Publication:

Bannawag - 2021-11-16

Data:

Kid Layaw (4) Dionisio S. Bulong

CONTENTS

Nobela ni DIONISIO S. BULONG

20 Kid Layaw (4) Dionisio S. Bulong Ti Napalabas: Nakaawat ni Macario iti imbitasion nga agpaay a naisangsangayan a sangaili iti paboksiong a maangay iti panagpiesta ti barangayda idiay Simbaluca. Naammuan ni Aldong daytoy ket indawatna ken ni Macario a sumurot ta tulonganna a mangipudos iti agkampeon ta alaenda a boksingero. Idiay probinsiada, ikarkari ni Lakay Nardo iti barona a ni Pedro a no mangabak iti boksing, makisarita ken ni Macario tapno alaen daytoy a boksingero ngem imbes nga agsanay ni Pedro, makumikom ketdi iti kanipaan. Dimteng ti panagawid da Macario. Nakarikna ni Aldong iti ilem idi ni laeng Macario ti pinadayawan dagiti kalugaranna. Ken nakigtot idi nangngegna ti amana a nangisapata iti gurana ken ni Lakay Ando nga ama ni Macario. (Maika-4 a Paset) NAGAPA dagiti agkabagis? naisip ni Aldong. Ket saanna a naituloy ti ilalaktawna iti lalayawan. “Pasiensiaamon, a, ni manong. Narabaw la unay ti kimmotmo a laklakayan!” kinuna met ni Baket Masang. “Ay, manipud ketdi idi nagsukat iti bunggalo ti inanay a balayna, napangas unayen. Ita, dika payen makastrek iti balayda no dika agpigad. Agpigadka la ngaruden sarunuenna pay la a sagadan ti pagnaam! Nakaraman!” “Agpasiensiakan, in-inaudika!” “’Su a no agbakasion ‘diay anakmo, ipalagipmo daydi karina a mangyawid ‘ti telebision. Kitaek man no di umay makibuya ni Don Ando!” “Kasano a makabakasion ket narigat kano ti negosiona ita. Isu a dina pay naipatulod ti radiok!” Kasla adda nangitalmeg iti ulo ni Aldong iti nangngegna. Iti amakna no ania pay ti sumaruno a mangngegna, nagsay-a a bulonna a nanglaktaw iti lalayawan. “Inang, amang, addaakon!” Nakigtot da Lakay Pacio ken Baket Masang. Telebision, naisip a dagus ni Lakay Pacio. ‘Tay transistorko a pagdenggak iti drama no agsekkaak, immapay met ken ni Baket Masang. Nagkinnitada. Tinarayda ti tawa. Sinabat ida ti garakgak ni Aldong a nangtaray iti agdan. “Ay, ti anakko!” inrayok ni Baket Masang ket inapungolna ni Aldong “Dika man la nagpakpakaammo!” kinuna met ni Lakay Pacio a makaliblibbi. “Nakikuyogka kada Cario?” Naisagud ti panagkitana kadagiti bitbit ti barona. Idi kuan tinannawaganna ti sakaanan ti agdan. Maysa a bag ken sangalata a biskuit laeng ti karga ni Aldong? “Nangibatiam ‘ti dadduma a kargam ta innak alaen?” Rimmuk-at ni Aldong iti arakup ti inana. “Dagitoy laeng. Narigat ti adu ti kurkurantongna nga agbiahe,” insungbatna iti amana. Insennaay laengen ni Lakay Pacio ti pannakapaayna. Nalagipna daydi inutang ti barona iti kiskisan dita Palagao. Dua a panagaapit—biit ken supiat— a binayadanna. Ngem iti kinanumo ti barona a nagbakasion, ania ti namnamaenna iti daytoy? Yamanenda laengen ta nakalagip kalpasan ti agsangapulon a tawen a dina panangkomusta kadakuada. “Yaman pay, barok, ta nalagipnakami,” imbaningrot ni Baket Masang a nangsango ken ni Aldong iti dulang idi mamigat daytoy. “Dimi met ngamin ammo a sumangpetka isu a dikam nagsagana. Impasida ni amangmo kadagiti pusa ti teddami a liningta a bunog. Anusamon, a, ‘ta bagas a kape!” “Naimas!” Nagsanapsap ni Aldong. Nagduaanna nga intangad ti malukong ket inarurobna ti nabati a kape a naglangoyan ti sangatukel a kilabban, bulonna a nangtakder iti dulang. “Inawisnak ni insan a mangkadkadua kaniada,” insungbat ni Aldong iti inana. “Mandiak koma ta diak masango ti mangiwidro iti gastosek nga agbiahe ngem isudan ti nangiplete kaniak. Adda kano paboksing no rabii ket isu ti naisangayan a sangaili!” “Wen, adda. Ni ngarud kaanakam a Pedro nga anak ni kapiduam a Nardo ti lumaban iti kampeonato. Ti mangabak ti mangibagi iti Simbaluca iti paboksing ti Sta. Teresita. Tulongam man ketdi,” kinuna ni Lakay Pacio. “Sinno a Nardo?” Nagkuretret ti muging ni Aldong. “Dimo malagipen ni Nardo? Daydi lampong nga imingan ken ubanan?” “A, wen, malagipkon. Ni Kapid Nardo a makaangot la iti tansan ti anisado, agprobokaren!” Pimgaak ni Aldong. “Wen. Tulongam man bareng sumayaat met ti panagbiagda. Tinultulongam idi ni Cario, di ngamin?” Nagaragaag dagiti mata ni Aldong. Wen, natulonganna ni Macario tapno magteng daytoy ti kasasaadna ita. Ngem apay nga isu a nangtultulong iti kasinsinna ket saan a nagprogreso ti panagbiagna? Agpadpadada met ken Macario a nagrigrigat, ngem apay a ti kasinsinna laeng ti bimmaknang? “Kakaasi daydiay nga ubing,” kinuna manen ni Lakay Pacio. “No malpas ti panagtalon, kanipaan manen ti paguperanna.” “Kukueenna dita kanipaan?” Kimmita ni Aldong iti abagatan. “Mangappatda.” Pagtubbogenda dagiti pagbungaan ti nipa ti kayat a sawen ni Lakay Pacio. Ti tubbog ti nipa nga aw-awaganda iti tuba ti pagtaudan ti arak a layaw. Lambanog, kunada idiay Quezon. Naputed ti panagsarita dagiti agama idi adda nangibirakak iti panagkantana. Kinita ni Aldong ti amana idinto nga intingigna ti nagallingag. “Yodeleyooo! Yodeleleyoo! Heng down your head, Tom Dooliii/Heng down your head and cry…” Pimgaak ni Aldong. “Sinno daydiay agtagtaguob?” Piniselna ti rusokna. “Ni ngarud Pedro. Pangyaw-awanna ngata, a, ‘ti rigatna. Aginanakan ta hustonto no rabii, kunak ngarud itay nagkitakami, ngem ikamakamda kano ti anawangda. Manglutoda kano no leppas pangngaldaw para iti piesta,” insungbat ni Lakay Pacio. “Ania ti langa dayta nga ubing? Kayatko a sawen, kasano ti pammagina?” “Kaaduanna, ngem nasikkil ti langana ta natulang. Agbutbutuan dagiti gemgemna, piman, ta usarenna met a pagilut kadagiti pagbungaan ti nipa.” “Pagsansanayanna?” “Ditoy lattan, a, arubayan, pagmurmurayanna no makariing iti aglawag. Dina kayat nga agkitada ken Bitong idiay ili. Saanda nga agkadutdotan. Alan, barok, tulongam bareng masurotanna ti tugot ni Cario!” “Adda kadi ammo ni Pedro iti boksing, uray ABC laeng?” sinaludsod ni Aldong. Nagmusiig ni Lakay Pacio. “Ania koma ti ammoda, malaksid iti mabuybuyada iti telebision no mapanda makibuya iti kaarruba. No dadduma, saanda pay pastreken ida ta isu met ti puon ti pagaapaanda.” “Apay met?” “Gapu iti kinasutil ni Pedro. Daytoy met Bitong, napalalo ti kinaarsagidna. Pikon, kunada ngarud kaniana.” Uray la nakapugso ni Aldong iti panangtipedna iti paggaakna. Kasano ngamin ket naipalagip kenkuana ti ugali ni Macario idi agdadamo pay ti kasinsinna. Dina malipatan daydi panangsakay daytoy iti maysa a nakalabanna iti eliminasion. Kasano ngamin ket nasippadong ti nakalabanna ket dandani natnag iti ring iti pannakaidugmamna. Bimmangon ti kasinsinna ket ginabbona ti kalabanna sa sinakayanna a kinabkabil. Naimbag ta alisto daydi Kapitan Romul nga immuli iti ring. Ti laeng nagawan a kapitan ti kakaisuna a makaanawa ken ni Macario no makapungtot daytoy. Ngem kellaat a nakarit ni Aldong ket naputed ti katawana. Piniritpiritna ti timidna. Kimmita iti abagatan nga agtungtung-ed. Nagnganga ni Lakay Pacio. Nagtalangkiaw amangan no adda nakita ti barona. Timman-aw, ngem awan met ti nakitana iti abagatan malaksid kadagiti ninayon a kasla dungdungsaan dagiti agluomen a dawa ti Milagrosa. Tinurong ni Aldong ti ridaw. “Innak kitaen ni Pedro,” kinunana a bulonna nga immulog. Sinurotna ti dakkel a tambak nga agpaabagatan nga inagmuyan dagiti dawa. Iti kanipaan, agkankanta pay laeng ni Pedro. “Yodeleyo, yodeleyeooo/ Bambemeyeooo/ Por boy yoar bound to die!” Nangngeg met ni Macario ti yodel ni Pedro ket dina naituloy ti panagiladna koma iti daan a pasagad iti sirok ti narukbos a bayog. Singirenen ti putedputed a ridepna iti biahe. Maturogkan dita kuartoyo, nakkong, kinuna ni Baket Saria kalpasan ti naladaw a pammigatda. Kassukat ti supot dagiti pungan ken ap-ap ti kotson. Baka may kumagat sa iyo diyan, kinuna met ni Muyac. Ngem nagkatawa laeng ni Macario. Nagallingag. ‘Sino ngata? nakunana iti unegna idi kapkapnekannan nga aggapu iti abagatan ti yodel. Idi maalanan ti turogna, addayta manen ti yodel. “Yodeleyooo, yodeleooo/ Heng down your head, Tom Dooliii/ Heng down your head and cry…” “Ninanattan!” intabbaaw ni Macario. “Maltotanka kamman!” Nagpakleb sa inapputna dagiti lapayagna. Pagpiaanna, simmardeng ti kanta. Ngem idi mairidep koman, addayta manen ti yodel. Ania pay, bimmaringkuas ni Macario. Linayawna dagiti nakaunnat a gurong ni Lakay Ando iti ridaw a manguk-ukrad iti magasinna. “Sinno dayta agtagtaguob dita abagatan, aya?” imbang-es ni Macario. Naglayon iti siledda ken Muyac. Nailibayen ti asawana. Innalana ti tualiana ken dagiti pamlesanna nga insagana ni Muyac. Linukot ni Lakay Ando ti magasin sa insaluksokna iti akinlikud a bolsa ti putotna a maong. “Daydiay agkankanta? Ni Pedro daydiay, baro ni kapiduam a Nardo. Isu ti lumaban inton rabii!” insungbat ni Lakay Ando. “Dehado ti sinalbag nga ubing!” “Apay, basbassit, aya?” sinaludsod ni Macario. “Agkadakkelda met ketdi ken Bitong, a, ngem di met nagpraktis. Dita met la kanipaan ti yanna. Numona ket nakitak a nagpaabagatan ni Aldong!” “Ni insan? Kueenna dita abagatan?” “Baka nakaangot. Ammom metten ni kasinsinmo. Damagko, ita ti umuna a panagluto da Nardo. Baka isungsongna ni Pedro nga uminum.” “Haan met ngata. Ammo met ni insan a maiparit ti uminum ‘ti arak no lumaban.” “Kanayon pay a mapan ag-gym ni Bitong dita ili. Adda pay coach-na a naggapu idiay Manila. Kas nakunakon, dita latta kanipaan ti yan ni Pedro nga agkankanta! Diak man ammo no apay a bosesna ti praktisenna ket dagiti met gemgemna ti usarenna!” Iti paraanganda iti akindaya a pingir ti barangay, nagpug-aw ni Dando idinto a sineniasanna ni Bitong. “Huston. Narigat no ma-over train-ka!” kinunana. Inuksotna dagiti mitt pad kadagiti imana. Nagwingiwing idi nadlawna dagiti babassit a birri dagiti glab. “Ay, salamat!” Nagpug-aw met ni Bitong. Pinasutna dagiti glabna sa ti headgear-na ket inyawatna ken ni Dando. Nadlawna ti panangmira ti coach-trainer-na kadagiti ramitna. “Hanabale, fren. Agsukatto iti baro dagita kalpasan ti piesta ti Sta. Teresita!” kinunana sa tinapikna ti abaga daytoy. “Aginanakan,” kinuna met ni Dando. “Masapul a preskoka no umulika iti ring! Innak met aginanan!” Ngem sakbay a makatallikud ni Dando, nangngegda manen ti yodel ni Pedro. Nagbang-es ni Bitong. “Maudi a kantam daytan, laglag!” inkiraudna. “Cool ka lang, Bit!” inkatawa met ni Dando. “Sige… agkitatanto laengen dita plasa no rabii!” kinunana ket timmallikuden. APAGSIPNGET no ar-arigen, addan ni Kapitan Saring iti pakaangayan ti boksing. Nagaruat iti puraw a trubenays a nakasiksikkil ti plansana a pinarisanna iti maong a pantalon. Sumilsileng ti panguloten a buokna iti pomada. Nakabannikes, kasarsaritana dagiti tanod, ngem no kuan kumita iti adayo nga abagatan. “Nasaysayaat sa, Carding, no adda dua nga agpadaan idiay salogan. Kababain met no awan eskort ni Sek. Vimar a sumrek ditoy.” Tinung-edanna ti pangulo dagiti tanod. “Awagannak a dagus no mapasangpetyo dita Palagao.” “Kunak no ni bise ti umay, kap?” kinuna ni Carding. “Adda kano immuna nga imbitasionna. Impasigud met ni Sek. Vimar a di agbayag ta adda pay pasken a papananna.” Tinapik ni Carding da Tanod Polding ken Tanod Babot. “Dakayo ti mapan mangbayabay ken ni Sek. Vimar,” kinunana. “Agkalugankayon ‘diay motorko!” Madamdama, napunnon dagiti tugaw iti aglawlaw ti ring. Uray ti puesto dagiti bisita, napunno iti agsisinnutil nga ubbing. Ngem imbes a makaunget ni Kapitan Saring, maragsakan ketdi iti reaksion dagiti kalugaranna iti tallo a bulan nga ininawda a rambak para iti umuna a tawenna iti poder. Kinita ni Kapitan Saring ti relona. Alas siete media gayamen. Alas otso ti naituding a yuuli dagiti boksingero iti ring. Naimbag ta awan pay ni Sek. Vimar. Madamdama, nagkaribuso iti pagserkan ti plasa. Adda tanod nga arintarayen a napan iti mangtestesting iti mikropono. Nakatosan sa napuyotan ti mikropono. “Kakabsat, sumungaden ti naipangruna a sangailitayo ken naipangruna nga anak ti Simbaluca! Sarabuentayo iti natibong a dir-i ken sipsipat!” Nagpalakpak ken nagdir-i dagiti tao. “Naragsak nga idadateng, Fighting Pogiii!”’ “Agbiag ni Cario!” “Naragsak nga idadateng, Mrs. Cario!” adda met nangidir-i. Bimmislin ni Kapitan Saring tapno sabtenna da Macario. Kasla di mamati ti kapitan idi addan iti sango da Macario ken Muyac. Kasano ngamin ket nagtaraki ni Macario iti derosas a long sleeves-na a pinarisanna iti maris-kape nga aggilapgilap a korbata. Maris-kape met laeng ti pantalonna. Kasla immubing met ni Muyac iti sangapulo a tawen iti bumerde a bestidona. Dina payen ammo no asino ti sungbatan wenno kitaenna kadagiti agdidippit a mangkablaaw kadakuada. “Dumanonkayo, Fighting Pogi ken Misis Pogi!” impasabat ni Kapitan Saring ket inkarigatanna a bisngayen dagiti kalugaranna tapno mawayaan ti pagnaan da Macario. “Naay, sika kadi nga agpayso, Cario?” adda nagkuna a pinasarunuanna iti garakgak. “Malagipnak pay? Siak ni Immong, daydi kaam-ammoyom iti arado. Nagrawetka idi nga agkilaw iti ararawan no agar-aradotayo, ha-ha-ha!” “Ninam, Immong Kambong!” inggarakgak met ni Macario. “Narawrawetka pay, a, ta agkilawka iti annak ti dalag!” Napuyotan manen ti mikropono. “Awaganmi man ti imatang dagiti madaydayaw a boksingero, kakabsat. Agsaganakay koman. Addan ti naisangsangayan a sangaili, ni nalatak ken popular a kalugarantayo a ni Apo Macario Mangiros alias Fighting Pogi. Kababain no pagur-urayentayo. Adda metten iti dalan ti pannakabagi ni Apo Mayor a ni madaydayaw a Sekretario Vimar Tacatac!” Nagulimek ti anaunser. Ngem madamdama pay bassit, kunam la no maparpar ti mikropono iti panagariwawana. “Dakayo nga ubbing, agtalawkayo dita! Para kadagiti madaydayaw a sangaili dagita a tugaw!” “Dumanonkayo!” kinuna ni Kapitan Saring. Sineniasanna dagiti tanod a wayaanda ti pagnaan da Macario idi dumapawda iti kongkreto a pagbabasketbolan iti panagturongda iti yan ti ring iti asideg ti permanente nga stage ti plasa. Ngem nagbang-es ni Lakay Ando ket inggawidna ti takiag ni Baket Saria. “’Ta suekosmo! Kaska met la agtaltagen!” kinunana. “Ania ngarud ti aramidek?” inyingar ni Baket Saria. “Talaga met nga aguni ta natangken ti semento!” “Bitbitem ta isuotmonto no makadanonka idiay pagtugawantayo!” Tapno sumardeng ni Lakay Ando, binitbiten ni Baket Saria ti bakiana sa insuotna idi makadanonda iti pagtugawanda iti ringside. Nagtugaw ni Muyac iti kanawan ni Macario. Naireserba ti kanigid ni Macario ken ni Sek. Vimar. Agabay ti sekretario ken ni Kapitan Saring, sa ni Kapitana Juana. Madamdama pay, rimsua ti anabaab iti pagserkan. Nabisngay dagiti tao ket addaytan ti nabaneg ken naisem a sekretario. Sinabat ti kapitan ti sekretario sa inyam-ammona kada Macario ken Muyac. Insenias ni Kapitan Saring ken ni Buyong Quiad a sekretario ti barangay nga addan iti ring a rugiandan ti ababa a programa sakbay ti kangrunaan a pabuya— ti panagboksing da Bitong ken Pedro. “Awaganmi manen da Bitong alias Fighting Bitong ken Flash Pedro. Umaykayon, kakabsat, ta rugiantayon ti programa! Umaykayon, ala, kababain kadagiti sangailitayo!” inngiwat ni Buyong iti mikropono. Nagkaribuso dagiti adda iti ruangan ti plasa. “Fighting Bitong!” adda nangidir-i ket bimtak ti makatitileng a sipsipat. Intulod ti maysa a tanod da Flash Bitong ken Dando, iti naituding a pagurayanda iti kanigid ti ring. Maong a pirpir ti gayadanna ti suot ni Bitong. Nagkagay daytoy iti lumabaga a tualia. Intayag ni Buyong ti imana tapno agulimek dagiti tao. “Ita, kakabsat, intay man dengggen ti mensahe ti naisangayan nga anak ti lugartayo,” kinunana. “Gapu kenkuana, naglatak ti Simbaluca. Gapu kenkuana, adu ti binirngasanda iti Tang Macky. Denggentay man ngarud ti mensahe ti madaydayaw a kalugaran ken naisangsangayan a sangaili, ni—” naputed ti panagsao ni Buyong idi adda agriaw iti likud. “Huston! Mangyam-ammoka laeng, agis-ispitska metten, yos!” Bimtak ti riaw ken katkatawa. Immulo ti dara ni Buyong. Nagtil-ay tapno ammuenna no asino ti nagsao. Ngem timmakder ti kapitan ket sineniasanna ni Buyong tapno ituloyna ti introduksionna. “Mapadayawanak ngarud a mangipresentar kadakayo ken ni Apo Macario Mangiros nga am-ammo iti tayak ti boksing a kas Fighting Pogi!” Itay pay damo nga ammo ni Macario nga isu ti dakdakamaten ni Buyong ket nangrugin nga alusiisen iti panangpampanunotna no kasano a maliklikanna ti agsao iti sanguanan ti nagadu a tao. Ket iti pannakaibaga ti naganna, timbogen ti nagtutukel a ling-et iti mugingna ken nagbabasa dagiti kilikilina. Kinitana ni Muyac. “Punta ka na, sweetheart. Pagbigyan mo sila!” kinuna met ni Muyac. Induron met ni Lakay Ando ti bukot ni Macario. “Mapankan, a!” Tinaliaw ni Macario ti amana. “Ania ngarud ti ibagak?” “Ibagam ti naglasatam sakbay a nagtengmo ti kasasaadmo ita! Tapno adda inspirasion dagiti ubbing,” insungbat ni Lakay Ando. Ania ngarud, kapilitan a timmakder ni Macario idi saan nga agpulsot ti dir-i ken sipsipat. Ket kalpasan ti no namin-ano a panangpunasna iti ling-et iti muging ken tengngedna, nakauli met laeng iti ring. Inwaras ni Macario ti panagkitana. Pimmigsa ti nakemna idi tung-edan ni Muyac. “Gagayyem ken kakabsat, tingkiu ta nalagipdak nga inawis!”panangirugi ni Macario. “Tiempo ti raminad idi rugiannak ni amang nga ipako iti arado ken suyod. Apo, nagrigat man ti makiammoyo no adda baimbain iti pagaraduan a kas iti dadduma a sinilong dita Sinay ken Maggurit. Apo, nagganasen a kudkoden ti rarasa ken tarindanum. Ngem nagsaniiten no kasdiay a tumapogak iti sinilong! Kaduak idi da Mang Santos. Ummi, Willy ken Bining. Makasangitak pay idi no kasdiay ti rigatko nga agar-arado ket nakaim-imas ti ilad ni amang iti pasagad a mangipapaid iti silag a kallugongna. Numona ta dina pay maitured nga ibolsa ti bisukol nga umuli iti gurongna no kasdiay nga agtagtagainep nga umay dita taltalon...” Nagriaw ken nagpapalakpak dagiti tattao idinto a napitpit ti isem ni Lakay Ando. Um-umlek met ni Baket Saria idinto a nagtungtung-ed laeng ni Muyac ta dina matarusan ti ibagbaga ti asawana. “Diablot’toy nga ubingen!” indayamudom ni Lakay Ando. “Istoriaem ti padasmo, kunam met ngamin!” inyellek ni Baket Saria. Bumaybayag, in-inut met a nagpukaw ti pannakasleg ni Macario. Nupay kasta, ininut met a nauma dagiti agdengdengngeg. Ania pay, nagiinnistorian dagitoy imbes a dumngegda ken ni Macario. Nakadlaw ni Muyac. Sineniasanna ni Macario. Saan metten a nakateppel ni Lakay Ando. Timmakder ket pinarana ni Macario. “Huston ket rabiin!” kinunana. Isu pay laeng ti pannakadlaw ni Macario nga agiinnistorian dagiti tattao. “Daydiay laeng ti masaok,” kinunana. Nagkurno ket immulogen iti ring. Nalpasen a nagsarita da Sek. Tacatac ken Kapitan Saring ngem awan pay da Pedro ken Aldong. Saanen a makaidna dagiti tattao. Bumaran ti pispis ni Kap Saring iti pasagid dagiti kalugaranna. Nakapsut kano ngamin ti lideratona. Kasano ngamin ket maymaysa kano a botos ti nangabakanna. Ket idi adda nagkuna a napia pay ti telebision ta saanna a pagur-urayen ti agbuya, timmakder ni Kapitan Saring ket pinayapayanna ni Buyong. “Bilangam ni Pedro agingga iti sangapulo. No di pay la agparang, maideklaran a nangabak ni Bitong!” kinuna ti kapitan. Nagtungpal ni Buyong. “Bilangandaka, Pedro. No dika agparang agingga iti maikasangapulo a bilangko, maideklaran ni Bitong a kampeon! Maysa... dua... tallo...” Iti intar ti kalikudan a tugaw iti kanawan ti ring, timmakder ni Lakay Nardo ket arintarayen nga immasideg ken nagpalakpak. “Umayen! Pinatuntonkon!” impukkawna. Adda nagriaw iti pagserkan ti plasa. “Addan ni Pedro!” adda nangipukkaw. Timmakder ni Macario. Naggarakgak idi nabisngay dagiti tattao. Kasano ngamin ket addaytan da Aldong ken Pedro nga arintarayen a mangsarsaruno iti tanod a mangitulod kadakuada iti naituding a puestoda a kasumbangir ti puesto da Bitong ken Dando. “Ania manen a gimik ti napanunot ni insan?” inkatawa ni Macario. “Si Al talaga. Masyadong mahilig sa dramatic entrance!” kinuna met ni Muyac. “Dida pay nagsukat!” kinuna met ni Lakay Ando. “Ania dagita imbolsana ta intugotna pay dita ring?” Intudona dagiti plastik a botelia kadagiti akinlikud a bolsa ni Aldong. “Mulumog siguro ni Pedro,” kinuna met ni Macario. Kasano ngamin ket kawes ni Aldong a nagbiahe, suotna pay laeng agingga ita. Ni Pedro met, saannan a sinukatan ti shorts-na a maong a pitakpitak. Nakasandalia laeng ket nakapatpatak dagiti kimraang a pitak a nangmilat kadagiti gurongna. Nakasalapay iti abagana ti pinagtrabahona a tisert a puraw ngata idi ngem nagbalinen a kaki. “Anawnsing da araybal op Flash Pedrooo!” inkiraud ni Buyong. Nagsisipat ken nagdidir-i dagiti kakaarruba ni Pedro iti akinlaud a pingir ti barangay. Nagkakatawa laeng dagiti kakaarruba ni Bitong. Sakbay a makapagsao manen ni Buyong, pinara ni Aldong. Immuli iti ring. Innalana ti mikropono ken ni Buyong sa pinuyotann. “Koreksion, kakabsat. Nabangsit dayta Flash Pedro nga impanaganyo iti kaanakak. Sukatantayo iti maitutop. Manipud ita awagantayon ni Pedro iti Kid Layaw! Apay? Gapu ta isu ti maibagay... gapu ta agar-aramid iti arak manipud iti nipa a maawagan iti layaw. Sipatantayo ni Kid Layaw!” Nagriaw ken nagsisipat dagiti kakaarruba ni Pedro. Immuli manen iti ring ni Kapitan Saring. “Rabiin, kakabsat, ket diak kayat nga aguraykayo pay iti mabayag. Kayatko la a bigbigen ti dakkel a panagpuspuso ni Fighting Pogi para iti parambaktayo. Ammoyo, isu ti nangidonar kadagiti tropeo. Dayta dakdakkel, a nakitikitan iti Fighting Pogi, para iti agkampeon. Agpaay ti basbassit iti Runner-up...” Nagsisipat ken nagdidir-i manen dagiti tattao. Insubli ti kapitan ti mikropono ken ni Buyong. Tinungedanna ni Buyong. “Ti oras magmagna, kakabsat, ket ngarud rugiantayon ti puon ken gapu ti nakaummongantayo ita a rabii!” kinuna ni Buyong. “Awagantay ngarud dagiti boksingerotayo ditoy ring tapno mayam-ammoda iti tallaong. Kas ammotayon, maysa kadakuada ti maideklarar a kampeon, a mangibagi kadatayo iti tinawen a Sta. Teresita Boxing Championship. Umawat ti agkampeon iti five thousand pesos ken lima tungbo nga irik ken tropeo. Maaddaan pay iti tiansa a lumaban para iti korona iti ilitayo. Ti Runner-up ditoy barangaytayo, umawat met iti dua ribu a pisos, maysa ket kagudua a sako nga irik ken tropeo. Ita ngarud, kakabsat, buyaentayo ti panaglaban da Fighting Bitong ken Kid...” “Kid Layaw!” insilpo a dagus dagiti tao, a sinaruno ti napigpigsa manen a dir-i ken sipsipat. “Paunaem nga umuli iti ring,” kinuna ni Aldong ken Pedro. “Dramatic entrance, boy! Ag-flying kiss-ka!” Ket kasla magangganasanda nga immuli iti ring. Naglayon ni Pedro iti tengnga ti ring ket nagkurno iti amin a direksion. (Maituloyto)

Images:

© PressReader. All rights reserved.