Publication:

Bannawag - 2021-11-16

Data:

Makikasar Ngatan?

CONTENTS

Ni EDEN L. CACHOLA-BULONG

53 Dear Ikit Dear Ikit, Lima a tawenen nga adda panagkinnaawatanmi iti maysa kadagiti kaopisinaak. Nagtintinnulongkami kadagiti trabaho iti opisina. Naragsak ken napnuan respeto ti relasionmi. Ammo ti sibubukel nga opisinami ti relasionmi ket ur-urayendan ti naragsak a panagsimpami ngem gapu ti responsibilidadko a kas inaunaan iti innem nga agkakabsat, saanak nga immannugot iti panagsimpami. Agpadakami a naital-o a kas Regional Manager. Gapu ta tagaamiananak, siak ti napan iti Tuguegarao; naidestino met ti boyfriendko iti Bikol. Iti pannaginnaddayomi, naikawa iti maysa nga empleada ti Branch Office a naikaidestinuanna ket naaddaanda iti maysa nga anak. Nagkabbalayda ngem saanda a nagkasar. Pinutedko ti relasionmi nupay nagpakpakaasi a siak ti ikasarna ken katakunaynayna iti biag. Im-block-ko ti cell phone number-na; awanen ti komunikasionmi ngem dumanon met latta amin a damag maipanggep iti biagna gapu ta maymaysa a kompania ti yanmi. Pinaidestino idiay Mindanao, ngem agtultuloy ti panangsuportarna iti binulan a kasapulan ti anakna idiay Bikol. Saanko a naliklikan ti panagkitami iti maysa a lawas a komperensia dagiti Regional Managers. Maymaysa a hotel ti nagyanan dagiti tagaprobinsia a pakaibilanganmi a dua. Nagsubli ti kinapasigmi ket naipalagip ti napalabas. Indukitna manen ti panagkasarmi. Agtawenton iti 40 itoy a Disiembre ket 35-ko met idi Septiembre. Adda pay la riknak kenkuana ngem ‘diay kaadda ti anakna ken pagduaduaak ti estadona. Amangan no agpayso ‘diay photocopy ti marriage certificate nga impakita ‘diay ina ti anakna idi imparehistroda ken pinabuniaganda ‘diay ubing tapno ‘diay apeliedo ti nobiok ti usaren ‘diay ubing. Ikit, kasla kayatkon ti makipaglantip iti dati a nobiok ngem daytoy ti makatubeng. Ania ti aramidek?—Florelinda Florelinda, Nataengankayon. Adda kenka ti desision iti panaglantipyo ta sisasaganakayo metten a mapan iti naestaduan a biag. No maipanggep iti dayta ubing a kadardara iti nobiom iti sabali nga ina, pagrebbenganna dayta. Agpadpadakayo met nga addaanen iti nasayaat a pagsapulan; saanmo a rigatenen ti suporta nga it-itedna iti ubing. Anakna dayta. Rumbeng laeng a suportaranna agingga iti makaadal. Tapno maikkat ti duaduam no nakikasar wenno saan dayta nobiom, agpaalaka iti CENOMAR-na (Certificate of No Marriage) idiay Census (Philippine Statistics Authority itan). No CENOMAR ti maalam, mangipaneknek a saan a nangikasar iti sabali dayta nobiom; isu a sige, ituloyyon ti naragsak a kallaysa. Ngem no Marriage Certificate ti maited, agsanudkan ket bumirokka laengen iti napudno a mangipateg ken mangilala kenka iti agnanayon. Naimbag a gasatmo, kaanakan.—Ikitmo

Images:

© PressReader. All rights reserved.