Saludsodem ken ni Apo Hues

SALUDSOD:

Daytoy OSCA Head-mi, nalpasen ti terminona. Ngem gapu iti pandemia a COVID-19, awan met naangay nga Asamblea Heneral a pakapilian koma dagiti mainominar a senior citizen a pangpilian ni Apo Mayor iti OSCA Head. Gapu met itoy, nagboluntario ti nagpaso ti takemna nga OSCA Head-mi nga ituloyna ti panagserbina a kas temporario nga OSCA Head.

Ita ta addatayon iti Alert Level 1 ti COVID-19, mabalin met ngatan ti mangangay iti Asamblea Heneral tapno addan madutokan a baro nga OSCA Head. Ania ti makunayo, Apo Hues a kas presidente ti pederasion dagiti gunglo dagiti senior citizen iti Rehion 1?—Municipal Social Development Officer ti maysa nga ili

SUNGBAT:

No ti OSCA Head ket nalpasen ti tallo a tawen a terminona, saanen a mabalin nga ituloyna ti kina-OSCA Head-na, uray makuna a temporario laeng. No awan ti madutokan ti mayor, saanna met a mabalin ti mangdutok iti asino man nga agboluntario a para iti dayta a takem, ken dina pay mabalin ti mangdutok iti temporario nga agakem nga OSCA Head, kas sagudayen ti Akta Republika 9994.

Ania ngarud ti rumbeng a maaramid? Ti mayor no kuan ti agpirma iti I.D., agited iti booklet a maaramat iti panaggatang iti agas, ken booklet a para iti groseria, kdp.

Daytoy met panangangay iti Asamblea Heneral, iti laksid nga addatayon iti Alert Level 1, ditay met masigurado nga awanen iti coronavirus. Dayta ti gapuna nga itultuloytayo latta dagiti pagalagadan iti salunat nga impaulog ti Departamento ti Salun-at. Nasken nga agusartayo latta iti face mask, kitaentayo nga agaaddayotayo pay laeng a saan ket nga agtitipkeltayo a kasla abal-abal sakbay ti pandemia, ken di liplipatan ti panangbuggo kadagiti ima iti danum ken sabon. Iti sabali a pannao, saantayo koma nga agdardaras.

Dayta met ti gapuna a nasurokton a dua a tawen nga awan miting dagiti senior citizen iti agpang ti barangay, ili, probinsia, ken rehion ta narigaten. Di la ammo no adda ketdi uray maysa laeng kadatayo nga addaan iti dayta coronavirus ket ditan a mangrugi ti panaginnakar.

Dumtengto laeng ti umno a panawen a panagraraguptayo manen. Agiinnanustayo koma.—O