Publication:

Bannawag - 2021-11-16

Data:

Panagsakiaw iti Panawen ti Amian

CONTENTS

46 Panagsakiaw iti Panawen ti Amian Ronnie E. Aguinaldo (Iti daydi Tatang) Lukagennak ti inruammo a panagriing iti parbangon Tapno gaw-atek ti kallapay iti sanga ti lukban a nangpayong iti kalapaw A pangiseksekak iti sakiaw nga ipakatta iti umuna nga atab ti banatabat. Dagdagennak ti pudot a namaglimog ti kinirog a bagas ken tagapulot Tapno kamakamek dagiti tugotmo nga agturong iti baybay ti Balusibok A pagur-urayan dagiti dalluyon a nagapon iti katangriban. Sabatennak ti pul-oy a nangkarab-as iti punta A kabuyog ti mandarmo a pumidutak iti kasla gemgem a bato A pangbansorko iti kadilian a yan dagiti mamarparbangon nga ikan. Isemanta ti lawag apaman a maakasta ti sakiaw Ket imulamto manen iti panunotko ti panagsakiaw iti panawen ti amian A dalan ti lagip nga umay iti lubong a nangibatiam kaniak. --RONNIE E. AGUINALDO

Images:

© PressReader. All rights reserved.