Publication:

Bannawag - 2021-11-16

Data:

TIPS Tarabay iti Pagtaengan, Salun-at ken Dadduma Pay

CONTENTS

Inurnong ni ELIZABETH M. RAQUEL

57 Tips KAANO NGA AGSEPILIOKA? Maibagbaga a no mabalin, agsepiliotayo tunggal malpastayo a mangan. Nupay kasta, ibalbalakad dagiti dentista a ti koma umuna ken maudi nga aramidentayo iti inaldaw, isu ti panagsepilio. Agsepiliotayo sakbay a maturogtayo, ken kalpasan a bumangontayo. Kunada a ti kataytayo, tumangken bayat ti pannaturogtayo ket ngarud arigna kumotanna ti rugit dagiti ngipentayo isu a nasken nga agsepiliotayo sakbay a maturogtayo. Ket inton makariingtayo, agsepiliotayo met laeng tapno maikkat ti rugit ken bakteria a napataud kadagiti ngipentayo iti nagpatnag. (Ladawan: www.drmlandy.com) SABALI PAY A PAKAUSARAN TI NALABAGA TI ITLOG. Napintas nga aramaten ti nalabaga ti presko nga itlog (egg yolk) a kas “taraon” ti kudil babaen ti panangaramid iti daytoy a kas “skin mask.” Namsek iti Bitamina A, makatulong daytoy a mangpasalun-at iti kudil ken mangiliklik kenka iti taramidong. Mabalinmo pay a nayonan daytoy iti abokado ken virgin coconut oil tapno agbalin a moisturizer. Kas taraon ti buok, mangbatil iti 6-7 a nalabaga ti itlog (wenno agbatay iti kaatiddog ti buok) sa isapsapo iti buok. Bayan iti uneg ti 20 a minuto sa bugguan iti nalamiis a danum. Aramiden daytoy maminsan iti makabulan. (Ladawan: ww.thelifejolie. com) AWAN KAS ITI DANUM NO AGTOMARKA. Adda dagiti panagadal a ti orange juice wenno apple juice nga ibulon iti agas a tomaren (mairaman ditan tableta wenno kapsula), apektaranna ti benepisio a magun-od kadagitoy nga agas. Adda pay dagiti panagadal a mangipakita nga adda negatibo nga epekto dagiti dadduma a tubbog ti prutas kadagiti agas a para iti sakit ti puso ken kanser. Tapno makasigurado, maibalakad nga awan kas iti simple a danum nga ibulon iti ania man nga agas. (Ladawan: www. designerspics. com)

Images:

© PressReader. All rights reserved.