Tao, Lugar, Pasamak

SARICAO, VINTAR, ILOCOS NORTE. Dagiti kameng ti Saricao Upland Farmers’ Association, Inc. (SUFAI) ti Vintar, Ilocos Norte (akinngato a ladawan) iti panangpasiar ti Extension Office ti Mariano Marcos State University, Siudad ti Batac, kadagiti mulada a nateng, agarup dua a bulan kalpasan ti panagturposda iti “Eskuela iti Tangatang” a programa ti MMSU. Pinadas pay ti maysa kadakuada, ni Apo Darwin Garcia, pangulo ti grupo (nakaanteohos, kanigid a ladawan), ti nagaramid iti binuro wenno inartem a mais (silage). Kunana a yad-adunanton ti agaramid ta magustuan dagiti tarakenna a baka. Kaduana iti ladawan ni Pastor Wilmar Miguel, maysa met kadagiti mangidadaulo iti grupo. Kadua ni Mercy R. Gano ti MMSU a pimmasiar iti grupo da Ms. Maricel Serrano, SOA Coordinator ti LGU Vintar; Ms. Bella Gervacio ken Mr. Rolando Rabanal, agpada nga agserserbi iti MMSU Extension. (MRG)

SIUDAD TI BATAC. Naala ti ladawan iti ipapasiar ni mannurat ti Bannawag Oswald A. Valente (kakanigidan) iti University Library ti MMSU, Siudad ti Batac. Kaduana iti ladawan ni Eliza G. Villarin, Direktor ti University Library System ti MMSU (kakanawanan) ken Mery Jane B. Pangramuyen, Library Aide. Kidkiddawen ti University Library ti tulong dagiti mannurat nga Ilokano babaen ti panagidonarda kadagiti nailibro a sinuratda, wenno saan, uray pay kadagiti urnongda a kopia ti Bannawag, tapno manayonan ti urnong ti Library a material iti Literatura Ilokana. (Rinetrato ni Allexis Villarin)

NAGUILIAN, LA UNION. Da agkabsat a Jomicho Marcus Costales, Grade 12, ken Joven Agustus Costales, Grade 9, agpada a bronze medalist iti naiwayat a 12th World Mathematics Team Championship Edition a naangay idi Pebrero

19, 2022 a nakipartisiparan ti aganay a 500 nga estudiante iti hayskul manipud kadagiti nadumaduma a pagadalan iti Filipinas. Agadadal dagiti agkabsat iti BHC Institutional, Inc., San Fernando City, La Union. Sakbayna, nakaawaten dagiti agkabsat iti gold, silver, ken bronze medals kadagiti nadumaduma a kompetision iti Math iti Filipinas ken ganggannaet a pagilian a kas iti China, Malaysia, Singapore, Taiwan, kdp. Annak da Jove Michael Costales ken dati a Mexica Joy Olarte ken appoko ni retirado nga RTC Judge Joven Costales, kolumnista ti Bannawag, da Jomicho Marcus ken Joven Agustus.

Pakaammo: Adda kadi kayatyo a paipablaak a ladawan a para iti “Tao, Lugar, Pasamak”? Ipatulodyo babaen ti e-mail iti: bannawagmagazine.mb@gmail.com wenno no babaen ti koreo, iti: Bannawag, Manila Bulletin Publishing Corp., Muralla cor. Recoletos Sts., Intramuros, Manila. Siguraduen laeng a mailanadyo ti husto a nagan ti/dagiti adda iti ladawan, no ania ti pasken wenno pasamak, no kaano a naangay, lugar a nakaangayanna, ken dadduma pay nga impormasion a kayatyo a mailanad. Awan ti rumbeng a bayadanyo iti panangpaipablaakyo iti/kadagiti ladawan.—EDITOR