No Adda Sigsigloten, Adda Met Warwaren

ITI napalabas a kolum, naammuantayo a ni Satoshi Nakamoto ti immuna a nangminas iti kaunaan a bitcoin (BTC) idi Enero 3, 2009.

Asino kadi ni Satoshi Nakamoto?

Daytoy ti alias nga inusar ti maysa a tao a mangibagbaga nga isuna ti nangsurat iti code para iti bitcoin ken inrugina nga insurat daytoy idi 2007. Idi Agosto 18, 2008, inrehistrona iti www.bitcoin.org.

Idi Oktubre 31, 2008, impablaak ni Satoshi ti maysa a white paper wenno maysa nga dokumento a nakailanadan ti impormasion maipanggep iti digital cryptocurrency. Daytoy a white paper ket napauluan iti “Bitcoin: A Peerto-Peer Electronic Cash System.”

Sumagmamano nga aldaw kalpasan ti pannakaminas (wen, dayta ti termino wenno awagna) iti umuna a bitcoin nga itan ket maaw-awagan iti genesis block wenno block number 0, impablaak ni Satoshi ti version 0.1 ti bitcoin software. Ti genesis block ket addaan iti reward a 50 BTC. Kayatna a sawen, kaka, a daytoy genesis block ket agbalor itan iti PhP110-milion! (Ti maysa a BTC ket agbalor iti merkado iti PhP2.2-milion.)

Maysa pay, adda ‘nakalemmeng’ a mensahe iti genesis block. “The Times 03/Jan/2009 Chancellor on brink of second bailout for banks.” No i-Google-mo daytoy, kaka, ket maammuam a daytoy ti headline ti The Times idi Enero 3, 2009. Ti The Times ket maysa nga inaldaw a pagiwarnak idiay United Kingdom.

Saan ngata nga agindeg ni Satoshi idiay UK idi minasenna ti genesis block?

Kinaagpaysuanna, agingga ita, awan makaammo no asino ni Satoshi Nakamoto. Adda dagiti mangibaga a maysa a Hapon. Adda met dagitay agkuna a ni Satoshi Nakamoto ket maysa a collective wenno gunglo dagiti tattao nga agpapada iti kapanunotan maipanggep iti cryptocurrencies.

Insardeng ni Satoshi ti makipartisipar iti panagsurat iti source code ti BTC idi 2010. Mapattapatta nga agtagikua isuna iti manipud 750,000 agingga iti 1.1 a milion a BTC. No kasta ngarud, agdagup iti manipud PhP1.65-trilion agingga iti PhP2.42-trilion dagitoy itan.

(Adda tuloyna)