Manila Bulletin

Ti Puraw a Pusa

Jorge Richard P. Guerrero

NAKATANGAD, nainayad ken agpalpallayog ti ipusna, kasla reyna a nagna ni Orang iti sango ni Delfin a nakatakder a mangmirmira iti maysa a bassit a papel iti silnag ti bombilia iti poste ti elektrisidad iti sango ti balayda.

Natiliw dagiti mata ni Delfin ti pusa. Minatmatanna. Puraw ti dutdotna; naurnos a kasla nasagaysay.

Sinipsiputan ni Orang ni Delfin bayat ti iseserrek daytoy iti balayda. “Nalpaskan!” inggarikgikna. “No ammom la koma ti pudno a kolorko!”

Puraw a pusa ti nakita ni Delfin. Ngem ti kinaagpaysona, maysa a nangisit a pusa.

Saan a gagangay a pusa ni Orang. Kameng ti Malus, grupo dagiti nangisit a pusa.

Lumasat laeng ti maysa a Malus iti sango ti biktimaenna, agmalasen daytoy.

Tinawen, adda ritualda. Magunggonaan ti makabiktima iti siam a tao iti uneg ti siam a bulan. Ngem pannusa ti agur-uray iti mapaay.

“Ibanagtayo daytoy ta isu ti nakaiparsuaantayo. Ngem diyo koma gunggundawayan ti kaadda ti naidumduma a kabaelanyo. Sagrapenyo ti bunga ti ania man a biddutyo!” impalagip ni Irin a panguloda.

Ngem agparparikut ni Orang ta maudin nga aldaw iti maikasiam a bulan ngem walo pay laeng dagiti nabiktimana. No makita dagiti tattao, agsanudda. Awan ti mayat nga umasideg kenkuana.

Dina kayat ti madusa isu nga impakatnan ti orasion a Candidum. Babaen daytoy, mabaliwanna ti kolorna. Ket puraw ti napilina a marisna para ken ni Delfin.

Naragsak ni Orang a nagpaliiw iti sango ti balay da Delfin. “No adda agsaning-i, kompleton ti balligik!” idirdir-ina iti panunotna.

Agar-arapaap ni Orang idi masay-upna ni Irin. “Apo Irin, umaymo kadin yawat ti gunggonak?” kinuna ni Orang.

Serioso ni Irin. “Intuloymo a talaga ti nangusar ti Candidum, Orang?”

“Awan paglintegantayo a mangipawil iti inaramidko, Apo Irin!” inkalintegan ni Orang.

“Agpayso. Ngem nasadutka a mangadal kadagiti bambanag maipapan kadatayo!”

“Urayenta dagiti saning-i.” Nagwingiwing ni Irin nga immabay ken ni Orang. Madamdama pay, nakangngegda iti sangit. Langa ni Orang ti agpannakkel. “Naatake ni Delfin!” kinunana. “Agyamankami unay kenka, Apo!” Naburburtiaan ni Orang. “A-apay nga agyamyamanda?”

Nagngirsi ni Irin. “Sangit ti ragsak ti nangngegmo itay! Nangatiw ni Delfin iti lotto! Dimo mangngeg nga agbuybuyada iti telebision?”

“Ngem kinamalas ti insangbayko kenkuana, saan a kinabaknang!”

“Orang, no koma inammom dagiti maipapan kadatayo, ammom koma a no makakita ti tao iti uray maysa laeng a puraw a dutdot ti nangisit a pusa, naimbag a gasat ti sumangbay kenkuana.”

Dimmakkel dagiti mulagat ni Orang.

“Di mabilang a puraw a dutdot ti nakita ni Delfin kenka,” intuloy ni Irin. “Isu a di agpatingga a naimbag a gasat ti sumangbay kenkuana… Saanka laeng a napaay, imbabainmo pay ti pulitayo. Rumbeng a madusaka.”

Nagsangit ni Orang. “Pakawanennak, Apo Irin! Ikkannak koma pay iti gundaway nga agbalbaliw!”

Pinerreng ni Irin ni Orang. Maasian unay. Ngem dina mabalin a salungasingen ti paglinteganda. Inaprosanna ti muging ni Orang. Kalpasanna, pimmanawen. Di pay nakaadayo, nangrugin a mauram ti muging ni Orang. Dagus a nagkayamkam ti apuy iti rupa ken bagina. Saanen a nakakuti.

Ket nagari ti makapaaliaw a sangit ti pusa iti dayta a pasado alas nuebe iti rabii.—O

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/281509344780501

Manila Bulletin Publishing Corp