Publication:

Bannawag - 2021-11-16

Data:

Ti Puga

CONTENTS

Nobela ni NORBERTO D. BUMANGLAG, JR.

10 Ti Puga (42) Norberto D. Bumanglag, Jr. Ti Napalabas: Pinabettak da John ti cottage a sinerrek ti strike team ti CIA. Naalada pay ni Mr. Hutchison ngem naipasuli ida da Sekretario Sandoval. Pinalubosanda ida ngem inikkanda laeng ida iti 24 nga oras a wayawaya. Naamiris ni John a kasapulanna ti tulong ti Al-Sujud Brotherhood ket inawaganna ni Sgt. Ramirez. Inkeddengda a mulaan iti “bug” ti pagtaengen ti Sekretario ngem napaayda. Natiliw pay ni Rudy ket innala ti CIA. Inusar ti Sekretario ni Rudy nga appan tapno mapasukona ni John ngem saan a nagballigi. Inkeddeng ni John nga isudan ti mangraut kadagiti nangala ken ni Rudy, ngem idi rummuarda iti hotel, kellaat nga adda nangpaltog kadakuada ken Sgt. Ramirez. N(Maika-42 a Paset) AILUKAT ti ridaw ti nakasipsipnget a camper ti pickup truck. Narikna ni Melanie ti apiras ti pul-oy. Punasenna koma ti agar-aruyot a ling-etna ngem naamirisna a nakaposas dagiti naipalikud nga imana. Nagkidem sa nagkiraykiray tapno mairuam dagiti matana iti makapurar a lawag. “Get out!” naturay ti timek ti kapitan a nangbilin kenkuana. Timmakder. Sa nagpasango. Iniggaman ti kapitan ti luppona. “Don’t touch me, son of a bitch!” inyikkisna. “Natangsitka,” kinuna ti kapitan. “Gapu ta awan ti respetom kadagiti babbai.” Nagngirsi ti kapitan. “Saanka a babai. Maysaka nga ayup nga umay agangkat iti droga iti Mehiko tapno adda iwarasmo kadagiti padam nga addict iti Amerika!” imbugkaw ti kapitan. “Namin-ano kadin nga imbagak kenka a saanak nga ismagler iti droga? Maysaak a pannakabagi ti linteg. Maysaak nga undercover nga ahente a mangsursurot ken agtarigagay a mangpasardeng iti pannakaiserrek ti dirty bomb iti Amerika.” Nagkatawa ti kapitan. “Dumsaagka ketdin. Asino ti mamati kenka? Uray ID koma laeng, awan pay maipakitam.” Limmagto a dimsaag ni Melanie. “Malungsotka ita iti pagbaludan,” inkatawa ti kapitan. “Ala, sumrekka .... ” Kinita ni Melanie ti serkanda a pasdek. Agrakrakayan daytoy. Awan pulos pagilasinan a pasilidad ti gobierno daytoy. Simrekda. Nakaang-angot iti uneg. Agatnaramas a pusi nga utong. Adda sumagmamano a nadulpet a lallaki a nakauniporme a kas polis. Agpaypayubyobda iti sigarilio. Dagiti lamisaan, nakataptapok. “What the hell is this?” inyingar ni Melanie iti kapitan. “Pagbaludan kadagiti ismagler ‘ti droga a kas kenka!” “Saanak nga ismagler!” inyikkis manen ni Melanie. “Maysaak a federal agent... ket nasken a makasaritak ti boss-mo.” Nagsardengda iti sango ti maysa a bassit a lamisaan a pagtugtugawan ti maysa a lumakay metten a Mehikano a nakaammal iti tabako. “Siak ti boss iti daytoy a pagbaludan. Ania ti maitulongko kenka?” sinaludsod ti lakay. “Kasapulak ti telepono. Adda nasken nga awagak...” Nagkatawa ti lakay. “Apay, ania ti panagkunam ditoy... Amerika? Addaka iti Mehiko!” “Kas naarestar a maysa nga umili, saan kadi a kalintegak ti mangawag iti kayatko sakbay a maibaludak?” “Addaka iti Mehiko, iha... Saanka a makaawag. Awan a pulos karbengam ditoy. No ismaglerka iti droga, mabungsotka ditoy...” Imbaw-ing ti lakay iti panagkitana iti maysa kadagiti guardia. “Martin...” Napataliaw ti maysa kadagiti lallaki nga agsasarita iti bangir a lamisaan. Immasideg daytoy iti yan da Melanie. “Alaem daytoy nga ismagler ket ipupokmo,” imbilin ti lakay. Nakangirsi ti guardia a nangmingming ken ni Melanie, sa immisem daytoy. “Mabalin a yawidko laengen, sarhento?” “Estupido! Ipupokmo kunak!” indil-ag ti lakay. “Por favor... I am not an smuggler... I am an American undercover agent spying on terrorists who are trying to smuggle a dirty bomb into the USA. You need to call my office... 1-800-645-9201... Por favor... Llama numero 1-800645-9201...” Ngem awan a pulos ti dimngeg ken ni Melanie. Ginuyodda ketdi nga impan iti uneg, iti yan dagiti nagkaadu a balud a nakatipontiponan dagiti maipapan ken dagiti pudpudno a drug smuggler. Awan ti makaammo no asino dagiti adda iti uneg daytoy a pagbaludan. Maymaysa laeng ti sigurado: bin-ig a nararanggas dagitoy. NAPAKIET lattan ni Secretary Sandoval iti pannakangngegna iti kanabtuog ken iti pannakariknana iti napigsa a puersa a nangkidag iti luganda. Ammona a nagiwas ti lugan. Ammona a nabaliktad. Dayta laeng ti ammona. Dina ammo no ania a talaga ti napasamak. Basta nagpatangken lattan. Napuotanna laengen dagiti agsisinnungbat a paratupot. Adda mangpalpaltog kadakuada! Tinaliaw ti sekretario ti driver-na. Saan nga aggunggunay daytoy. Insublatna a kinita ni SMSgt. Brady. Daradara ti muging daytoy ngem agkutkuti. Nagalunain daytoy nga immasideg kenkuana. Nakaasuten iti paltog. “Are you okay, sir?” sinaludsod ti sarhento. “I’m okay...” insungbat ti sekretario. “What’s going on?” impasarunona a sinaludsod. “Adda nangdungpar kadatayo... dayta laeng ti ammok, sir.” Inruar ti sarhento ti radiona. “Delta to Security Detail, do you copy?” “Copy you loud and clear, Delta...” “What’s going on?” “Two probable assailants, Delta... you are covered... but gas is leaking on your vehicle... you could explode... get out...” “Are we safe to get out?” “Dangerous, Delta... but it’s going to be more dangerous if you stay inside the car... at the count of three, you get out on your left side... do you copy?” “10-4, Security Detail... we got that...” insungbat ni SMSgt Brady. Kinitana ni Secretary Sandoval. “Nangngegmo, sir? Masapul a rummuartayo...” “Nangngegko. Ngem ikkannak iti armasko.” “Kabaelanmi pay laeng ti mangsalaknib kenka, sir.” “Iti taray dagiti pasamak, addan panagduaduak. Iti unos ti panagbiagko, kadagitoy laeng nga adda nakastrek iti pagtaengak. Ita, adda mayat a mangisikat iti biagko. Mapagtalkankayo kadi pay?” “Sir...” nababan ti timek ti sarhento. “Ala, ikkannak iti armasko...” natangtangken itan ti timek ti sekretario. Ammo lattan ti sarhento a saanen nga agang-angaw ti sekretario. Inruarna ti bassit a .38 manipud iti gurongna. Pinennekna no adda bala daytoy. Sipupunno. Inyawatna iti sekretario. Iti ruar, saan nga agsarday ti panagbusi dagiti nabibileg a paltog. Mangemkemkemen iti pungtot ti sekretario. Dinan kayat daytoy a mapaspasamak. Asino manen dagitoy? Ni John Villa? Uray la a nagungor iti pungtotna. No ni John Villa daytoy, saanna la ketdi a mapakawan. Paanupna uray sadino ti paglemmenganna. Ngem napanganga. Ta no ni John Villa daytoy, saan kadi nga isun ti mangananup kenkuana? Nagriaw iti pungpungtotna. Kinita laeng ni SMSgt. Brady ti lakay. Saan a nagtimtimek. Agpupungtot ti lakay ket dakes a sabsabaten ti pungtot daytoy ta nadamsak. Maitured daytoy ti mangpaltog kadagiti nasukir a taona. Kinapudnona, mangrugi metten nga agburek ti dara ni SMSgt. Brady iti daytoy a John Villa. Agbalin a kasla impierno ti biagda agingga iti saanda a maipakni daytoy a tao. Nangurat dagiti takiagna iti panangpetpetna iti M-4. NAKITA ni John dagiti innem a nagsasaruno a rimmuar iti adda iti una nga SUV. Awan ti sekretario. Kaipapananna ngarud nga adda ti sekretario iti nabaliktad a lugan— a pagturonganen dagiti innem. Nakipinnaltog da John ken Sgt. Ramirez. Duan ti natublakda kadagiti innem. Dua pay iti nabaliktad nga SUV. Pattapatta ni John nga adda pay walo a nabati kadagiti badigard ti lakay. “Ricky... I’m gonna approach the second SUV... cover me,” kinuna ni John. “Got you, captain,” insungbat ni Sgt. Ramirez. “Bumilangak iti tallo...” “10-4, sergeant...” “One...” inrugi ti sarhento ti nagbilang. Nakitana ti maysa kadagiti kabusor a rimmuar iti naglingedan daytoy. Pinuntiriana a dagus. Nakitana ti pannakabaliktad daytoy. “One more down,” inriawna. “Two...” intuloyna ti nagbilang. “Three!” Ngem pagam-ammuan ta nakitana ti maysa kadagiti kabusor a nakaplastar a mangpaspasungad ken ni John isu nga impukkawna a dagus: “Hold it, John!” Nangngeg ni John ti pakdaar ni Sgt. Ramirez ngem nakaruaren iti paglinglingedanna. Naigiddan ti panagbusi ti paltog. Narikna ni John ti pannakapuntana. Napatugaw. Nakaparpardas a nagkunail a nagsubli iti naglingedanna. “J-John, are you okay?” impukkaw ni Sgt. Ramirez. Kinarawa ni John ti bagina. Saka, luppo, barukong, takiag... agingga iti nakarikna iti nabara a dara iti tengngedna. Napakidem. “J-John, answer me... are you okay?” impukkaw manen ni Ricky. “Wen,” insungbat ni John. “Garumiad laeng daytoy. I’m okay...” Napaanges iti nauneg. Naminsan pay nga inaprosanna ti sugat iti tengngedna. No napasentruan, dina la ammon. Nalabit a gibusna koman. Napaanges iti nauneg. Siniripna ti nakitana a naggapuan ti gilap ti paltog a nangtiro kenkuana. No adda pay laeng sadiay, kukuana ti kabusorna. “Do you want to go again?” impukkaw ni Sgt. Ramirez. “Of course, I do. I need to see the secretary!” “See or kill?” “It depends on the situation...” “Kill him! One less enemy that we have to worry about...” “We are not a killing machine...” “He is a threat..” “I’m ready to get out... now! Cover me!” inriaw ni John. Timmaray a nakasirig iti paltogna. Nakapaturong iti naggilapan ti paltog ti nangpaltog kenkuana. Apagisu nga intungraraw ti lalaki ti ulona. “Got you, son of a bitch,” nayesngaw ni John ket kinalbitna ti paltogna. Saanen a nakapagasug daytoy. Intarengtengnan ti impaarudok a panagtarayna agingga iti nakagteng iti nabaliktad nga SUV. Simmirip iti sarming. Maysa a putok ti imkis. Iti uneg ti lugan, dinagdagus a pinagkulob ni SMSgt. Brady ni Secretary Sandoval. Insallukobna ti bagina iti sekretario ta agkanaltiing ti bala nga agbalabalandra. “What the hell are you doing, sergeant?” inyunget ti sekretario. “You are trying to kill ourselves! You know that this car is bulletproof... and you are trying to shoot someone!” “Not just someone, sir. It’s John Villa...” Nauuneg dagiti anges ti sarhento. “Ngem bulletproof daytoy lugan, dimo kadi maawatan? Saannata a mapapatay ditoy!” indil-ag ti sekretario nga ad-addan ti pungtotna. “Dayta ti gapuna a maawatiwtayo ta diyo us-usaren ti utekyo!” “Ngem no sindianna ti nagubo a gasolina, bumtak ti lugan... Panagkunayo, makalasattayo pay?”

Images:

© PressReader. All rights reserved.