Publication:

Bannawag - 2021-11-16

Data:

Padasem Man Met ti Sabong ti Samsamping

CONTENTS

Ni MERCY RAMOS-GAÑO

NO dika makaturturog wenno nangato ti bad cholesterol-mo, padasem man ti tsaa a sabong ti samsamping (blue ternate tea). Maysa kadagiti mangipaneknek iti pagsayaatan ti nasao a tsaa ni Ma’am Mary Camalig ti Currimao, Ilocos Norte (nailadawan) ken maysa kadagiti kaaktibuan nga enrolee ti School-on-the-Air (SOA) program ti Mariano Marcos State University, Siudad ti Batac. “Binigat nga uminumak iti kastoy a tsaa. Naimas ti turogko iti rabii. Pagpakalma pay iti rikna. Baka agpayso nga anti-aging daytoy ta agtawenakon iti 70 ngem kasla ubing pay laeng ti riknak,” makais-isem ni Ma’am Mary a nangistoria iti padasna iti blue ternate tea. Ken ni Ma’am Mary, walo a sabong ti samsamping ti yuperna tapno nakolkolor. Mabalin met a kissayan depende iti kayat a katayengteng ti kolorna. Agyamantayo ken ni Prof. Maura Luisa S. Gabriel, retirado a mannursuro iti MMSU-CAFSD iti panangilawlawagna iti pakaseknan dagiti makaagas a mula kasta met ken ni Ma’am Flor G. Tarriela, autor ti Weedibles ken Weedicinals, Plus Edible Flowers and More nga impablaak ti Department of Agriculture-Agricultural Training Institute (DA-ATI), Regional Training Center IV-A, mangipaneknek a makatulong ti samsamping a pangkontra kadagiti sagubanit ti bagi. Maipalagip laeng a saan koma nga agar-aramat iti ania man a makaagas a mula kangrunaanna dagiti masikog ken manarimaan ti panagpaagasna malaksid no adda pammalubos ti doktorda. Malaksid a maaramat a tsaa ti sabong ti samsamping (Clitorea ternatea ti awag daytoy a mula iti siensia), mabalin pay nga ilaok iti lutuen nga innapuy tapno agbalin a “blue rice.” Naimas pay a masalad wenno magulay. Mabalin met nga ilaok ti rangawna iti balatong ken naimas pay a masida dagiti naganus a bungana.—O

Images:

© PressReader. All rights reserved.