Siled ti Kararag

Basaentayo ti Salmo 29:1-11

Kanayon nga agragsakkayo. Diyo koma liwayan ti agkararag. Agyamankayo iti Dios, dakes man wenno nasayaat ti kasasaad. Daytoy ti kayat ti Dios a panagbiagyo a kas tattao ni Cristo Jesus.—1 Tesalonica 5:16-18

AGTAWEN iti 92 ni tatangko. Maysa a makabannog a padas ti panagbantayko iti rabii iti kuartona. Naamirisko a saanak unay a makaturog gapu iti agsasaruno a pannakamonitor ti temperatura ken presion ti darana, tagari ti tubo a pagangsanna, alarma ti oras a panagagasna, ken dagiti nurse a mangala kadagiti sample ti darana.

Naduktalan nga adda congestive heart failure ni tatang ken adda danum iti barana nga isut’ mangparigat kenkuana nga aganges. Bayat ti panangbuybuyak kenkuana a nakaidda a marigrigatan nga umanges iti agsapa, malagipko a nalipatak ti rinabii a panagkararagko. Inrugik nga inkararag ti pannakaagas ni tatangko. Madaydayaw ti Dios gapu iti 92 a tawen ni tatangko ken dagiti tawen nga addaak iti sibayna. Naaddanak iti talna iti tengnga ti kinatagari ken dagiti maar-aramid.

No dadduma, maibus ti orastayo kadagiti nariribuk a a paspasamak iti biag. Malipatantayo ti agkararag ken agdayaw iti Dios kadagiti inaramidna kadatayo ken babaen kadatayo. Inton umay kadatayo dagiti makapasuron a paspasamak, lagipentayo ti kuna ni Pablo: “Kanayon nga agragsakkayo. Diyo koma liwayan ti agkararag. Agyamankayo iti Dios, dakes man wenno nasayaat ti kasasaad.”

Kararag:

Mannakabalin-Amin ken naasi a Dios, tulongannakami a kanayon a mangipaay iti panawenmi kenka, kasano man ti kinaringgor wenno kinarikut dagiti al-aldawmi. Agyamanak iti talna nga ipaaymo kadakami inton aramatenmi dagiti tiempomi para kenka. Amen.

Kapanunotan:

Diak ipalubos a dagiti pakariribukan iti biag ket yadayonak iti sidong ti Dios.

Ikararagan: Dagiti pasiente.