Publication:

Bannawag - 2021-11-16

Data:

Sanaltek

CONTENTS

Ababa a Sarita ni MARLON A. RODRIGO

12 Sanaltek Marlon A. Rodrigo URAY la a nagallangogan ti paggaakko iti pannakabussogko kadagiti nasikbabko a simutsimot nga agiinnuna a manglikawlikaw iti agkurkuridemdem a lawag iti pataguab a pagsidsidarak iti pangrabiik. “Kitaem man no ‘nod’toy ti nagsanaltekanna, Laling!” nangngegko a mandar ni Tata Binsiong. “Iti pataguab, lakay,” naalumanay a sungbat ni Nana Laling nga agdengdengdeng iti pangrabiida. “Awan latta ngarud, a.” Iti pigsana, nangngegko pay ti sennaay ni Tata Binsiong nga ammok lattan a nakatugaw iti butaka nga agbuybuya iti damdamag iti telebision. “COVID ngamin, lakay. Saan a kas karina a makaala iti bakasion ‘diay anakmo,” inyay-ayo ni Nana Laling. Naglingaling ni Tata Binsiong. Nakitak ta agininiinakon— gapu iti busogko— nga agturong iti pannakabalayko nga adigi iti uneg ti balay. AGSURSUROAK pay laeng nga agsikbab kadagiti mayaw-awan a lamok iti ayuyangko idi damok a makita ni Rowena a bugbugtong nga anak ni Tata Binsiong. Nakaala idi iti bakasionna manipud iti ospital idiay Laoag a pagpapaayanna a kas nurse. Ngem imbes a naragsakda iti panagiinniliwda, pinagsasawan ni Rowena ni tatangna ta dina maaklon a madatnganna ti amana nga addan kabbalayna. Napalalo ti panagsasaona. “Awan met dakesna ta agmaymaysaak metten, anakko,” inkalintegan idi ni Tata Binsiong ngem pulos nga awan denggen ni Rowena. Inramramanna pay ni Nana Laling a pinagsasawan ta agpadada kano nga agraraman. Nagatgatelda pay kano ngem sabawil— 65 ti tawen ni Tata Binsiong idi, 55 met ni Nana Laling. Pimmanaw ni Rowena a kasta unay ti luksawna. Kasla sallukoban ti sipnget ni Tata Binsiong no gandatenna nga awagan ti anakna a di man laeng mangikaskaso. No aldaw ti pannakaitaona, agsaganada latta ken Nana Laling ta namnamaenna a sumangpet ni Rowena tapno kablaawan daytoy; ngem pulos a dida nauray ni Rowena. Agbalbalin laeng a pagpiestaan dagiti ngilaw dagiti saganada. Aglemmengak met iti sirok ti lamisaan ket idiay nga agsidarak kadagiti mabmabsog a ngilaw. Iti kaudian a kasangay ni Tata Binsiong, sangkadamagna no yanko nga agtiktik-ab— a segun kenkuana, sanaltek kano. Sangkaisungbat met ni Nana Laling nga awanak iti ridaw. Diak met maawatan no apay a kayatna nga agsanaltekak iti ridaw idinto a kaamakko dayta a lugar. Naminduaakon a naputdan iti ipus gapu iti pannakalipitko. Namak pay no ulok ti malipit? Kayatko pay ti agbiag. Makabulan kalpasan ti panagkasangay ni Tata Binsiong, nadlawko a dakkelen ti imresanna. Napalalon ti kinaulimekna. Kaykayatnan ti agid-idda iti siled ti anakna a nagbalin a kawaw sipud pimmanaw daytoy. Idiay met lattan a balbalonan ni Nana Laling iti kanenna, nupay arig dinan sagiden. Agluluasit met latta ni Nana Laling no kasdiay a kapatangna ti lakay ngem awan met pulos isungbat ti lakay. KAMKAMATEK ti mamarparbangon a ngilaw itay mapan balonan ni Nana Laling ni Tata Binsiong iti pamigat. Diak napupuotan, addaakon iti pagbutbutngak a ridaw. Ngem addaytan ti sidsidarak. Pinagbennatko ti dilak ket sakbay a nakakuti ti ngilaw, addan iti ngiwngiwko. Nagtik-abak iti uray la. Iti kuarto ni Rowena, nagdung-aw ni Nana Laling. Nagkarayamak a nagturong iti ridaw ti kuarto. Nakitak ni Nana Laling. Gunggunggonenna ni Tata Binsiong. “Nagunin ti saltek iti ridaw,” impadamagna. Ngem saanen a mangngeg ti agpadpadaan. Nairut ketdi ti kepkepna iti ladawan ti anakna.—O

Images:

© PressReader. All rights reserved.