Ti Puga (54)

Ti Napalabas: Tiniliw dagiti polis ti Mexico ni Melanie ket impanda iti maysa a nalimed a pagbaludan. Maburiboran met ni Dir. Bosworth ta nagpukaw ti dirty bomb ken ni Melanie. Nagpatulong ken ni John ngem immanugot laeng ni John idi pinatay ni Sec. Sandoval ni Rudy. Naammuan ti direktor nga adda pannakainaig ni Sec. Sandoval iti dirty bomb. Diniskarilda ti riles a pagnaan ti tren a pagarupenda a nangilugananda iti DB. Natakuatanda a sabali ti nakailugananna ket nangipasdekda iti checkpoint. Ngem naipalusotda latta ti bomba. Mapan koma da Melanie iti destinasion daytoy ngem maysa a helikopter ti nangtinnag iti helikopterda. In-set ni Pablo ti bomba sa pinatayda da Mr. Aleksandr. Nagturong met da John ken Ricky iti Las Vegas. Nakitada ni Mr. Hutchison a simrek iti hotel. Sinurotda. Naammuanda nga adda pay ni Sec. Sandoval sadiay. Pinatayda dagiti tao daytoy sa sinerrekda ti penthouse a yanna.

(Maika-54 a Paset)

NAKADADDADAKKEL dagiti mulagat ni Sec. Sandoval a nakamuttaleng iti dua a parsua a sumarsarakusok iti yanda. Umap-apuy ti murdong dagiti paltogda iti awan sarday a panagipugso dagitoy iti buli. Arig nagsasaganad ti pannakatublak dagiti taona.

Naikali dagiti matana ken ni John Villa, ti tao a nakaituonan amin a rurod ken gurana. Agpuspussuak ti tarigagayna a mangpapatay iti daytoy. Impangpangtana a papatayenna no makitana. Tinagtagibassitna. Kunana a saan a kabaelan daytoy ti mangsangdo kenkuana. Ita, addan iti sangona. Duada laeng. Saan kadi a daytoy ti inur-urayna a kanito?

Naasutnan ti paltogna. Siguradona a mapuntaanna ni John. Ngem dayta, matmatmatanna ti paltog ni John a nakapaturong kenkuana. Sa agsalsala iti panunotna ti kinaasintado daytoy. Iti iseserrekda iti kuartona, lima a taona ti pinadso daytoy. Awan pulos mintisna! “Ricky, umawagka iti ambulansia,” imbilin ni John. “An-anuem?” inreklamo ni Ricky. “Apay a tulongam dagita nga anak ti— Bay-am ida a maustil!”

“Saan a para kadakuada. Para iti sekretario.” “Ania?” Nasdaaw ni Ricky. “Pangilugananta kadakuada ken Deputy Hutchison nga ipan iti siudad...”

Adda panagkedked ni Ricky.

“Come on... just do it, sergeant!” Naturayen ti timek ni John.

Saanen a nagtimek pay ni Ricky. Inruarna ti selponna ket nagdayal. Imbagana nga adu ti nasugatan iti penthouse ti casino.

“Ania, Mr. Sandoval, agdisnudoka kadi a mangibaba iti armasmo wenno paltoganka? Agpilika, sir .... ” kinuna ni John.

Immisem ti sekretario a kasla napasublinan ti simbeng ti nakemna. “Wenno sika ti paltogak, John...”

Apagasngaw ti katawa a simngaw kadagiti bibig ni John. “Panagkunak, nakurang pay laeng ti panagtalekmo iti kabaelak, sir.”

“Ken dinak pay am-ammo, ubing... Saanak a nagbalin a nabileg a tao iti sibubukel a lubong no awan ti inalatko... Datiak a marksman. Asintadoak.”

“Husto, sir, dati. Idi. Napalabasen. Agarudok metten nga agpababa ti kinalaingmo idi... Isu a damagek manen: ibabam ti armasmo wenno...”

Nagngirsi a nagwingiwing ni Sec. Sandoval. “Ket no saan, kunak... ania ti aramidem?” Mangarkarit, ngem arig dina pay naibalikas amin ti kayatna nga ibaga, nagunin ti paltog ni John. Naipuruak ti paltog ti sekretario.

Napanganga ti lakay. Winagwagna ti dakulapna ta nasaktan iti kasla pannakarabsut ti paltogna iti imana.

Nangngegda ti panaglukat ti elevator. Ammo lattan ni John a dagiti medical technician ti ambulansia dagiti dimteng. Saanen a nagtaktak pay. Pimmaltog manen. Nalugpi ti sekretario.

Ginammatan ni Sec. Sandoval ti luppona a napaltogan. “You, son of a bitch! You, son of a bitch!” inyikkisna.

“Dayta laeng ti kabaelam nga ipakita kaniak, Mr. Sandoval?” inlais ni John. “One of the most powerful men in the world... You, effing useless shit... You’re an asshole. And you are a disgrace to our nation!” Ket iti nagtutuon a rurodna iti lakay, dinanogna ti subsob daytoy. Nakusbo a kasla ubing ti sekretario.

Simrek ti dua a lallaki a mangidurduron iti stretcher. Limmingay ni John.

“There’s one in here that needed help,” kinuna ni John iti teknisian a mangidurduron iti stretcher.

Napardas ti teknisian a nagturong iti nakaarinuknokan ni Sec. Sandoval. Tinulongan ni John a nangilugan iti lakay iti stretcher. Impatuldo met ni Ricky ti yan ti nakapukawan ti puot ni Deputy Sandoval iti maysa pay a teknisian.

Apaman a naiplastar ti teknisian ti sekretario iti stretcher, pinaturongan ni John iti paltog. “Uksobem ti unipormem,” imbilin ni John.

Napamulagat ti limmabaga a teknisian. “Sir...” “Sorry... I got nothing against you. I’m not gonna harm you. I just wanted your uniform, am I making myself clear?”

“Y-yes, sir...” insungbat ti teknisian nga agbubuteng. Inuksobna a dagus ti unipormena. Inyawatna ken ni John.

Nairana a kadakdakkel ken kabagbagi ni John ti teknisian. Inuyosna met ti lupotna sa inyawatna iti teknisian.

Innala ni John ti radio ti teknisian agraman ti selpon daytoy. “Don’t call anyone... and whatever happened here stays here... and you didn’t see us, you didn’t recognize us, do you understand?”

Nagtungtung-ed ti teknisian.

“Wen gayam, malasinmo daytoy?” Intudo ni John ti sekretario a nakabitanen iti oxygen iti stretcher.

Miningmingan ti teknisian ti sekretario. Kasla naikuleng, sa kinunana: “S-saan, sir... Diak am-ammo dayta a tao...”

“Good. Nasaysayaat no bassit ti ammom,” kinuna ni John ket induronnan ti stretcher a nakailuganan ni Sekretario Sandoval. Nadanonna iti lobby ni Ricky a mangisusuot met iti uniporme ti kinuyogna a medical technician. Nakagaluten ni Deputy Hutchison iti stretcher. Kas ken ni Sekretario Sandoval, nakabitan met daytoy ti oxygen.

“Hurry up... let’s go,” kinuna ni John ken ni Ricky.

“I’m right behind you,” insungbat ni Ricky. Naisuotnan ti uniporme ti medical technician. “Remember, we were not here... Do you understand?” impakamakamna a kinuna iti teknisian.

Nagtung-ed ti teknisian.

Ket nakaparpardasen ni Ricky a nagturong iti elevator a pagur-urayanen ni John. Madamdama pay, bayat ti panagpababa ti elevator iti ground floor, nakaul-ulimeken dagiti aggayyem a mangbuybuya kadagiti dua a lallakay iti stretcher. Narigat a malasin ti kinasiasino dagitoy gapu kadagiti oxygen mask a nakakapet kadakuada.

Saan a nagbayag sa nakagtengda iti ground floor. Naglukat ti elevator. Nakatingtinggaw a pukkaw ti nangsarabo kadakuada.

“Freeze! Raise your hand!”

Nakaad-adu dagiti kameng ti SWAT iti sango ti elevator. Nakapaturong dagiti paltog dagitoy kadakuada. Inngato da John ken Ricky dagiti imada.

“Medical technician, sir...” imbaga ni John.

“Okay... okay...” kinuna ti pannakapangulo ti SWAT team. “Anything going on upstairs? Any more injured? Casualties?”

“A few more, sir,” kinuna ni John. “But I have radioed our base to send more ambulances...”

“Okay... okay... go!” kinuna ti polis. Nagdardarasen da John ken Ricky a rimmuar iti ospital. Tinurongda dagiti naintar nga ambulansia. Pinilida ti panakkelen bassit tapno mapagabayda dagiti stretcher. Nagtalinaed ni John iti likud ta bantayanna dagiti dua a lallakay nga agpada nga awanan pay laeng iti puot. Ni Ricky ti napan iti sango ti manibela. Pinagunina ti wangwang ken biniagna ti aggilapgilap a silaw ti ambulansia ket nakaparpardasdan a pimmanaw iti casino. Kimmamangda iti freeway. Nasken a makagtengda a dagus iti nakaiposisionan ti dirty bomb. Inwekwek ni Ricky ti siliniador. Nakawaywaya ti freeway. Awan ti uray maysa a lugan ta sinerraanen ti Nevada Highway Patrol ti sibubukel nga I-15 freeway nga agturong iti Las Vegas.

TNasurok nga uppat a pulo a minuto laengen sa bumtak ti bomba, ngem di ammo ni John no kasano a ma-disarm-na daytoy.

ANGTANGADEN ni Melanie dagiti dua a helikopter nga agam-ampayag iti tangatang. Rumanipak dagiti .50 caliber a machine gun-da. Pasaray makapuntada kadagiti lugan iti baba, ket no ti

gasolina ti matamaan, bumtak sa maipallangatok ti lugan.

Agsinsinnikap dagiti dua a helikopter. Kumalay-at ti maysa, sumurot ti maysa sa paratupotenna iti machine gun. Ngem agsuek met ti maysa a kasla kayatna ti makidinnungpar ket aglisi met ti maysa.

Immasideg ni Melanie ken ni Sheriff Frank. Sinaludsodna no adda nabileg nga sniper rifle daytoy. Nagpaala gayamen ti sheriff.

Simmangpet ti maysa a SWAT a nakaiggem iti sniper rifle nga addaan iti dakkel nga scope. Innala ni Melanie ti riple. Kinayangna ti tripod daytoy sa insadagna iti tuktok ti maysa nga squad car. Sinirigna ti scope. Sinapulna dagiti dua a helikopter a kasta unayen ti namsaakanda iti baba. Adun ti nadadaelda. Pati dagiti hotel, mabutbuttawan dagiti didingda.

Nagparang ti ladawan ti maysa kadagiti helikopter iti scope. Sinirig ni Melanie, ngem ti bagi ti pannakabagi ti linteg. Sinarakna ti sabali. Sinirigna. Kasla adda markana a helikopter ti military.

Inyadayona dagiti matana iti scope. Intayana ti dakulapna iti polis, a nakaawat met no ania ti dawdawatenna: ti magasin ti riple. Intedda kenkuana. Insalpakna ti magasin. Ginuyodna ti charging handle, timmal-o ti maysa a bala ket induronna ti charging handle.

Insublina dagiti matana iti scope. Sinapulna manen ti kabusorda a helikopter. Nakitana daytoy. Ngem nakuti unay. Pumangato a pumababa ken agtultuloy ti panagpalpaltog daytoy. Madamdama pay, nakapegpegges a nagpangato daytoy. Insurot ni Melanie ti scope-na. Ammona a marigatan a mangpunta ngem impangatona ti scope ket kinarkulona ti pagturongan ti helikopter sakbay nga agpababa. Kinalbitna ti gatilio... ket siniputanna ti dakkel a bala nga agtaytayab nga agpangato. Ping!

Napuntaan ti helikopter, ngem saan a nakaanay a nangdadael iti daytoy.

Ingguyod manen ni Melanie ti charging handle ti riple sa induronna met laeng. Sinirigna manen ti scope. Agpababan ti helikopter. Pinuntiriana iti baba nga ammona a pagturongan ti helikopter.

“Hit!” inriaw ni Sheriff Frank.

Immapuy ti helikopter. Bimtak. Napisangpisang iti tangatang.

Nagririaw dagiti tattao.

“Good job, Melanie,” inkablaaw Sheriff Frank. Nagbalaw ni Melanie. Awanen ti pinnaltog iti aglawlaw. Ania ti napasamak? Nagbuteng kadin dagiti kabusorda iti pannakakitada iti pannakadadael ti helikopterda? Nagamak dagitoy isu a nagsanuddan? Ngem sadino ti nagturonganda?

“So quiet,” nayesngaw ni Sheriff Frank. “Something is wrong,” innayon ni Agent Schummer. “We have to check,” kinuna ni Melanie. “We have to go in...”

“Still dangerous,” insupiat ti sheriff.

“But the bomb is ticking, sheriff... It has to be disarmed... immediately...”

“SWAT team!” impukkaw ti sheriff.

“Yes, sir!” insungbat ti teniente ti SWAT.

“Prepare for attack!”

“Yes, sir!” kinuna ti teniente. Inawaganna ti unit-na. Imbilinna ti panagpormasionda. Nagiintar dagitoy a nagaabay. Nakapaturong dagiti ripleda kadagiti dua a trak. Mayang-anginen ti nakapuspuskol itay nga asuk ket agin-inuten a lumawag ti yan dagiti trak.

“They are ready,” kinuna ni Sheriff Frank ken ni Melanie.

“Let’s go, Agent Schummer,” kinuna met ni Malenie. Nagturongda iti likudan dagiti nagaabay a kameng ti SWAT.

Nakain-inayad dagiti SWAT nga immasideg kadagiti trak.

Nakaul-ulimek latta met ti aglawlaw. Awan ti mangpalpaltog kadakuada.

Sadino ti napanan dagiti kabusor?

Idi makaasidegda, nakitada dagiti naudatal a nakaabungot. Impulsuanda dagitoy. Awanen biagda. Inikkatda dagiti abungot dagitoy. Agpapadada a ganggannaet.

“Agent Venus!” pagammuan la ta impukkaw ni Agent Schummer. “Umaymo kitaen daytoy!”

Nagdardaras ni Melanie a nagturong iti yan ni Agent Schummer. Nagmulagat idi makitana ti naidasay iti kongkreto. Ni Mr. Alekzander! Saanen nga aggunggunay!

“Any sign of life?” sinaludsodna. Nagwingiwing ni Agent Schummer. “Iti dayta a kaadu ti bala a simrek iti bagina, makalasat pay?”

“Ania ngata ti napasamak? Maburburtiaanak...” kinuna ni Melanie. Kayatna nga amirisen ti bagi ni Mr. Aleksandr ngem nalagipna ti dirty bomb. “You need to disarm that bomb...”

“Yes,” insungbat ni Agent Schummer. Kimmalay-at iti trak. Tinurongna ti dakkel a kahon iti likud.

Nagsukimat met ni Melanie iti aglawlaw dagiti trak. Ammona nga adda agarup duapulo dagiti naglugan kadagiti dua a trak. Sangapulo laeng dagiti natay. Sa ganggannaetda amin. Sadino ti yan ni Pablo? No natay, adda koma ti bangkayna. No naglibas, nakitada koma kadagiti CCTV.

Ad-addan a naburburtiaan. Masuronen. Agingga iti napanunotna ti simmirok iti maysa kadagiti trak. Awan met hidden compartment ti trak. Apay koma ngamin a pilienda ti hidden compartment no isu ti pakatayanda?

Nagkaradap a nangkita iti sirok ti trak. Agingga iti nakagteng iti medio katengngaanna. Nakitana ti maysa a nakalukat a manhole iti kalsada a nairanta a pagserkan dagiti agtrabaho iti sewage no adda problemada.

Ditoy ti naglibasanda! No kasta, addada ngarud ita iti underground a pagdalanan ti danum no kasta a malayus ti siudad. Ngem sadino ti papananda?

NAKAPIGPIGSA ti wangwang ti ambulansia a manmanehuen ni Ricky. Agturongda iti Las Vegas Boulevard, iti sango ti MGM Grand. Gapu iti kaawan dagiti lugan, nakaparpardasda. Asidegdan iti Silverton Hotel and Casino. Saan pay a nakapuot da Mr. Sandoval ken Mr. Hutchison. Kaykayat ni John a kasta. Kayatna nga awan ti puotda a makagteng iti

destinasionda tapno saandanto a pulos a maammuan ti napasamak iti biagda. Agrikabrikab pay laeng ti barukongna iti saan a mapunas a rurodna kadagitoy dua a lallakay iti panangpapatayda ken ni Rudy.

Nasinga iti panagkiriring ti selponna. Inruarna ti selpon. Ni Director Bosworth.

“Yes, sir... what can I do for you?” sinaludsodna a dagus.

“How close are you to MGM Grand?”

“About five minutes, sir...”

“Masapul ni Agent Schummer ti tulong a mangdisarm iti dirty bomb. Saanna a kabaelan. Dina ammo ti aramidenna. Komplikado kano unay.” “Asidegkamin, sir...”

“Ania dayta makaringgor?”

“Wangwang, sir.”

“Nakalugankayo iti ambulansia?”

“Yes, sir...”

“Naggapukayo iti Primm Hotel and Casino?” Naklaat ni John. “Sir...”

“Adda kano pinnaltog idiay. Sumagmamano ti natay... ken addada nasugatan. Adda kadi pannakainaigmo...?” “Sir...”

“Yan ti sekretario ken ni Deputy Hutchison?” Agduadua ni John no ibagana ti pudno.

“Come on, Agent Villa... answer me... what happened to them?”

“You placed a tag on my head, sir... dead or alive... I am no longer with the agency...”

“You are in the agency. None of us fired you... nor dismissed you. You still work for me. And you answer to me. Now, where is Mr. Sandoval and Mr Hutchison?”

Napaanges iti nauneg ni John. “I have both of them, sir...”

Saan a naaluadan ti direktor ti nagbugkaw ken nagilunod. Uray la a napleng ni John.

“They killed one of my best friends, sir... He treated me like a brother. I was so close to him. And now, he is gone... because of these two effing SOBs.”

“Are they dead?”

“Still alive, sir.”

“Let them go.”

“No way, sir. They’ll pay for what they did .... ”

“You can’t do that, John... They’ll have to answer to our law. They will be tried. We have enough evidence to take them to court and then convict them. They’ll go to prison for a long, long time.”

“They are so powerful. They’ll never answer to our law. They’ll only answer to my law .... ”

“John, listen to me...”

“I had made my decision, sir... they’ll both die on my own terms. And, yes, sir... I am about a minute away from the dirty bomb. I will disarm the bomb, I’ll guarantee that, over and out.”

Ket iniddepen ni John ti selponna.

AGKALKALING-ETAN ni Agent Schummer a mangkitingkiting kadagiti nagsasallapid a wiring mechanism ti dirty bomb. Maulaw a mangpampanunot no ania a waya ti putolenna, no ania a waya ti ibatina, idinto nga agtultuloy ti panagpababa ti numero iti timer: 045.06. Nakaparpardas ti panagtaray ti maudi a dua a numero ket ad-adda laeng a nataranta. Nagsanay para kadagiti kakastoy a gundaway, ngem sabsabali daytoy. Nakadakdakkel a bomba daytoy. Nakaad-adu a tao ti matay no kaskasano. Sa kuarentay singko a minuto laeng sakbay a bumtak! Ad-addan ti panagarubos ti ling-etna.

“Kasano ti kinakomplikadona?” Nakigtot iti uni a naggapu iti likudanna.

Ni John Villa! Limmukay bassit ti aangsanna. “Komplikado unay, John... Napalalo. Maamakak pay a mangsagid. Amangan no allilaw dagitoy a waya... amangan no uray nga ania ti maputed, bumtak latta ti bomba.”

Kinita ni John ti wiring ti bomba ken ti timer a nakaparpardas ti panagbilangna. Inadalna dagiti wiring. Sinaggaysana nga inarikap ken tinunton ti pangrugian ken pagpatinggaan ti tunggal waya. Saanna a masurotan. Saan nga standard a wiring procedure.

“Ania ti panagkunam?” sinaludsod ni Agent Schummer.

“Adda pay 43 a minuto sakbay a bumtak. Duapulo a minuto laeng sa makadanontayo iti Nellis Air Force Base...”

“Apay nga iti Nellis?”

“They have a C-141 waiting for this truck to be deployed in Afghanistan...”

Nagkusipet dagiti mata ni Agent Schummer. “Masapulko ti mangwada iti kalsada... ken kasapulak ti eskort tapno awan ti mangtalaan iti panagturongko iti

Nellis Air Force Base...“

“Ipanmo iti Nellis, John... ngem bumtakto latta ti bomba...”

“Wen... ngem idiay ngato ti pagbettakanna. In the middle of nowhere but mountains and desert...”

“You won’t make it. Duapulo a minuto sa makagtengka iti Nellis... sa ikargam iti eroplano... di pay nakatayab, bumtaken! You gonna kill all the soldiers in that place...”

“Kabaelak dayta. Basta aramidem ti kunak... Kasapulak ti eskort...”

Timmapuak ni Agent Schummer iti trak. Immasideg a dagus ken ni Sheriff Frank. Imbagana ti kayat ni John a mapasamak. Nagduadua ti sheriff. Isu nga idi dimsaag ni John tapno mapan iti driver’s seat, kinasaritana daytoy.

“John, don’t do this... You’ll die... You’re not gonna make it...”

“There will be more casualties if I don’t do it... Come on, sheriff... do what I requested...”

Napasennaay ni Sheriff Frank.

“John, how about the ambulance?” impukkaw ni Ricky.

“Follow me... They’ll go with us! This is their way to heaven... Are you with me?”

“One hundred percent!”

Immuli ni John iti driver’s seat. Pinagandarna a dagus ti trak. Naggunay a dagus. Iti sangona, addan sumagmamano a lugan dagiti pannakabagi ti linteg. Nakapigpigsa ti wangwangda ken aggilapgilap dagiti silaw iti tuktok dagitoy.

Iti likud, simmaruno ti ambulansia. Agwangwangwang met. Ken aggilapgilap met dagiti nalabaga a silawna kas kadagiti lugan dagiti pannakabagi ti linteg iti likud.

Oras: 40 minuto sakbay a bumtak ti bomba. (Maigibusto)