Publication:

Bannawag - 2021-11-16

Data:

Anak ti Candon Daytoy Woman National Master

CONTENTS

Ni JERRY B.A. MALAMION

32 Anak ti Candon Daytoy Woman National Master Jerry B.A. Malamion MANIPUD pay idi agtawen iti lima, pagam-amkanen dagiti kalabanna iti lubong a buklen ti 64 a kuadrado. Ket itoy laeng a tawen, iti tawenna a 12, impaay kenkuana ti National Chess Federation of the Philippines (NCFP) ti mapagtamdan a titulo a “Woman National Master.” Ni Mecel Angela Gadut, anak da agassawa nga Emerson ken Crisanta Gadut iti Brgy. Parioc Segundo, Candon City daytoy ubing a master iti ahedres. Uppat laeng ti tawen ni Mecel idi naadalna a garawen dagiti piesa ti ahedres. Da papang ken manongna nga Emerson ti nangisuro kenkuana. Saan a lapped ti kinakurapay, inggaedna ti nagsanay ket itan, iggemnan ti titulo a WNM. Saan a rabrabak daytoy a titulo. Masapul a dumalan ti maysa nga umaahedres kadagiti adu a torneo ken pagrukodan nga ituyang ti NCFP. Ditoy Filipinas, narasay pay laeng ti bilang dagiti nakagun-od iti kasta a titulo. LIMA laeng ti tawen ni Mecel idi rugianna ti makidangadang kadagiti torneo iti ahedres. Nagdamuanna ti 4th Pangasinan Age Group Championship a naangay idiay Lingayen idi Oktubre 2014 ken ti Ilocos Sur Age Group Championship idiay Heritage City of Vigan iti isu met laeng a bulan a nakaragpatanna iti maika-3 a puesto. Gapu iti kinakirang ti torneo para kadagiti ubbing a kaedadna, kapilitan a nakilaok kadagiti umaayam nga adayo a natataeng ngem isuna. Kadagiti amin a nakisalipanna iti uneg ken ruar ti pagilian, adda latta premio wenno medalia a nayawidna. Iti National Age Group Championship (Luzon leg) idi Marso 2015 iti Ilagan City, Isabela, nagunodna ti maika-3 a puesto ken tiket a makipartisipar iti Grand Finals. Maika-5 isuna iti naangay a Grand Finals idi Abril 2015, apagisu laeng tapno mapili a maysa kadagiti mangibagi iti Filipinas iti 16th ASEAN Age Group Chess Championships a naangay iti Singapore idi Hunio 2015 a nangyalatanna iti maysa a pirak (silver) a medalia. Idi 2016, iti tawenna a pito, nagkampeon iti National Youth Chess Championship nga isu ti tiketna a nangibagi iti Filipinas iti 12th Asian Schools Chess Championship, Tehran, Iran idi Hulio 2016. Nakaala sadiay iti silver a medalia ken naikkan iti kalintegan a mangala iti titulo a Woman Candidate Master (WCM). Iti 18th ASEAN Age Group Chess Championship a naangay iti Pahang, Malaysia idi Nobiembre 25- Disiembre 4, 2017, nakagun-od iti 5 a balitok ken maysa a silver a medalia. Naibaon sadiay a kas panakabagi ti Filipinas gapu iti panagkampeonna iti National Age Group (Under-8 Category) iti Cebu City idi Mayo 2017. Iti 19th ASEAN Age Group Chess Championship a sinangaili ti Filipinas (Davao City) idi Hunio 2018, naukkoran ni Mecel iti maysa a balitok ken maysa a bronse a medalia. Iti 20th ASEAN Age Group Chess Championship a naangay iti Mandalay City, Myanmar idi Hunio 2019, inyalat ni Mecel iti 3 a balitok ken maysa a bronse a medalia iti Under-10 Category. Sabali laeng ti silver a medalia nga inyawid ti Team Philippines a nakaikappenganna. Manipud idi Grade I agingga idi limtuad ti pandemia a COVID-19, tinawen nga ibagian ni Mecel ti DepEd-Candon City iti Region 1 Athletic Association (R1AA) a nakagun-odanna iti adu a medalia ken pammadayaw. Namitlo nga imbagianna ti R1AA iti Palarong Pambansa a nakabigbiganna a kas “Youngest Player Ever to Compete in Palaro” iti tawenna nga innem iti Legazpi City, Albay idi 2016. Nagun-od pay ni Mecel ti silver a medalia iti Batang Pinoy Grand Finals (13-Under Girls Category) a naangay iti Puerto Princesa City, Palawan idi Agosto 2019. Dagita ken dagiti dadduma pay a gapuanan ni Mecel ti nangguyugoy iti NCFP a nangted kenkuana iti titulo a Woman National Master. Kinapudnona, ni Mecel ti umuna a Woman National Master a patanor ti Siudad ti Candon. Gapu iti dayta, idi Septiembre 1, 2021, inaprobaran ti Sangguniang Panlungsod ti Candon ti resolusion a nangbigbig iti gapuananna. NAIPASNGAY ni Mecel idi Abril 12, 2009. Mannalon dagiti nagannak kenkuana a da Emerson Gadut ken dati a Crisanta Valdez ti Parioc Segundo, Candon City. Duada laeng nga agkabsat ken manongna nga Emcel, 16, maysa met nga umaayam iti ahedres, iskolar ken agdama a varsity player ti University of Sto. Tomas, Manila. Iti agdama, adda metten iti Grade-7 ni Mecel iti Candon National High School. Kas met kadagiti nagannak kenkuana, kayat ni Mecel nga itultuloy ti panagay-ayamna iti ahedres bayat ti panagadalna agingga a maragpatna ti titulo a Woman Grandmaster (WGM). Arapaapna pay ti agbalin a doktor iti medisina.—O

Images:

© PressReader. All rights reserved.