Publication:

Bannawag - 2021-11-16

Data:

Pabakunaak Kadi Dagiti Agtutubo nga Annakko? (1)

CONTENTS

Da DR. GENERALDO D. MAYLEM ken DRA. LORNALYN C. COLOMA-MAYLEM

30 Dear Doc Dear Doc Gener & Doc Lorna, Maysaak nga empleado iti gobierno ken ina ti dua—agtawen iti 16 a babai, ken agtawen iti 12 a lalaki. Agpadada nga agbasbasa iti eskuela publika. Apagisu ta online class pay laeng ti maipakpakat, saanda a basta maaakaran iti COVID-19. Naipadamag itay nabiit a mabakunaanen dagiti agtutubo nga agtawen iti 12 agingga iti 17 ket ngarud, dagitoy annakko, kualipikadoda a mabakunaan. (Iti pannakaisagsagana dagitoy a kolum, narugianen ti panagbakuna iti nasao nga age group.) Palubosak kadi dagiti annakko a mabakunaan? --Ms. Worried Covid ti Gattaran, Cagayan. Dear Ms. Worried Covid, Pudno a doktorkami ngem saankami nga eksperto iti bakuna. Ngem agpadakami a frontliners isu a kasapulan nga adalenmi daytoy, ken pabaruenmi ti ammomi maipapan iti COVID-19, pakaammo maipapan iti salun-at, ken opinion dagiti eksperto maipapan kadagiti isyu ken pakaseknan maipapan iti bakuna kontra covid. Umuna, kayatmi a trataren maipapan iti impeksion kadagiti ubbing. Ania dagiti risgo ti COVID-19 kadagiti ubbing? *Nakaro a COVID/Pannakayosapital/Ipapatay. Nababa ti risgo ti nakaro a COVID-19 kadagiti naub-ubbing ngem 19 anios. *Multisystem Inflammatory Syndrome in Children (MIC-S). Isu daytoy ti kondision wenno sakit a lumteg (inflamed) dagiti nadumaduma a paset ti bagi, a pakairamanan ti puso, bara, bekkel (kidney), utek, kudil, mata, wenno ti tian ken bagis. Saan pay nga ammo ti makaigapu iti MIS-C. Nupay kasta, nainanaig daytoy iti SARSCoV-2 virus a nakaigapuan ti COVID-19. Adu dagiti ubbing nga addaan iti MIS-C, naaddaan iti bayrus a nakaigapu iti COVID-19, wenno nayasideg iti addaan iti COVID-19. *“Long COVID.” Kaaduan kadagiti naaddaan iti COVID-19, sumayaat kalpasan ti sumagmamano nga aldaw wenno lawas: kaaduanna ti malaingan a naimbag iti uneg ti 12 lawas. Iti dadduma, karaman dagiti ubbing ken agtutubo, mainaig ti COVID-19 kadagiti sintoma nga agruar kalpasan ti sumagmamano a bulan kalpasan ti pannakaimpektar. Daytoy ti maaw-awagan iti “long COVID,” “post-COVID-19 syndrome” wenno “post-acute sequelae SARSCoV-2 infection.” Agduduma ti sintoma a pakairamanan ti nakaro a pannakabambannog, marigatan nga umanges, uyek, nadagsen a barukong, panaas kadagiti lasag, sakit iti ulo, problema iti memoria, panagpokus ken pannaturog, anxiety, ken depression. Mabalin a kumaro dagiti sintomas kalpasan ti aktibidad a pisikal wenno mental. Posible a ti Long Covid, epekto ti COVID-19 iti age group dagiti ubbing ken agtutubo, ket daytoy panagpabakuna, kissayanna ti risgo a maaddaan iti COVID-19. *Psychosocial Impact. Bayat ti pandemia, adu nga ubbing ti naaddaan kadagiti saan a direkta nga epekto ti COVID-19. Kas pagarigan, masapul a maisinada no adda naakaran iti COVID-19 a kabbalayda, wenno iti eskuela (kadagiti sumsumrek iti limited face to face a klase). No mabakunaan ti kaaduan nga agtutubo, malimitaran ti pannakaakar dagitoy iti pagtaenganda, iti klasrum ken dadduma pay a lugar. (Adda tuloyna)

Images:

© PressReader. All rights reserved.