Publication:

Bannawag - 2021-11-16

Data:

Musika iti Amianan a Luzon, maitandudo iti AmiananPop

CONTENTS

Ni ANGELO ‘ELOY’ PADUA

AD-ADDA a pannakaawat no ania ti kultura ken identidad ti Amianan a Luzon babaen ti kontemporario a musika. Dayta man, ‘bagis, ti kayat nga itandudo ti AmiananPop Music Inc. iti panangiwayat daytoy iti AmiananPop, salip iti panagsurat iti kanta. Nainspirar iti Visayan Pop Music Festival (Vispop) ken Mindanao Popular Music Festival (MinPop), panggep daytoy nga itandudo dagiti sumingsingising a kompositor, kumakanta, musiko, ken prodiuser manipud kadagiti rehion ti Ilokos, Cordillera, Tanap ti Cagayan kasta met kadagiti lugar iti Tengnga a Luzon a saan a Tagalog. Babaen ti AmiananPop Songwriting Festival 2021, maallukoy dagitoy a mangsurat, mangirekord ken mangiprodius iti bukodda a kanta ta segun ken ni Davey Langit a pundador ken pangulo ti grupo, addaan ti tunggal lengguahe iti kabukbukodan nga istoria ken wagas ti panangipeksa. Panggep ngarud daytoy a gannuat ti makabukel iti baro a komunidad dagiti para istoria babaen ti musika. Panggep pay daytoy tinawen a salip a padur-asen ti moderno a rehional a musika ket maisaad iti mainstream babaen ti pannakaisagana dagitoy a naimbag. Segun ken ni Ebe Dancel a maysa a pundador ken presidente ti AmiananPop, masapul a nasayaat ti pannakasurat ken pannakaurnos dagiti kanta. Iti met biang ni Noel Cabangon, a maysa kadagiti pundador ken kameng ti Hunta, masapul a maipakita iti sentro ti musika (Kamanilaan) nga addaan met ti Amianan iti agtultuloy ti panagdur-asna a kultura ken musika. * * * Dagitoy ti finalist iti umuna a bansada ti AmiananPop: Angelic Mateo babaen ti kanta a “Sungbat,” Harold Lumandaz babaen ti “Urayen Ka,” Jomabel Trapse babaen ti “Bisikleta,” Fernan Castro Estrada ken Melchor Orpilla babaen ti “Lainëng Onan Aro,” Ryan Madrid ken Kimberly Collado babaen ti “Pudno nga Ayat,” Ruth Lee Resuello babaen ti “Agka Mapaga,” Ruth Lee Resuello babaen ti “Anto Kasi Ngaran Tu Man,” Rivah-Anne Singson ken Remedios Singson babaen ti “Napacurug Nga Aya,” Red Gumayagay babaen ti “Arapaap” ken Patrick Visto babaen ti “Lab Story.” Maiparang dagitoy a kanta babaen ti online inton Disiembre 4, 2021. Padaananyo. Ita pay laeng, bisitaenen ti opisial a Facebook page daytoy iti facebook.com/AmiananPop.—O

Images:

© PressReader. All rights reserved.