Publication:

Bannawag - 2021-11-16

Data:

Ti Tarakenmo ken Sika

CONTENTS

Ni FRANCISCO S. ANTONIO

50 Ti Tarakenmo ken Sika KAS iti tao, seknan dagiti pusa iti tension wenno pannakaburibor a mamagpeggad iti salun-atda. No ngamin maistres ti taraken a pusa, mamalbaliw ti galadna a kas iti panagtakkina iti uray sadino la ditan, agbalin nga agresibo wenno managprobokar, naliday wenno kumakayakay iti amona ken kadagiti dadduma a taraken iti pagtaengan. Saan a nalaka a mairuam ti pusa kadagiti kellaat a panamalbaliw ti aglawlawna a kadawyan a pakaigapuan ti pannakaburiborna. Kas koma no maipan iti beterinario. Wenno no mayallatiw. Isu a maibalbalakad ti panangabbong iti tangkal a nakaikabilanna no mayakar iti pagtaengan. Maikabassit ti istres ti ayup kadagiti makitkitana kabayatan ti pannakaibiahena. Mabalin pay nga agpauyo ti pusa no adda sumangpet a sabali a tao wenno ayup nga agnaed iti balay. Iti panagkuna ti pusa, makissayan ti atension a maiturong kenkuana no adda sabali a sumangpet nga agnaed ti balay. Makissayan ketdi ti tension ti pusa no di kellaaten a makilangen iti kasangsangpet a kabbalay wenno ayup. Iparikna pay a di nakissayan ti panangipateg iti ayup. No itugot iti yaakar iti sabali a pagtaengan, padasen nga ipupok pay laeng iti maysa a siled nga addaan iti adu nga abalbalay a pakakumikomanna, taraon, pagturogan, ken dadduma pay a kasapulanna. Itugot pay dagiti sigud a gamigamna tapno di makellaat ken nalaklaka nga iruamna ti bagina iti baro a pagnaedanna. Madlaw pay a maburiboran ti pusa no natagari ti aglawlaw a kas iti kaadda ti napigsa a musika, uni ti rebentador, wenno adda maangay a padaya. Makaipaay pay iti pannakaburibor ti pusa dagiti makitkitana no tuman-aw iti tawa. Adda dagiti gundaway nga iti panagkunana, maraut wenno adda peggad nga idateng dagiti maimatanganna a lumabas. Saan ngarud a pagtaltalinaeden ti pusa iti asideg ti tawa no madlaw a malmalbaliw ti tigtignayna gapu iti pannakaburiborna kadagiti makitkitana. Makarikna pay ti pusa iti pangbuteng ken peggad no adda mapasamak nga uram, ginggined wenno bagyo. No di mapagtalna ti rikna ti taraken a pusa gapu iti pannakaburiborna, maibalakad ti panangyuman iti parikut iti beterinario.—O galip idinto a ni Tilde ti adda iti sango ti electric range. Alisto ti anakna nga agluto. Agpabureken iti danum uray no maisagsagana pay la dagiti rekado. Makamat ti lakay nga agiwa no kua. “Agtugawka ketdi, tatang,” inulit ni Tilde. Ad-addan ti pannakaburburtia ni Tata Tante. Ita man pay a di ipalubos ni Tilde ti itutulongna? “Apay, ‘ya?” “Saannak a tultulongan ita ta daytoy nga aldaw, special day para kenka,” imparukib ni Tilde. “Nga?” “Kasangaymo ita, saan kadi?” Napanganga ni Tata Tante. Timmangad pay a nagpanunot. “Inton bigat pay laeng!” kinunana. “Ammok, a, tatang! Ngem insapsapakon ta Abril 4 itan idiay Filipinas.” Ammo ni Tilde a saan a biddut ti panangdakamatna iti daga a nagtaudanda nga agama. Kadagiti napalpalabas a tawen, likliklikanna ti Filipinas a kas topiko; ammona a mail-iliw a kanayon ni Tata Tante idiay Ilokos ket dina kayat a degdegan ti rikna ti amana. Nagsabat ti panagkitada nga agama. Binugguan ni Tilde dagiti imana sa nagwarsi. Impunasna dagiti nabasa a dakulapna iti apronna. “Happy birthday, tatang! Happy, happy 70th birthday!” Inarakup ni Tilde ni Tata Tante iti nairut; napaut. Sa binisongna ti mangrugin nga agkuribetbet a pingping ti lakay. Idi ruk-atan ni Tilde, kinuna ni Tata Tante: “Wen, a, ngem nasapaka... Ken bay-am ‘ta bertbertdeyn. Lakay dataon. Dagiti la ubbing ti mangramrambak iti bertdey...” “Sika ketdi met, tatang. ‘Tatta la nga aramidek daytoy kenka. Ammom ngamin, ditoy Amerika, dakkel a banag ti sarado a birthday. Sangapulo, duapulo, tallopulo… kasta... Seventy-mon. Big birthday! Isu nga irugikon ti panangrambaktayo. Napintas nga aldaw, tatang, ta Easter pay!” inlawlawag ni Tilde. “Ken,” minatmatan ni Tilde ti amana, “manon nga aldaw a mapampanunotko a napimpintas koma nga inyaw-awidka idiay Filipinas ngem ti impaspasiarka ditoy Amerika.” Saan a nailinged iti imatang ni Tata Tante a limmiday ni Tilde. “Isu a ti isagutko kenka, isu ti panagawidtayto idiay Ilokos apaman a nawayan ti agbiahe. Maysa a bulan. Ngem no didakto palugodan, uray agbatikanto pay laeng biit idiay Ansad no kayatmo.” Nagmaga ti karabukob ni Tata Tante. “Ngem itantanmo kadi, a, ti panggepmo a mapan agyan idiay Filipinas, tatang. Pangngaasim ta saannakam’ kad’ pay laeng a pampanawan ken Joshua ta adda kaduana... kaduami a dua,” makaluan ni Tilde. Adda kadi puris a naakkal iti barukong ni Tata Tante? Wenno ad-adda a limmumlom dayta a puris? Dina masinunuo dayta a banag, ngem naluyaan iti langa ti balo nga anakna. Adda nanalteek iti tawa. Sakbay a nasapulan dagiti mata ni Tata Tante, naallangonen ti billit ti tayabna: nagpangato agingga iti yan ti tumangkiranen nga oak tree, nagsuek idi asidegen iti tutok ti kayo, sa nagpukaw kadagiti agrusingen a sanga, sa idi kuan, timpuar a nagsubli iti ikub ti solar a kasla sumipsippayot. Ket sakbay a nakadanon iti bubong ti rambler a balay ni Tilde, nagpababa a nangintar kadagiti nagukraden a sabong dagiti lima a forsythia iti pideg ti bakud a kayo sakbay a nagbatay iti aringgawis ti dogwood tree a mangrugi metten nga agrusing dagiti bulongna; apagbiit dita, sa timmayab manen, timmayok agingga a nagpukawen iti nakaas-asul a tangatang.—O

Images:

© PressReader. All rights reserved.