Manila Bulletin

Kastoy, Kapid, Ditoy Hawaii

Ni RIC AGNES

(MANIPUD ITI AUTOR: Naadaw ti kaaduanna nga impormasion a nailanad iti daytoy a sinurat iti memoir ni Arturo C. Aruiza a napauluan iti Malacañang

to Makiki. Kameng ti PMA Class 1967, maysa a koronel iti Armed Forces of the Philippines ni Aruiza ken agpapaay nga Appointment Secretary to the President idi panawen ni Presidente Marcos. Naikuyog ni Aruiza iti bunggoy ni Presidente Marcos a nagpa-Hawaii kalpasan ti pannakapadisi ti presidente iti poder idi Pebrero 25, 1986.)

MADLAW nga adu kadagiti heneral ti di umanamong iti bilin ti presidente nga awan pammaltog a maaramid kadagiti aggandat a mangrabsut iti turay ngem awan makaitured a sumupring kenkuana. Sagudayen ti Pamunganayan Linteg, ti presidente ti Commander in Chief ti armada ken isu ti kangrunaan a mangeddeng iti pannakasalaknib ti pagilian, agraman iti tugaw ti presidente.

Iti ruar, agsinsinnublat da Gen. Pedro Balbanero ken Col. Braulio Balbas nga agim-imtuod no ania ti sumaruno nga aramidenda. Nasuroken a sangapulo nga oras a bambantayan dagiti soldado dagiti amin a pagruaran/ pagserkan iti Kampo Aguinaldo ngem saanda nga ammo no ania ti aramidenda. Alusiisenen dagitoy. Kasta met ti tropa ni Balbas iti Ortigas Avenue.

Iti Study Room, naawat ti presidente ti awag ni Ambassador Bosworth. Kunkunana nga ididiaya ni Reagan kenkuana ti tulong ti Amerika babaen ti pannakaaramat dagiti pasilidad ti Amerika iti ipapanaw ti presidente iti Malakanyang, ken ti nainget a ballaag a di pannakaaramat ti puersa maibusor kadagiti rebelde. Babaen dayta a mensahe, nalawag nga adda idiay Washington ti ima a mangiwaywayat kadagiti mapaspasamak iti EDSA ken rimrimpongenda dagiti takiag ni Marcos ken dagiti soldadona tapno nalaka ken napardas ti pannakaikkat ti presidente iti puesto.

Saan a nagtimtimek ni Marcos bayat ti panagsasao ni Bosworth.

Iti dayta a gundaway, di naigawid ni Koronel Aruiza ti bagina ket naipukkawna gapu iti luksawna, a kasla nalipatanna a ti presidente ti kasasaona: “Ania daytoy? Leblebbekendatayon ngem diyo pay la kayat ti agtignay a mangaramat iti bileg a mangribbuot kadagiti rebelde? Ken apay a ni Reagan, ni Bosworth, wenno uray asino man nga Amerikano ti mangibilin no kasano a tratarentayo dagiti rebelde? Ania ti mapaspasamak kenka, sir?” Naklaat ti amin iti panagriaw ni Aruiza, agraman ni Mrs. Marcos. Ngem awan nagtimek, agraman ni Presidente Marcos. “Saanen a maiparbeng ti ar-aramidenda kadatayo ken awanen bigbigenda a pagannurotan ngem adtoykayo pay laeng a mangsursurot iti wagas a nalinteg!” intuloy ni Aruiza.

Minatmatan laeng ti presidente ni Aruiza, kalpasanna, nagal-aludoy ti masaksakit a pangulo a simrek manen iti kuartona.

Awan naikeddeng nga aramiden dagiti nabati iti salas no di agpaliiw ken aguray iti pammilin manipud iti uneg.

Babaen ti intelehensia, naalimadamad da Aruiza a Filipino dagiti piloto ngem naggapu iti Clark Airbase dagiti maar-aramat a bomba. Malaksid iti dayta, naribbuoten ti Villamor Air Base, banag a nakadadaelan ti tallo a helikopter ken maysa nga eroplano a C-130.

Nasunotan ti pannakabomba ti arubayan ti Malakanyang. Tunggal adda ungor ti helikopter, agdadarisonda amin, agraman dagiti babassit nga ubbing, nga agkubukob iti abay ti elebeytor iti umuna a kadsaaran.

Kalpasan ti pangngaldaw, simmangpet ti damag nga adda inyibbet ti White House a mangpaspasingked nga adda naisangsangayan a bileg a mangbatbatil iti Washington. Kinuna dagitoy nga “adda panagem ti agdama a turay (iti Manila) a mangtalaan iti pannakadarundonda babaen ti nadamsak a wagas.” Balbaliktaden ti Washington dagiti ipadpadamagda a mapaspasamak iti Manila.

Iti White House, saan a palimed ti kinakurang ti kabaelan ni Reagan a mangituray kadagiti bambanag maipanggep iti pagannurotan iti ruar ti pagilian nga Amerika. Nasulit ken masansan a mangnamnama kadagiti opisialna a mangeddeng kadagiti bambanag agraman kadagiti napapateg a pakaseknan ti Amerika.

Saan a paggugusto ni Ronald Reagan ti agbasa ken kagurana ti agam-amiris kadagiti paspasamak. Gapu

iti dayta, agsainam ken yawatna ti karbengan kadagiti kameng ti gabinetena a mangyetnag iti pangngeddeng.

Gapu iti dayta nga ugalina, saan a nakakaskasdaaw a nawaya dagiti opisialna a mangpirma kadagiti dokumento. Ket iti biang ti napateg a gayyemna, ni Marcos, binay-anna ni George Shultz, Sekretario ti Estado ti Amerika, ken ti bunggoyna, a mangyetnag iti bukodda a pangngeddeng—ti pannakadaleb ni Marcos.

PINUKAW dagiti agtinnag a bomba iti Malakanyang iti dayta nga aldaw ti Lunes, Pebrero 24, ti kalikagum dagiti soldado a makiranget. Manipud iti pannakaammoda iti mapaspasamak iti EDSA iti aldaw ti Sabado, sirereggetda a mangparmek kadagiti kabusor, ken napardas koma a pinarmekda ida ngem awan ti nagtignay agsipud ta awan bilin manipud iti ngato.

Nadagsen unay ti sakit ti presidente ket mabalin a saanna a nasinunuo ti risgo ken ti kasasaad ti pagilian kadagita a kanito. Tunggal agsao ti presidente iti radio wenno agparang iti telebision, namnamaen dagiti heneral ti armada nga ibilinna nga agtignayda a mangparmek kadagiti rebelde, ngem saan, imbilinna ketdi ti pannakaidalan ti parikut iti nainkappiaan a wagas.

Maipalagip nga idi kaub-ubingan ken kapigpigsaan ni Marcos, adu met dagiti parikut a sinango ken pinarmekna. Saanna koma nga ipalubos a mapasamak kenkuana dagitoy.

Idi kabarbaraan ti susik iti Mindanao a mabalin a bumtak iti uray bassit la a rissik gapu iti panagkalikagum ni Muammar al-Qaddafi, ti nangipangulo iti rebolusion idiay Libya ken nangpadisi iti monarkia ni Ari Idris I, a rumaba ti riribuk kadagiti paset ti Mindanao a pagnaedan dagiti Muslim. Sinango ni Marcos ti parikut, ket babaen ti nasayaat a panangiwardasna, naalay-ayan ti bara ti kalikagumda a makiranget iti gobierno. Kalpasanna, nagbalin a natalna ti kasasaad iti Mindanao; nagangayanna, nagbalin ni Qaddafi a nasinged a gayyem ni Presidente Marcos.

Idi 1973 ken idi 1979, nagngangabit ti kasasaad ti ekonomia ti Filipinas ken ti sangalubongan gapu iti panagkurang ti lana ken ti panagngato ti presio daytoy, tinaming ken tinengngel ni Marcos dagitoy a parikut, pinagkalmana dagiti umili, kalpasanna, nangaramid iti wagas a saan nga agsadag ti ekonomia ti Filipinas iti lana manipud iti sabali a pagilian.

Ngem sabali a panawen daydi. Adtoy ti Marcos a makigubgubal iti bukodna a bagi. Makigubgubat iti sakit a mabalin a manggudas kenkuana iti ania man a kanito. Malaksid iti dayta, tartarabayen ti Amerika, ti maibilang a kabibilegan a pagilian iti lubong, dagiti komonkontra iti bukodda a gobierno nga agsadsadag iti Konstitusion. Awan raraemenda a pagannurotan idinto ta adtoy ni Marcos a mangsalsalimetmet iti karina a saanna a rauten ti nakaikursonganda a kuta. Dakkel a nakasalakniban ti bunggoy ni Enrile ti inyibbet ni Marcos a kari a dina usaren dagiti nabibileg nga armas a nakasagana a makalbit iti kanito nga adda bilin manipud iti Malakanyang.

Iti sabali a bangir, nakasagana dagiti heneral nga

agtignay iti kanito nga aguni ni Heneral Fabian Ver. Ngem awan mayetnag a bilin ni Ver agingga iti adda pammalubos ni Marcos. Ti adun a tawen a kinatudio ni Ver ken ni Marcos ti nangpukaw iti kabaelanna nga agpanunot ken agtignay a kas mayannatup iti agdama a kasasaad.

Maipalagip nga iti naminsan a nagbiddut ni Heneral Ver, nagluksaw ni Marcos ket kinunana: “No daytoy a wagas ti panangsalaknibmo kaniak, saannak a pulos salsalakniban.” Kalpasan daydi, awanen ti pammilin a yetnag ni Ver no awan pammalubos manipud iti presidente.

Iti dayta a malem ti Lunes, simmangpet ti pakaammo nga adda tallo a babassit a bapor iti Manila Bay a nakapaturong dagiti kanionda iti Malakanyang ken iti kampo ti Presidential Security Command. Kastoy met laeng ti inaramid ti Amerika idi 1953 idi bisperas ti eleksion a nagbalubalan da Elpidio Quirino ken Ramon (American Boy/Amboy) Magsaysay. Sagudayen ti New York Times, nairanrana laeng ti kaadda dagiti bapor ngem kalpasan ti makatawen, kinuna ni Senador Jose P. Laurel ti Nacionalista Party a nairanta daydi kaadda dagiti bapor kontra iti Malakanyang.

Iti daytoy a gundaway, ti kaadda dagiti nasao a bapor iti Manila Bay ti nasamay a ballaag ken ni Marcos a serioso ti Amerika iti mensahe nga indanon ni Bosworth nga adda dakes a pagteng no bilang ta mabales dagiti rebelde.

Kadagiti heneral nga adda iti Malakanyang kadagidi a kanito, natdada nga agpugpugto no ania ti rumbeng nga aramidenda. Ngem iti bukodda a kapanunotan, nalaka a parmekenda dagiti adda iti Kampo Crame, ken mangigibus iti daytoy a susik iti laksid ti kaadda dagiti bapor ti Amerika iti Manila Bay.

Ngem nagtalinaed nga awan pammilin manipud iti ngato wenno iti presidente. Mabalin met nga agpampannuray ti presidente iti pammasingked manipud kadagiti heneral a nalaka a parmekenda dagiti kabusor.

Ngem bayat ti panaglabas dagiti kanito, nagbalin dayta a pammasingked a mapagduaduaan ti kinapudnona. Mangrugin a matiktikaw dagiti soldado a nangsullat kadagiti ruangan ti Kampo Aguinaldo. Nabayagda unayen nga agur-uray iti pammilin. Mautoyandan. Ken sumkenen ti pannakalisay ken pannakawawda. Idi agbayag, pagsarsarukoddan dagiti paltogda a kasla awan sagsaganaanda a ranget.

Iti Malakanyang, inawagan ni Presidente Marcos ni Alfredo Lim, Superintendente ti Philippine National Police, a waraenna ti ummong dagiti tattao iti EDSA. Ngem saan a nagtungpal ni Lim. Addan daytoy iti kampo ni Ramos. Iti nabayag a panawen, kupkupikopanna ti gura ken ni Heneral Ver ta pagarupenna a saan a kayat ti heneral ti pannakaital-ona. Bigbigbigenna a ni Ramos ti nakatulong kenkuana.

Insublat nga inawagan ni Marcos da Brig. Gen. Ramon Cannu ken Maj. General Ramas ket imbilinna nga agawenda ti Channel 4. Immawag ni Cannu kalpasan ti tallo nga oras ket kinunana a saan a makapisipis dagiti tangke ken armored carrier gapu iti kaadu ti tattao iti EDSA. “Saanda nga aglisi, sir,” kinunana.

“Ti pannakaaramat laengen dagiti kanion ken tangke ti gundawaytayo a mangabak,” kinuna dagiti heneral ngem nagtalinaed ni Marcos a naulimek.

Ngem idi nagtimek, kinunana: “Saan. Diak maaklon ken ipalubos a siak ti makaigapu nga agsayasay ti dara dagiti tattao a sinalsalaknibak ken nagserserbiak iti adu a tawen.”

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/281805697523925

Manila Bulletin Publishing Corp