Kid Layaw (16)

Ti Napalabas: Nagawid da Macario ken Aldong idiay Simbaluca gapu iti paboksing idiay barangayda. Nangabak ni Pedro, ti anak ti kapiduada, a naipako iti kanipaan, ta napigsa ti danogna. Inkuyogda ni Pedro iti Manila. Impakitada ken ni Tata Paquing a dati a manager ni Macario. Inlabanda ket nangabak. Nangabak manen ni Pedro iti sumaruno a labanna. Naragsakanda idi ipakaammo ni Mr. Asse a nagsanud ti kalaban ni Speed Jani ket ni Pedro ti isukatda ta pagpangalan laeng koma ni Speed Jani, ngem imbalakad ti maysa a trainer a nasayaat no mangabak ni Pedro ket impasnek da Aldong ken Pedro ti nagensayo agingga a dimteng ti laban.

MAKATITILENG a dalagudog, dir-i ken sipsipat ti nangsabat kada Macario idi makadanonda iti entrada ti Coliseum.

“Ladies and gentlemen, the winner by technical knockout in the fourth round, Angel, The Gentle Assassin, Paraisooo!”

Napigpigsa manen ti dir-i ken sipsipat dagiti tao ket inapput ni Muyac ti lapayagna. “Kilala mo ako?” kunkuna met ni Macario kadagiti makabigbig kenkuana iti ridaw ti Coliseum.

“Ay, narito na si Kid Layaw!” kinuna met ti maysa kadagiti nakauniporme a babbai a para itulod kadagiti nakareserba iti ringside.

“Wow, ang pogi na niya! Anong sabon ang ginagamit mo?” adda met nagkuna.

“Naimbag ta nasapakayo, kailian!” impasabat met ti maysa kadagiti guardia a para itulod kadagiti boksingero iti dressing room. “Makarelakskayo pay sakbay ti labanyo!”

“Nawaya pay. Supporting ni Kid!” insungbat met ni Aldong.

“Nalpas aminen dagiti curtain raiser, boss. Bin-ig a knockout! Dito tayo,” insungbat ti guardia.

Kas iti napalabas, kaabay ti reserbasion da Macario ken Muyac da Mang Paquing ken Tel Asse.

“Good evening, ninong!” inkablaaw ni Muyac ken ni Mang Paquing.

Impalawlaw ni Macario ti panagkitana sakbay a timmugaw. Naawatan met ni Mang Paquing.

“Adda dita kanawan nga intar da Mico Juan ken Nayo Balde,” kinuna ni Mang Paquing. “Naisaganayo met la a naimbag ti ubingmo? Walo a round ti labanna, di ngamin?” “Ayos lang, tata,” pinatangar ni Macario ti tanganna. “Kuna ni insan—” Di naituloy ni Macario. Nagkikinnamat ti kiremna a kumitkita iti ring. Nadlaw ni Muyac. “Seksi, di ngamin, sweetheart?” Manutsutil ti isemna a nangtaldiap iti mangrikrikus iti ring a round girl a nagiggem iti karatula a nakaisuratan ti bilang ti sumaruno a round ti agdama a laban.

“Ay, awan ti kasta idi tiempok,” insungbat ni Macario. “Ti la mapampanunotda a pangpapaadu iti pabuya!”

Nagkatawa ni Mang Paquing. “No dinengdeng koma, sagpawna dayta round girl! Seksi. Dimo kuna a saanmo nga apresiaren dayta round girl a sagpaw ti pabuya!”

“Hmmm, adda wenno awan pareho laeng kaniak, tata!” insungbat ni Macario.

Nagkatawa ni Mang Paquing. “Apay, lakayka unayen,