Panagsubli

Awan manen ti sumnek a turog

Iti kanito ti panangpasungad

Iti panagsubli ti mutia dagiti balikas

Iti irair dagiti rabii malagipko manen

Ti kanta “Echo, O morning dews…” Allangogan, linnaaw iti agsapa Agsublika kadin kanito ti panagparnuay Kadagiti linabag a nabiag

Ita, ita a rabii, kadagiti di makaturog A kaltaang iti Ewa Beach

Ta padasek koma nga ikur-it

Ti lumlumdaang a daniw.

Ikur-itko met ti dallang

Ti panagsubli dagiti nagpauyo

A regta, dagiti pimmanaw a pia

Ken karadkad; insangpet ti damsak… Agsangitak, wen, agsangitak Kadagiti sililimed a saning-i

Dagiti diak maibalikas a panagdung-aw Urayek nga agukrad ti sabong

Iti parbangon; agdanggay ti kanta ken daniw Ti dung-aw ken dallang

Iti panawen iti panagurayko kenka

Nga agsubli, Cielo Alma

Iti kasisigudmo a sika, a sika

Daydi sika kadagiti naglasatanta

A limapulo ket uppat nga Abril

Dagiti nagdanggay a rikna

Iti amin a panawen, iti amin

A dalluyon dagiti linasatta a taaw

Sika, sika ti agnanayon nga ur-urayek Uray napno iti kettang ken puyat Dagiti saan a matmaturog a rabii

Ditoy nagsulian; imeng daytoy nagkul-ob A daan a balay a duata a nangbangon Ken nangipasdek iti naglantip nga ayat Agsublikan, perngek ti kinaasinok Kadagiti matam; kailiwko ti tarnawna Dita a matukodko ti ayat

Daydi umuna a panagdaton.