Manila Bulletin

Daliasatentayo Man ti Nangayed a Villaverde Trail

Nasuroken a 200 a tawen ti napalabas manipud idi nabukel ti panggep a pannakapaadda ti kalsada a mamagkamang iti Pangasinan ken Nueva Vizcaya.

Bonifacio V. Ramos

AGINGGA iti tawen 2021, ti Kalsada Sta. Fe (Nueva Vizcaya)–San Jose (Nueva Ecija) laeng ti direkta a mamagsilpo iti Tanap ti Cagayan ken Pangasinan (agraman dagiti probinsia iti Tengnga a Luzon agingga iti Manila). Dumaliasat amin nga agbiahe iti Nueva Ecija babaen ti Kalsada Sta. Fe-San Jose sakbay a dumanonda iti Pangasinan. Manipud iti Sta. Fe agingga iti San Nicolas, Pangasinan, agpaut ti biahe iti mapan a tallo nga oras no lumasat ti pagluganan iti Kalsada Sta. Fe-San Jose. Ket gapu iti panagreggaay aglalo no matutudo, masansan ti pannakabaliw wenno pannakatarimaan ti kalsada, ken addada nakabalandra a nadesgrasia wenno nagiinnipit a lugan; ngarud, ad-addan a maibayag ti biahe. Napasamaken a di madalanan ti kalsada a kas idi naggingined idi Hulio 1990 isu a nabayag a nangliklikaw dagiti taga-Tanap ti Cagayan iti Rehion ti Ilokos tapno makadanonda iti Manila.

Ngem sakbay a nagngudo ti tawen 2021, kasla immasideg ti nagbaetan ti Nueva Vizcaya ken Pangasinan ta mabalinen ti Kalsada San Nicolas-Sta. Fe a daliasaten nga agsipungto dagiti nakamotorsiklo, nakakotse ken naka-van, nupay adu pay laeng a paset ti dalan ti madama a masemsemento iti masakupan ti Pangasinan. Napartak pay ti panaglatak ti Malico, kangatuan a barangay iti tapaw ti Bantay Lakay iti nagbaetan dagiti dua a probisia a malasatan ti kalsada. Adun ti dumaydayo manipud iti agsumbangir a probinsia. Adda payen grupo dagiti bumibisikleta a kas iti BayombongSolano Bikers wenno Baysol Bikers (a pakairamanan ti nagsurat) ken Villaverde Trail Bikers iti Nueva Vizcaya kasta met ti NCPD Bikers Association ken ti Spirit United Cyclists iti Pangasinan. Adu metten dagiti aggapgapu iti Nueva Vizcaya a kalpasan ti panangpasiarda iti Malico agtartarusdan iti poblasion ti San Nicolas wenno adadayo pay a kas met iti kaadda dagiti aggapgapu iti Pangasinan nga agtartarusdan iti poblasion ti Sta. Fe wenno ad-adayo pay kalpasan ti idadagasda iti Malico.

Adu ngamin ti pangawis ti Malico. Nangayed ti aglawlaw. Manipud iti Malico Viewpoint, matannawagan ti Pangasinan nangnangruna no saan a naulep ti tangatang. Pasiarenda ti rurog ti tangke dagiti Amerikano ken armas a pakigubat a nabati a saksi iti nadara a bakal dagiti soldado a Hapones ken Amerikano iti Salacsac Pass a paset ti Villaverde Trail idi Enero 30 agingga Mayo 26, 1945 (maudi a tawen ti Maikadua a Gubat ti Sangalubongan) a nakaparmekan dagiti agsansanud a soldado a Hapones. Ditoy met a mapasiar ken makita ti batonlagip a nakailanadan ti naglasatan dagiti soldado iti napaut a bakal a nakaibuisan ti biag ken nakasugatan ti aganay a 3,200 a soldado nga Amerikano; sabali laeng dagiti nagsakit agraman sibilian. Napan met a 4,600 a soldado a Hapones ti naidasay. Gapu ta adda mabalin a pagyanan, adda met dagiti mayat nga agpatnag wenno agbayag dita tapno mananamda ti arig Baguio a klima.

Managanan iti Bantay Malico iti agdama, nagtugaw ti Bantay Lakay iti pagsinnabatan ti amianan a laud a paset ti kabambantayan ti Caraballo ken ti abagatan a paset ti kabambantayan ti Cordillera. Maibasar iti mapa, atiddog ti Gran Cordillera (maysa pay a nagan ti Cordillera) a mangunor iti duri ti Luzon manipud iti probinsia ti Apayao iti amianan, agpaabagatan agingga iti amianan a daya a paset ti Pangasinan. Ti met kabambantayan ti Caraballo (wenno Caraballo Sur, maaw-awagan pay iti Burubur ken Santor kadagiti daan a mapa idi panawen dagiti Kastila), ti mangbeltak iti probinsia ti Nueva Ecija ken Nueva Vizcaya agraman ti Quirino. Iti daya, agtaray met ti kabambantayan ti Sierra Madre manipud iti Cagayan sa agpaabagatan agingga iti probinsia ti Quezon. Iti paset ti Quirino ken Nueva Ecija nga agkinnamang ti Caraballo Sur ken Sierra Madre. Isu a nanaganan ti Rehion Dos iti Tanap ti Cagayan (Cagayan Valley) gapu ta nalawa daytoy a tanap a linawlaw dagiti tallo a dadakkel a kabambantayan, malaksid nga adda met ti kabambantayan ti Namamparan (wenno Mamparang) iti pagbeddengan ti Nueva Vizcaya ken Isabela.

Agngato ti Bantay Malico iti 1,312.8 a metro manipud iti rabaw ti taaw (meters above sea level, MASL). Adda ti Barangay Malico iti nagbaetan ti Pangasinan ken Nueva Vizcaya. Kinapudnona, nagkatlo a paset ti Barangay Malico: ti maysa a paset, adda iti sakup ti Sta. Fe, Nueva

Vizcaya ket ti maysa adda met iti sakup ti San Nicolas, Pangasinan. Ti maikatlo, saan a masnop no akinsakup, ket saan pay narisut agingga ita. Nakatakder iti tapaw ti bantay ti Malico Elementary School ken Malico National High School—nga iti babaen ti naganda, nailanad ti San Nicolas, Pangasinan—iti asideg ti kabalbalayan nga adda iti las-ud ti Nueva Vizcaya nga isu ti paggapuan ti kaaduan kadagiti agad-adal. Adda met dita ti pasdek ti Malico Tourism Assistance Center ti Sta. Fe, Nueva Vizcaya.

Iti agdama, adun ti mabasbasa iti Facebook nga ipabpablaak dagiti adun a nagdaldaliasat iti Kalsada San Nicolas–Sta. Fe (wenno Villaverde Trail) ken nagpaspasiar iti Malico. Ti masansan nga ipaspaskilda a nagan daytoy a kalsada, Villa Berde Trail wenno Villa Verde Trail (imbes a Villaverde Trail). Villa Verde Trail pay ti naisurat a naganna uray iti Wikipedia. Ngem saan a mailawlawag no apay. Iti Espaniol, villa ti awag iti dakkel a balay wenno mansion, ket verde met ti berde (green) a kolor. Awan met naisurat iti pakasaritaan ti kalsada a mainaig iti Villa Verde (berde a mansion) a nakaalaan koma ti naganna. Adda pay naisurat iti Facebook a ti Villa Verde Trail ti inusar ti maysa a misionero a Kastila iti panangikaskasabana iti Kristianismo kadagiti agindeg iti kabambantayan ti Amianan a Luzon nupay awan mabasa a kastoy a pasamak kadagiti historia. Nupay kasta, Villaverde Trail met ti nagan a nausar iti maysa a damag a naipablaak iti pagiwarnak a Philippines Today maipapan iti pannakatarimaan ti kalsada idi tawen 2015 kalpasan ti nabayag a saanna a pannakaasikaso.

Ngem awan ti makaistoria a naadaw ti Villaverde Trail iti nagan ni Padre Juan Villaverde (saan a Villa Verde), Dominikano a padi-misionero, maysa nga agrimensor, nalaing iti inhenieria ken panagaramid iti kalsada. Isu ti nangaramid iti surbey, plano ken mapa ti kalsada, ken nangimaton iti pannakaaramid ti Camino del San Nicolas (wenno Kalsada San Nicolas-Aritao a kas plinano ken inawaganna) nga isu ti Villaverde Trail. Nalpas ken nangrugi a mausar dayta a kalsada (wenno desdes, aglawa laeng iti 1 a metro) idi 1891. Sakbay dayta, isu ti nangaramid iti surbey, plano, ken mapa kasta met a nangtarawidwid iti pannakaaramid ti kalsada manipud iti Bagabag, Nueva Vizcaya agingga iti Kiangan, Ifugao

(nanaganan iti Camino del Quiangan). Kasta met iti Camino del Santo Rosario—kalsada a namagkamang iti Nueva Vizcaya ken Isabela. Mangrugi daytoy iti Bagabag agingga iti Barangay San Luis iti Diadi ket daliasatenna dagiti barangay a Kinacao, Tapaya, Villanueva, Rosario, Oriwong, Balete, Duruarob, agingga iti Bantay San Luis a pagbeddengan ti Diadi (Nueva Vizcaya) ken Cordon (Isabela). Isu pay ti nangplano kadagiti kalsada ti Solano a nagserbianna a kas padi—kakaisuna nga ili iti Nueva Vizcaya a perpendikular wenno eskualado (addaan iti anggulo a 90 degrees) nga agbabatog ken agpapada ti kalawana a kalsada ken bloke. Isu pay ti nangaramid iti plano ken nangbukat iti 16-kilometro a kalsada manipud iti Solano agingga iti Villaverde, Nueva Vizcaya. Naipanagan kenkuana ti ili a Villaverde, immuna a nanaganan iti Ibung, maysa kadagiti pinundarna nga ili ken nagserbianna iti nabayag a kas misionero.

Iti Villaverde Trail, mapan laengen a maysa nga oras manipud iti Sta. Fe agingga iti San Nicolas ti in-inut, agsikkosikko ngem awan-sardayna a pasang-at agingga iti Malico ken in-inut a pasalog agingga iti San Nicolas babaen ti van ken motorsiklo. Kasta met dagiti aggapu iti Pangasinan a kayatda ti dumanon iti Sta. Fe. Manipud met iti San Nicolas (iti sakaanan ti bantay), mangrugi met ti in-inut ngem awan-sardayna a pasang-at ken agsikkosikko a kalsada agingga iti Malico. Manipud met dita, ini-nut met ti awan sardayna nga agsikkosikko a pasalog a kalsada agingga iti patad a poblasión ti Sta. Fe.

Ti Punganay ti Villaverde Trail Nasuroken

a dua a siglo ti napalabas manipud idi nabukel ti panggep a pannakapaadda ti kalsada a mamagkamang iti Pangasinan ken Nueva Vizcaya. Kastoy ti pakasaritaanna, kas naadaw iti libro ni Padre Guillermo Tejon, OP, a napauluan iti Juan Villaverde, OP, Missionary and Road Builder 1841-1897, kas impablaak ti Unibersidad ti Sto. Tomas idi 1991.

Bayat ti pangituray dagiti Kastila iti Filipinas, pinampanunoten dagiti Dominikano a padi a ti pannakaaramid dagiti kalsada ti maysa kadagiti kangrunaan a makatulong iti panangisaknapda iti Kristianismo kadagiti naseksek ken narigat a madanon a lugar, aglalo kadagiti kabambantayan. Makatulong iti komunikasion, panangibiahe kadagiti tattao ken produkto, ken panangplano iti pakaipasdekan dagiti baro nga ili. Manipud 1737-38, desdes laeng ti ususaren dagiti padi a kas kada Padre Manuel del Rio ken Francisco Rocamora tapno madanonda dagiti Kalanguya ken dadduma a tribu iti abagatan a laud a paset ti kabambantayan ti Caraballo ken abagatan a paset ti kabambantayan ti Cordillera nga isu ti nagtugawan ti dakkel a paset ti amianan a Pangasinan ken abagatan a Nueva Vizcaya. Ngem saan a nagbayag dagitoy a desdes ta nagpukawda gapu ta saanda met a kanayon a madaldalanan.

Ti pannakaaramid sakbay dayta ti Camino del Quiangan (managanan iti agdama a kas Kiangan, iti probinsia ti Ifugao) ken Camino del Santo Rosario— babaen ti maysa a Dominikano, a managan iti Padre Juan Villaverde (nagbiag idi 1841-1897)—ti dakkel a nakatulong kadagiti misionero manipud iti Nueva Vizcaya tapno madanonda ti Ifugao ken Isabela. Ngem kasano ti agpaabagatan, nangnangruna iti paset nga abagatan ti Aritao? Ti pannakaaramid ti kalsada manipud iti Aritao agingga iti San Nicolas ti inarapaap ti kaaduan, saan laeng a dagiti agtuturay a Kastila, no di ket agraman dagiti padi a misionero, kangrunaanna ni Padre Juan. Saan laeng a padi ken misionero no di ket maysa isuna nga agrimensor (surbeyor) ken nalaing iti inhenieria ken panagaramid iti kalsada.

Idi tawen 1872, nariing dayta a panggep ken ni Padre Juan. Iti panagsasaritada idiay Bayombong, Nueva Vizcaya, kinanunongan dagiti opisial a kas kada Gobernador Manuel Boix ti Pangasinan, Pangulo dagiti Dominikano iti Nueva Vizcaya a ni Padre Pedro Vilanova (dati a misionero iti Pangasinan) dayta nga arapaap ni Padre Villaverde. Tapno manayonan ti ammoda maipanggep iti kabambantayan manipud kadagiti nakadaliasaten kadagitoy (sakbay ti 1872) napagnunumuan ti panangibaonda idi Enero 1872 iti mangsukisok iti mabalin a dalanan manipud iti Aritao agingga iti San Nicolas ket nagpaut daytoy iti dua nga aldaw. Kalpasanna, tinarigagayan met da Padre Vilanova ken Padre Villaverde—a binayabay ti sumagmamano a soldado a Kastila ken kakaduada a mangiwanwan—ti nangpagna manipud iti San Nicolas agingga iti Aritao

tapno masukisokda ti mabalin a ruta ti kalsada a maaramid. Nagpaut iti tallo nga aldaw ti sang-atsalog a panagdaliasat agraman panaginana ken panagkampoda iti rabii. Manipud iti San Nicolas, awan sarday ti yuulida agingga iti tapaw ti Bantay Lakay wenno Monte Viejo (Mountain viewpoint) a kas awag dagiti Kastila. Nangatngato daytoy tapaw a pagbeddengan ti Pangasinan ken Nueva Vizcaya ngem ti Dalton Pass (dati a Balete Pass) a kangatuan a paset ti Kalsada Santa Fe-San Jose nga isu ti immuna a nagdaldalanan. Iti umuna a rabii, naturogda iti Salacsac ket iti sumuno a rabii, iti met nawada nga igid ti Karayan Pingkian. Iti sumaruno nga aldaw, sinurotda ti ayus ti Karayan Pingkian (a ti danumna aggapu kadagiti aripit manipud iti tuktok ti Bantay Lakay) iti panagpababada iti Nueva Vizcaya. Iti yuuli wenno isasang-atda manipud iti San Nicolas, inanusanda ti pudot iti aldaw iti baba ken nakaro a lamiis iti nganngani binungon ti angep a Bantay Lakay, malaksid kadagiti kagat ti alimatek ken peggad manipud iti mabalin panangsaneb kadakuada dagiti tribu nga Igorot. Kasta manen iti panagpababada iti Sta. Fe.

Saan a napnek ni Padre Villaverde a ti nagnaanda a desdes isun ti pakaaramidan ti Kalsada Aritao-San Nicolas gapu kadagiti narangkis a paset ti bantay ken ti nauneg a Karayan Pingkian ta ammona a narigat no di man dakkel ti magasto iti pannakarangtayna. Nupay kasta, nangaramid ni Padre Villaverde iti mapa ti dinaliasatda agraman ti insuratna nga impormasion tapno maited ken ni Gobernador-Heneral Juan Alaminos karaman ti inrekomendarna a ruta-mapa ti mabalin a Kalsada San Nicolas-Bambang (imbes a San Nicolas-Aritao a dumaliasat iti Karayan Pingkian). Inramanna dagiti impormasion a naadaw iti maysa pay nga ekspedision nga inaramid met da Padre Bonifacio Coruedo ti Nueva Vizcaya ken Padre Jose Maria Vitrian ti San Nicolas, Pangasinan. Inkeddeng ti Gobernador-Heneral nga ikkan ti turayna iti pateg daytoy a proyekto nga insingasing ni Padre Villaverde. Kalpasan a napagsasaritaan dagiti impormasion ken singasing a ruta-mapa ni Padre Villaverde, binilin ti Gobernador-Heneral dagiti gobernador ti probinsia ti Pangasinan ken Nueva Vizcaya a masapul a marugian a dagus ti proyekto, ket ti enkargado (incharge) isu ni Padre Villaverde. Ngem kinasapulan pay ni Padre Juan ti maikadua nga ekspedision nga impanguluanna met laeng. Naaramid daytoy idi tawen 1873, ket napimpintas ti resultana ngem ti immuna. Daksanggasat ta iti Agosto iti dayta a tawen, pimmusay ni Padre Vilanova ken naiturong ti adu a panawen ken aramid ni Padre Villaverde iti pannakapundar ti ili nga Ibung (nga isu ti immuna a lugar ti agdama nga ili ti Villaverde, probinsia ti Nueva Vizcaya). Naturog ti naisingasing a proyekto agingga iti tawen 1880.

Napangungar daytoy a proyekto idi panagturay ni Gobernador-General Fernando Primo de Rivera (tawen 1880-83, ken 1897-98). Iti isasarungkarna iti Nueva Vizcaya idi Disiembre 1880, napagsasaritaanda daytoy a proyekto kadagiti misionero a padi. Kas panangkanunongna iti daytoy a singasing, binilin ti Gobernador-Heneral dagiti inheniero-militarna nga agaramidda iti panangadal (feasibility study) no

mabalin ti improponer ni Padre Villaverda a pagdalanan ti kalsada. Ngem saan latta a narugian ti kalsada, ta narigat ken dakkel kano ti magasto iti pannakaaramidna.

Saan a naupay ni Padre Villaverde. Napanunotna a ti balligi ti pannakaaramid ti Camino del Quiangan ken Camino del Santo Rosario ti mangipaneknek iti kabaelanna a kas surbeyor ken inheniero tapno agballigi ti proyekto a Kalsada San Nicolas-Bambang. Nupay narigrigat nga aramiden daytoy a kalsada ngem ti naiproponer a ruta ti Kalsada San NicolasAritao, kayatna latta a paneknekan daytoy kadagiti agtuturay. Kabayatanna, naituloy ti pannakapapintas ken pannakailawa ti Camino del Santo Rosario a mamagkamang iti Nueva Vizcaya ken Isabela sakbay nga inriingna manen ti proyekto iti Pangulo-Probinsial dagiti Dominikano. Nakitana a kasapulan unay daytoy a kalsada a mangrugi idiay San Nicolas gapu ta madama idi a maar-aramid ti riles ti tren manipud iti Manila agingga iti Dagupan ket maikamangton ti riles iti San Nicolas a maikamangto metten iti Nueva Vizcaya babaen ti Kalsada San Nicolas-Bambang.

Naaramid ti maikatlo nga ekspedision tapno makabirok iti sabali ken napimpintas a ruta a madalanan (pass) imbes a ti ruta a San Nicolas-Bambang. Ket naaddaan pay iti napimpintas a plano ti ruta kalpasan ti makabulan (Hunio) a panagsurbeyna. Nagsubli iti dati a plano ti Kalsada San Nicolas-Aritao (a saanen nga agdaliasat iti Karayan Pingkian), ket ninagananna daytoy a mapana iti Camino de San Nicolas. Idi Hulio 10, 1889, intedna ti plano a mapa ti kalsada ken ni Padre Probinsial Lucio Asensio (pangulo ti Dominikano a Probinsia ti Santo Rosario) tapno itedna iti simmukat a GobernadorHeneral Valeriano Weyler (1888-1891), a dagus met a nangaprobar.

Imbilang ni Padre Villaverde ti pannakaaramid ti Camino de San Nicolas a kas aramid a panagserbi iti Dios, ta nupay aramid ti agrimensor ken inheniero ti panagaramid iti kalsada, saan a sumiasi iti pagrebbengan ti maysa a padi a misionero daytoy ta paset ti kinamisionero ti mangisaknap iti Kristianismo a pammati babaen ti nasaysayaat a wagas ti transportasion ken komunikasion. Tarigagay unay ni Padre Villaverde ti pannakalpas ti kalsada iti ibibisita ni GobernadorHeneral Weyler iti Nueva Vizcaya iti tawen 1890.

Gapu iti kaadu ti tamingenna a kas misionero, nagkurang ti panawen a kaaddana iti bantay tapno mabantayanna dagiti agaramid iti kalsada. Kas iti gagangay nga inaramidna iti Camino del Quiangan ken Camino del Santo Rosario, nangdutok kadagiti kapatas (enkargado). Innalana a kangrunaan a kapatasna ti maysa a Juan Velasquez (ti Solano, Nueva Vizcaya) nga isu ti nangitalkanna kadagiti ramit a pagsurbey (kas iti theodolite ken transit-na) iti turongen, kinapatad ken kinasang-at/kinasalog ti makalsada, kinasikko, ken dadduma pay a kasapulan a mainaig iti inhenieria ti panagkalsada. Dagiti dadduma a kapatas, isuda Juan Valdez ken Vicente Lumicao Pisang (ti Solano), Eulogio Morales ken Marcos Ramento (ti Ibung), Jose Bausel (ti Dupax), Luis Lumicao ken Antonio Gayagoy.

Idi Hulio 10, 1889 impatulod ni Padre Villaverde iti Padre Probinsial ti napapintas a mapa nga inaramidna a mismo tapno ited daytoy iti Gobernador-Heneral. Mangrugi ti kalsada iti Aritao agingga idiay San Nicolas, Pangasinan. Segun iti plano ni Padre Villaverde, aglawa ti kalsada iti nasursurok ngem 1 a metro a mapagnaan ti agkabalio, ngem mabalinto nga ikalawa iti masakbayan tapno mapagnaan dagiti karison. Iti dayta a panawen, nairugin ti kalsada iti paset ti Nueva Vizcaya. Naaramid ti kamarin (a pakaigumpuan dagiti materiales agraman ramramit) idiay Tolo iti nagbaetan ti Aritao ken Sta. Fe. Iti di nagbayag, naaramid met ti kamarin idiay San Ignacio (Imugan iti agdama) a paset ti Sta. Fe, Nueva Vizacaya). Di met unay nagbayag, nairugi met ti kalsada iti paset ti Pangasinan.

Dagiti paset ti kabambantayan ti Caraballo iti nagbaetan ti Nueva Vizcaya ken Pangasinan a tumipon iti umabagatan a paset ti kabambantayan ti Cordillera Sentral (maysa pay a nagan ti Gran Cordillera), ti pagindegan dagiti nadumadua a tribu dagiti Igorot a kas kadagiti Ibaloy, Kankanaey, ken Kalanguya. Igorot (wenno Ygorrote, Ygolot) ti awag dagiti Kastila kadagiti agindeg iti kabambantayan (manipud iti i= agindeg, ken golot wenno golod = bambantay). Idi a panawen, pasaray dumangran dagitoy a tribu kadagiti agbasakbasak iti pagindeganda. Kas panagsakbay ken panangsalaknibda kadagiti agtrabaho, dimmawat ni Padre Villaverde iti libre a lisensia tapno makaawit dagiti kapatas iti paltog. Nabiit

nga immatiddog ti desdes nga agakaba iti maysa a metro. Idi Nobiembre 27, 1889, nangipatulod ni Padre Villaverde iti Padre Probinsial iti baro a ladawan a nangipakita ti nalpas a nakalsada nga agdagup iti kakapat ti sibubukel a kalsada no makompleto manipud iti Aritao agingga iti San Nicolas a ninamnamana a malpas iti uneg ti uppat a bulan.

Kabayatanna, inaramid ni Padre Villaverde ti plano ti pannakaikalawa ti kalsada. Ad-adu manen a trabahador ken ramit ti masapul. Nupay nagawis da Gobernador Carlos Peñaranda (ti Pangasinan), Timoteo Candela (ti Nueva Vizcaya), ken dagiti padi-misionero a Dominikano iti dua a probinsia kadagiti trabahador, saan mga immanay dagitoy. Nagsisinnublat a nagtrabaho iti kada lawas dagiti trabahador iti sumagmamano a bulan bayat ti kaawan trabahoda iti taltalon. Masapul a malpas ti panagkalsada kadagiti saan matutudo a bulan (Nobiembre 1889-Hunio 1890). Isu a manipud iti gobierno, dimmawat ni Padre Villaverde iti tulong dagiti kombiktado a balud iti panagaramid ti kalsada a kas sigud a naar-aramid manipud idi 1871 mainaig kadagiti obras publikas.

Dimmawat pay ni Padre Villaverde manipud iti gobierno kadagiti ramit a kas kadagiti pala, gabion, ragadi, wasay, barreta, ken buneng a kas iti inaramidna iti pannakakalsada ti Camino del Quiangan. Nupay naaramid ti Kalsada San Nicolas-Aritao idi 1890, saan a napnek ni Padre Villaverde ta aglawa la ngarud iti maysa a metro a dalanen dagiti nakakabalio ket saan pay mabalin a pagnaan ti depilid a lugan. Nupay kasta, aganay a 74 a kilometro ti nakalsada: San Nicolas agingga iti Noso, 20-kilometro; Noso agingga iti tuktok ti Bantay Lakay (kataegan ti Nueva Vizcaya ken Pangasinan), 8-kilometro; tuktok agingga iti San Ignacio (Imugan iti agdama), 10-kilometro; San Ignacio agingga iti poblasión ti Sta. Fe, 12-kilometro; Sta. Fe agingga iti Aritao, 24kilometro. Kaaduan a patad ti kalsada nga Aritao-Sta. Fe. Manipud iti Sta Fe agingga iti Malico a tuktok ti Bantay Lakay, awan sardengna a pasang-at ti kalsada. Manipud iti Malico, awanen sardayna a pasalog ti kalsada agingga iti San Nicolas iti arsadanan a nasinnabatan ti kabambantayan ti Caraballo ken Cordillera.

Idi Nobiembre 17, 1891, sinukatan ni Eulogio Despujol ni Valeriano Weyler a kas Gobernador-Heneral. Dagus nga inikkan ni Despujol iti importansia ti kalsada idi nakita ken dinaliasatna. Iti suratna ken ni Padre Villaverde a napetsaan iti Disiembre 12, 1891, dinayawna ti padi ken dinamagna no ania pay dagiti kasapulan ket inkarina ti amin a suporta ken kabaelanna tapno maikalawa ti kalsada a kas iti adda iti plano ni Padre Villaverde. Adda idi ni Padre Vilaverde iti misionna idiay Magulang (ammo a kas Ambabag, Kiangan iti agdama). Ti sungbatna ti maysa kadagiti kangrunaan a dokumento iti pakasaritaan ti Camino de San Nicolas: ti sapatana nga agserbi iti Gobernador ken pagilian ken ti kinasaganana a mangileppas iti kalsada iti kondision nga adda amin a masapul. Adda kenkuana amin a kabaelan—kas agrimensor, saririt iti kinainheniero, ken dedikasion kas maysa a misionero a managaramid iti kalsada, kas kuna ni Padre Guillermo Tejon, OP (iti sinuratna a biograpia ni Padre Juan Villaverde). Uray idi nakasublin idiay Barcelona, Espania, ginuyugoy latta ni dati a GobernadorHeneral Valeriano Weyler ni Padre Villaverde iti pannakaileppas ti kalsada. Iti inaramidna a baro a mapa ti Tengnga a Luzon agraman dagiti kabangibangna a lugar idi Septiembre 1894, inlanadna dagiti addan a kalsada agraman dagiti maaramidto pay, kasta met ti pagsaadan dagiti baro a maipasdek nga ili. Kangrunaan a nailanad ti Kalsada San Nicolas-Aritao (a pinanagananna met laeng iti El Camino de San Nicolas a kas naagapaden). Iti paset ti Nueva Vizcaya, inlanadna dagiti mabalin a pagbaliwan ti kalsada tapno malisianna ti adu a panangballasiw iti karayan ken kadagiti waig tapno madalanan ti kalsada uray iti panawen ti tudo ken mayababa ti kalsada iti 15 a kilometro.

Malaksid iti kinakurang ti panawenna a nabingay gapu iti misionna idiay Kiangan ken dadduma pay a paspasamak agingga iti ipupusayna idi 1897 iti edadna a 56, dinan nauray ti pannakaileppas ti kalsada iti kapkapnekanna a kas mayannatup iti orihinal a planona idi 1889 ken ti napapintas a mapa idi 1894. Nupay kasta, inus-usaren dagiti tattao iti panagdaliasatda iti nagbaetan ti Pangasinan ken Nueva Vizcaya. Nakalista daytoy a kalsada iti Guia Oficial de Filipinas (Official Guide of the Philippines) idi 1895. Idi 1901, insurat ni Padre Valentin Marin ti Unibersidad ti Santo Tomas, “Saan a mailadawan ti panangdayaw dagiti agdaliasat ti daytoy napintas ken naindaklan a partuat ti inhenieria ken iti naindaklan a tao a nangaramid.” Napanaganan daytoy a kalsada iti Villaverde Trail, gapu iti naindaklan a

Dominikano, Padre Juan Villaverde.

Napapintas ti Kalsada Villaverde

Nabayag a saan naasikaso ti Villaverde Trail (Kalsada San Nicolas-Aritao). Immuna a naikalawa idi 1903 tapno madalanan dagiti karison a guyoden ti nuang. Naipalawa ken naikkan iti darat ti kaaduan a pasetna idi umuna nga administrasion ni Presidente Ferdinand E. Marcos (19651969). Ngem nagtalinaed a kasta agingga idi tawen 1980 nga inserra ti Depatment of Public Works and Highways (DPWH) daytoy gapu iti parikut ti pannakamantenerna, aglalo ket manmano met ti agdaldaliasat a lugan. Kimmaro ti kasasaad ti kalsada kalpasan ti gingined idi Hulio 1990. Adu a paset ti kalsada ti nargaay ket narigat a madalanan ti lugan.

Nairiing ti pannakatarimaan ken pannakaituloyna a masemento idi 2015 gapu iti masansan a pannakadadael ti Kalsada Sta. Fe-San Jose ken pannakasapul iti alternatibo a dalan uray para kadagiti saan unay a dadakkel ken nadadagsen a lugan. Nairiing met ti di panagkinnaawatan ti probinsia ti Nueva Vizcaya ken Pangasinan maipanggep iti kataegan ngem pinagtungtongan da dati a Bokal ken nagbalin a Diputado Ranjit Ramos Shahani ti maikanem a Distrito ti Pangasinan ken dati a Diputado (agdama a Gobernador) Carlos M. Padilla ti Nueva Vizcaya a saan a lapped daytoy iti pannakaituloy ti kalsada. Sakbayna, nairugin a napagtutungtongan dayta a riri ti kataegan idi adminisrasion da dati a Gobernador Victor Agbayani ti Pangasinan ken dati a Gobernador Rodolfo Agbayani ti Nueva Vizcaya.

Umuna a nasemento ti kaatiddogan a paset ti kalsada iti las-ud ti Nueva Vizcaya (manipud iti Sta. Fe agingga iti asideg ti Malico). Iti biang ti Pangasinan, adda 20 a kilometro a paset ti 27 a kilometro manipud iti San Nicolas agingga iti Malico a saan a nasemento iti dayta a tawen 2015. Naiproponeran iti PhPP1.2-bilion tapno malpas koma agingga iti 2018. (Wen, agingga a maisursurat daytoy a salaysay, madama pay laeng ti pannakaikalawa ken pannakasemento ti dakkel a paset ti kalsada iti biang ti Pangasinan, nupay mabalinen a lumasat dagiti babassit a lugan a kas iti van ken motorsiklo nga agderderetso manipud iti Santa Fe agingga iti San Nicolas).

Wen, Villaverde Trail, Saan a Villa Verde Trail

Agingga ita, kadagiti makaammo, maaw-awagan iti Villaverde Trail daytoy a kalsada nga isu met ti adda kadagiti dokumento a historikal. Kadagiti saan a makaammo, Villa Verde Trail wenno Villa Berde Trail ti imalditda kadagiti paskilda iti Facebook, iti Wikipedia ken dadduma a blogspot. Biagentayo man ketdi ti pakasaritaan daytoy a kalsada uray babaen laeng iti maysa a batonlagip iti wangawangan wenno tapaw ti Villaverde Trail.—O

(Retirado ken addaan iti Ed.D- Education, nagpaay ti autor iti Saint Mary’s University (kas mannursuro, Library Director, Graduate School Dean, ken Research Director), iti PLT College Inc. (kas VP for Administration, Research Director ken mannursuro) ken iti Holy Angel University (kas Library Director). Maysa a Direktor ti Nakem Conferences-Philippines iti agdama.—Editor)

Contents

tl

2022-05-16T07:00:00.0000000Z

2022-05-16T07:00:00.0000000Z

https://manilabulletin.pressreader.com/article/281917366673621

Manila Bulletin Publishing Corp