak. Ngem kalpasan a malagipko a ti Espiritu Santo ti mangidalan kadagiti tattao nga agturong ken ni Apo Kristo, ti laeng rumbeng nga aramidek ket agbalin a napudno iti nangibaonan ni Apo Kristo kaniak ken iwayatko ti iket. Kaduak ni Apo Jesus ken ibagbagana kaniak, “Saanka nga agbuteng.” Kararag: Iwanwannakami, Espiritu Santo, tapno mangngegmi ti awag ken agbalinkami a napudno iti panangiwayat kadagiti iketmi, uray pay mariknami a kasla agkurang ti kabaelanmi. Amen. Kapanunotan: Balbaliwan ti Espiritu Santo dagiti puso no ibinglayko ti pakasaritaan ni Apo Jesus. Ikararagan: Dagiti agduadua a mangibinglay iti pammatida.

Images:

© PressReader. All rights reserved.