Publication:

Bannawag - 2021-11-16

Data:

Masaksaktan Met ni Kim iti Ibagbaga Dagiti Bashers

CONTENTS

Ni REGGEE BONOAN

NAPALALO ti pannaka-bash ni Kim Chiu itay napan a tawen mainaig iti kunana a “bawal lumabas.” Nag-viral daytoy ken nayaramidan kadagiti nadumaduma a meme. Naaddan pay iti kanta mainaig iti daytoy. Ti adatna, manipud iti daytoy nga insidente, saan metten nga ininggaan dagiti netizens. Iti panagrikna ni Kima, amin a garawna, sipsiputan dagiti netizens. Amin nga aramidenna, dillawenda. Kuna ketdi ni Kim iti maysa nga innuman a masapul a makasursuro ti tao manipud iti riro a naaramidna iti napalabas. Kalpasanna, aywananna ti salun-at ti panunotna. Kasta met a salaknibanna ti bagina manipud kadagiti mangpasakit kenka. Ta kas kadagiti sabsabali a nalatak a tattao, tao latta met ni Kim a masaktan. Maipapan kadagiti nasasakit a sao a maaw-awatna, panunoten latta no kuan ni Kim a saanna met a personal nga am-ammo dagitoy ket ngarud, saanda nga ammo ti pudno a kabaelan ti panunotna. Iti sabali a bangir, ikagumaanan met latta no kuan ni Kim nga awaten dagiti nasasakit ti panagsasaona mangruna ita ta tiempo ti pandemia, narigat ti biag. Ken uray isuda a mismo iti showbiz, saan met a kas kalakana ti biagda. Iti 15 a tawenna iti showbiz, kuna ni Kim a napadasanna aminen— nam-ay man wenno rigat. * * * Nagpirma itay nabiit ni Alden Richards iti baro a kontrata iti GMA-7. Iti daytoy baro a kontrata ni Alden, dinakamatna a mangnamnama a maaramidna dagiti proyekto a dina pay naipakita kadagiti agbuybuya. Kunana nga iti daytoy nga estado ti biag ken career-na, ad-adda nga agirayen kadagiti proyekto a mas eksperimental ken/wenno kadagiti proyekto a mabalin nga isalip iti sabali a nasion. No iti napalabas a 10 a tawen ti career-na ket ad-adda a ‘good boy’ dagiti akemna, itoy a gundaway, kuna ni Alden a nakasagana metten a mangawat kadagiti naidumduma nga akem. Iti daytoy umay a Nobiembre, agbida manen ni Alden iti teleserye a “The World Between Us.” Magagarankami a mangbuya iti daytoy ta posible a ditoy a maipakita ni Alden ti dakdakamatenna a naidumduma nga akem.—O

Images:

© PressReader. All rights reserved.